ភ្នំពេញ៖ អង្គការមូលនិធិបង្ការរបួសអាស៊ីប្រចាំកម្ពុជា (AIP) បានលើកឡើងថា យោងតាមការសិក្សាស្រាវជ្រាវនាពេល កន្លងមក គិតត្រឹមឆ្នាំ២០១៩ ក្នុងពេលដែលកម្ពុជាមានអ្នកស្លាប់ និងរងរបួសជាច្រើនពាន់នាក់ ជាលទ្ធផលរក​ឃើញថា កម្ពុជាខាតបង់ប្រាក់ប្រមាណ ៤៦៧លានដុល្លារ ដោយសារគ្រោះថ្នាក់ចរាចរណ៍។

​ក្នុងកិច្ចសម្ភាសន៍ជាមួយបណ្តាញអ្នកសារព័ត៌មាន ក្រោយសិក្ខាសាលាជាមួយថ្នាក់ដឹកនាំសហជីពកម្មករ ស្តីពីការលើកកម្ពស់សុវត្ថិភាពចរាចរណ៍សម្រាប់កម្មករនិយោជិតកម្ពុជា នៅព្រឹកថ្ងៃទី១៨ ឧសភា ឆ្នាំ២០២២នេះ លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជា បានមានប្រសាសន៍ថា បើទោះបីជាអត្រា គ្រោះថ្នាក់ចរាចរណ៍រយៈពេលចុងក្រោយមានការថយចុះយ៉ាងណាក្តី តាមការសិក្សាស្រាវជ្រាវមួយរបស់អង្គការ យូអិនឌីភី ដោយបានសហការជាមួយក្រសួងសាធារណការនិងដឹកជញ្ជូន ក៏ដូចជាគណៈកម្មាធិការជាតិសុវត្ថិភាព ចរាចរណ៍ផ្លូវគោក គិតត្រឹមឆ្នាំ២០១៩ ក្នុងពេលដែលកម្ពុជាមានអ្នកស្លាប់រហូតដល់ជាង ២ពាន់នាក់ និងរងរបួសជាច្រើពាន់នាក់ ជាលទ្ធផលរកឃើញថា កម្ពុជាខាតបង់ជិត ៤៦៧លានដុល្លារ។

​លោកនាយក បានបញ្ជាក់បន្ថែមថា ជារៀងរាល់ថ្ងៃនៅកម្ពុជា មានកម្មករនិយោជិតក្នុងវិស័យកាត់ដេរសម្លៀកបំពាក់ និងផលិត ស្បែកជើងប្រមាណជាង ៧០ម៉ឺននាក់ ដែលប្រថុយប្រថានអាយុជីវិតខ្លួននឹងហានិភ័យក្នុងការធ្វើដំណើរទៅមកកន្លែងការងារនៅលើផ្លូវដែលមានចរាចរណ៍កកស្ទះ និងប្រឈមនឹងគ្រោះថ្នាក់ដើម្បីស្វែងរក ចំណូលផ្គត់ផ្គង់ដល់គ្រួសារ។

តាមរយៈការចូលរួមក្នុងអង្គសិក្ខាសាលាខាងលើនេះ លោកស្រី សួន សុគន្ធា អនុប្រធានសហព័ន្ធសហជីពជាតិ នៃឧស្សាហកម្មវាយនភ័ណ្ឌកាត់ដេរកម្ពុជា លើកឡើងថា សហជីបរបស់លោកស្រី នឹងចូលរួមផ្សព្វផ្សាយព័ត៌មាន ទៅកាន់សាធារណជន ជាពិសេសកម្មករនិយោជិតនៅតាមរោងចក្រ សហគ្រាស ឲ្យបានយល់ដឹងកាន់តែច្រើនថែមទៀត អំពីវិធាន សុវត្ថិភាពចរាចរណ៍ ខណៈដែលពួកគាត់ជាបុគ្គលដ៏សំខាន់មួយ ក្នុងការរួមចំណែកយ៉ាងធំធេង ក្នុងវិស័យ​ឧស្សាហកម្មកាត់ដេរនៅកម្ពុជា។

​សូមបញ្ជាក់ថា ការរៀបចំសិក្ខាសាលាជាមួយថ្នាក់ដឹកនាំសហជីពកម្មករ ស្តីពីការលើកកម្ពស់សុវត្ថិភាពចរាចរណ៍ សម្រាប់ កម្មករនិយោជិតកម្ពុជា ក្នុងគោលបំណងដើម្បីបង្កើនការយល់ដឹងដល់ថ្នាក់ដឹកនាំសហជីពកម្មករ​លើបញ្ហា សុវត្ថិភាពចរាចរណ៍ និង ឧបសគ្គនានាក្នុងការជំរុញការប្តូររថយន្តដែលមានសុវត្ថិភាពប្រសើរជាង និងគោល នយោបាយសុវត្ថិភាពចរាចរណ៍សម្រាប់ការធ្វើដំណើរទៅមករបស់កម្មករនិយោជិត និងដើម្បីកៀរគរមតិគាំទ្រឱ្យ​កាន់តែរឹងមាំក្នុងចំណោមថ្នាក់ដឹកនាំសហជីពកម្មករ និងសហជីពថ្នាក់មូលដ្ឋានលើបញ្ហាសុវត្ថិភាពចរាចរណ៍ និងបង្កើនកិច្ចសហប្រតិបត្តិការសម្រាប់ការ៕