​អ៊ុយក្រែន៖ កាលពី​ថ្ងៃ​ពុធ​ប្រទេស​រុស្ស៊ី​បាន​លើក​ឡើង​ថា ​ខ្លួន​បាន​ប្រើ​អាវុធ​ដ៏​មាន​ឥទ្ធិពល​ឡាស៊ែរ​ជំនាន់​ថ្មី​ក្នុង​ប្រទេស​អ៊ុយ​ក្រែ​ន ដើម្បី​បាញ់​កម្ទេច​យាន​ដ្រូ​ន និង​ការ​ពង្រាយ​គ្រឿង​សព្វាវុធ​សំងាត់​របស់​ក្រុង Moscow ​ដើម្បី​ប្រឆាំង​នឹង​ការ​សម្រុក​ផ្ដល់​អាវុធ​របស់​លោក​ខាងលិច​ឲ្យ​អ៊ុយ​ក្រែ​ន។

​ប្រធានាធិបតី​រុស្ស៊ី​លោក Vladimir Putin កាលពី​ឆ្នាំ២០១៨​ បាន​បង្ហាញ​មី​ស៊ី​ល​បាលី​ស្ទីក​អន្តរទ្វីប យាន​ដ្រូ​ន នុយក្លេអ៊ែរ​ក្រោម​ទឹក អាវុធ​ល្បឿន​លឿន​ជាង​សំឡេង និង​អាវុធ​ឡាស៊ែរ​។ លោក Yury Borisov ឧបនាយករដ្ឋមន្ត្រី​ទទួលបន្ទុក​ផ្នែក​អភិវឌ្ឍន៍​យោធា​បាន​ប្រាប់​សន្និសីទ​នៅ​ទីក្រុង Moscow ថា​ អាវុធ​ឡាស៊ែរ​មាន​ឈ្មោះ​ថា Peresvet កំពុង​ត្រូវ​បាន​ដាក់​ពង្រាយ​យ៉ាង​ទូលំទូលាយ ហើយ​វា​អាច​គេច​ចេញពី​ការ​តាម​ដាន​ដោយ​ផ្កាយរណប​រហូតដល់ ១,៥០០​គីឡូម៉ែត្រ​ពីលើ​ដី​។​ ​លោក​ប្រធានាធិបតី​អ៊ុយ​ក្រែ​ន Volodymyr Zelenskiy បាន​ប្រៀបធៀប​បែប​ចំអក​ពី​ដំណឹង​អាវុធ​ឡាស៊ែរ​ដោយ​ហៅថា​ ជា​អាវុធ​ដ៏​អស្ចារ្យ​ដែល​ក្រុម​ណា​ស៊ី​ស​អា​ល្លឺ​ម៉ង់បាន​បង្ហាញ​ ដើម្បី​ទប់ស្កាត់​ការ​បរាជ័យ​ក្នុង​សង្គ្រាម​លោក​លើក​ទី​២​។

​លោក​បាន​និយាយ​នៅ​ក្នុង​សុន្ទរកថា​វីដេអូ​យប់​ជ្រៅ​ថា វា​កាន់​តែ​ច្បាស់​ថា ​អាវុធ​ទាំងនោះ​មិន​មាន​ឱកាស​ប្រើ​ក្នុង​សង្គ្រាម​ទេ ការឃោសនា​កាន់​តែ​ច្រើន​អំពី​អាវុធ​ដ៏​អស្ចារ្យ​ដែល​នឹង​មាន​ឥទ្ធិពល​ខ្លាំង គ្រាន់តែ​ដើម្បី​ធានា​ឲ្យ​មាន​ចំណុច​បត់បែន​មួយ​ប៉ុណ្ណោះ​។​ ដូច្នេះ​ហើយ​យើង​ឃើញ​ថា នៅ​ក្នុង​ខែ​ទី៣ នៃ​សង្គ្រាម​ទ្រង់ទ្រាយ​ធំ រុស្ស៊ី​កំពុង​ព្យាយាម​ស្វែងរក​អាវុធ​អច្ឆរិយ​របស់​ខ្លួន​ ទាំង​អស់​នេះ​បង្ហាញ​យ៉ាង​ច្បាស់​ពី​ការ​បរាជ័យ​ទាំងស្រុង ​នៃ​បេសកកម្ម​វាយប្រហារ​នេះ​។​ ​នៅ​ពេល​ត្រូវ​បាន​សួរ​ថា ​តើ​អាវុធ​ប្រភេទ​នេះ​មែន​ទេ ដែល​ត្រូវ​បាន​ប្រើ​នៅ​ក្នុង​ប្រទេស​អ៊ុយ​ក្រែ​ន លោក Borisov បាន​និយាយ​ថា មែនហើយ។ អាវុធ​គំរូ​ដំបូង​នោះ​ត្រូវ​បាន​ប្រើ​រួច​ទៅ​ហើយ​នៅ​ក្នុង​ប្រទេស​អ៊ុយ​ក្រែ​ន​។ ​លោ​កថា​ អាវុធ​ជំនាន់​ថ្មី​នេះ​មាន​ឈ្មោះ​ថា Zadira៕

អត្ថបទ៖ សុខមាន