​បាល់ទាត់៖ ​ក្លិប​បិសាច​ក្រហម Manchester United គឺជា​ក្លិប​ដែល​រង​ការខាតបង់​ច្រើនជាងគេ​លើ​ការវិនិយោគ​នៃ​ការទិញ​ដូរ​កីឡាករ​រយៈពេល ១០ឆ្នាំ​ចុង​ក្រោយនេះ នេះ​បើតាម​ការស្រាវជ្រាវ​រប​ស់​វិទ្យាស្ថាន​សិក្សា​ស្រាវជ្រាវ​កីឡា​អន្តរជាតិ​ ដែលមានមូលដ្ឋាន​នៅ​ប្រទេស​ស្វ៊ី​ស​។​

​​ការសិក្សា​បង្ហាញថា Manchester United បាន​ចំណាយលុយ​ទិញ​កីឡាករ​សរុប ១.៥៤៥ពាន់​លាន់​អឺរ៉ូ និង​លក់​ចេញ​វិញ​បានតែ ៤៧០លាន​អឺរ៉ូ​ប៉ុណ្ណោះ​ស្មើនឹង​ខាតបង់​ជាង ១ពាន់​លាន​។ ​​មិន​ត្រឹមតែ Manchester United ក្លិប​នៅ Premier League ចំនួន ១៤ស្ថិតក្នុង​បញ្ជី​ក្លិប​ទាំង ២០ ដែល​ខាតបង់​ច្រើនជាងគេ​រយៈពេល ១០ឆ្នាំ​ចុង​ក្រោយនេះ​។ ​​Manchester United កាលពី​ឆ្នាំ២០១៦ បាន​ទិញ​ចូលមក​វិញ​កីឡាករ​បារាំង Paul Pogba ក្នុង​តំលៃ ៨៩.៥លាន​ផោន​ថ្លៃ​បំផុត​ក្នុង​ប្រវត្តិសាស្ត្រ​ក្លិប ខណៈ​កិច្ចសន្យា​របស់​កីឡាករ​បារាំង​រូបនេះ​នឹង​អស់​សុពលភាព​នៅ​ដំណាច់​រដូវ​កាល​នេះ​។

​​ការទិញចូល​សំខាន់ៗ​ផ្សេងទៀត​មានដូចជា Anthony Martial តំលៃ ៣៦លាន​ផោន និង Donny van der Beek តំលៃ ៤០លាន​ផោន ហើយ​កីឡាករ​ទាំងពី​រចំណាយពេល​ខ្ចី​ជើង​នៅ​ក្លិប​ផ្សេង​។​ ​​ដោយឡែក​សំរាប់​ក្រុម​ជើងឯក English Premier League, Manchester City ឈរ​លេខ២ ក្នុង​តារាង​ខាត​ចំនួន ៩៨៤លាន​អឺរ៉ូ​ក្រោយ​ចំណាយលុយ​ទិញ ១.៦៩៩ពាន់​លាន​អឺរ៉ូ លក់​ចេញ​វិញ​បានតែ ៧១៥លាន​អឺរ៉ូ​។ ​​ក្លិប​បារាំង Paris Saint Germain ឈរ​លេខ៣ ខាត​ចំនួន ៩១៥លាន​អឺរ៉ូ, Barcelona ឈរ​លេខ៤ ខាត ៦៥០លាន​អឺរ៉ូ និង Arsenal ឈរ​លេខ៥ ខាត ៥៨៣លាន​អឺរ៉ូ​៕

​អត្ថបទ​៖​នាង សុភា​វុ​ធ