សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍បញ្ជាក់ថា ចាប់តាំងពីអាណត្តិមុនៗ រហូតដល់អាណត្តិនេះ រាជរដ្ឋាភិបាលបានខិតខំពង្រីកសាលារៀនឱ្យទៅដល់ភូមិ ឃុំនៅមូលដ្ឋានផ្ទាល់ ដើម្បីអប់រំចំណេះដឹងដល់កូនចៅប្រជាពលរដ្ឋនៅមូលដ្ឋានឱ្យមានមូលដ្ឋានគ្រឹះសិក្សារៀនសូត្ររឹងមាំ។

សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់បែបនេះ ក្នុងឱកាស អញ្ជើញប្រគល់សញ្ញាបត្រជូននិស្សិតសាកលវិទ្យាល័យគ្រប់គ្រង និងសេដ្ឋកិច្ច (UME) នៅខេត្តបាត់ដំបង ដែលបញ្ចប់ការសិក្សាចំនួន ២ ០០១នាក់ នារី ១ ២៥១នាក់។

ក្នុងឱកាសនោះសម្ដេចធិបតីសម្តេចធិបតីបង្ហាញក្តីសោមនស្សរីករាយ ដែលបានអញ្ជើញជាថ្មីមកប្រគល់សញ្ញាបត្រជូននិស្សិតសាកលវិទ្យាល័យគ្រប់គ្រង និងសេដ្ឋកិច្ច។ សម្តេចមានប្រសាសន៍ថា សាកលវិទ្យាល័យគ្រប់គ្រង និងសេដ្ឋកិច្ច សម្តេចបានអញ្ជើញប្រគល់សញ្ញាបត្រច្រើនជាងគេ និងច្រើនកន្លែង។ សម្ដេចធិបតីបានថ្លែងថា ដើម្បីឱ្យកូនចៅប្រជាពលរដ្ឋទទួលបានការអប់រំខ្ពស់ រាជរដ្ឋាភិបាល បានដាក់ចេញនយោបាយពង្រាយសាលាកម្រិតឧត្តមសិក្សាទៅតាមខេត្ត។ បច្ចុប្បន្នស្ទើគ្រប់ខេត្ត មានការអប់រំកម្រិតឧត្តមសិក្សា។ សម្តេចធិបតី ក៏បានថ្លែងអំណរគុណសាកលវិទ្យាល័យ ដែលបានផ្តល់អាហារូបករណ៍ជូនសម្តេចតេជោ ដើម្បីផ្តល់ជូនដល់និស្សិត។

សម្ដេចធិបតីបញ្ជាក់ថា តាំងពីអាណត្តិមុនៗរហូតមកដល់អាណត្តិទី៧នេះ រាជរដ្ឋាភិបាលបានខិតខំពង្រីកសាលារៀនទៅដល់មូលដ្ឋានភូមិ ឃុំ ដើម្បីផ្ដល់ការអប់រំទៅដល់កូនចៅប្រជាពលរដ្ឋឱ្យបានរៀនសូត្រ មានមូលដ្ឋានគ្រឹះចំណេះដឹងរឹងមាំ និងឈានមកបន្តការសិក្សានៅកម្រិតឧត្តមសិក្សាដែលពួកគេអាចក្លាយជាធនធានមនុស្សដែលមានគុណភាពសម្រាប់ជាតិ។

ក្នុងឱកាសនោះ សម្តេចធិបតី ក៏បានបញ្ជាក់ថា សមិទ្ធផលរបស់និស្សិតជ័យលាភីនាពេលនេះ មិនមែនជាការពុះពាររបស់និស្សិតៗតែឯងនោះទេ ប៉ុន្តែគឺជាផ្លែផ្កានៃការគាំទ្រ ការលះបង់ និងការលើកទឹកចិត្ត របស់មាតាបិតា អាណាព្យាបាល, ព្រមទាំង ការខិតខំ និង ទទួលខុសត្រូវខ្ពស់ របស់សាកលវិទ្យាល័យផងដែរ។ សម្ដេចថ្លែងថា «សញ្ញាបត្រមួយសន្លឹក គឺជាសមិទ្ធផលរួមគ្នានៃការខិតខំរបស់និស្សិត, ការបង្រៀនរបស់សាស្ត្រាចារ្យ, និងការលះបង់របស់អាណាព្យាបាល និងក្រុមគ្រួសារ»៕