អ្នកតាមដានព្រឹត្តិការណ៍នយោបាយ បានបង្ហាញសុទិដ្ឋិនិយមចំពោះដំណើរបំពេញទស្សនកិច្ចរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ទៅតំបន់អឺរ៉ុបខាងកើត គឺពិតជាមានសារសំខាន់ក្នុងការពង្រីកសក្តានុពល ពង្រឹងសមត្ថភាព បង្កើនការផ្សារភ្ជាប់ទំនាក់ទំនងរឹតតែខ្លាំងក្លាជាមួយតំបន់អឺរ៉ុប។
លោក ហេង ម៉េងលី អ្នកតាមដានព្រឹត្តិការណ៍នយោបាយ បានថ្លែងថា ដំណើរបំពេញទស្សនកិច្ចរបស់សម្តេចធិបតី ហ៊ុន ម៉ាណែត ទៅតំបន់អឺរ៉ុបខាងកើត គឺពិតជាមានសារសំខាន់សម្រាប់កម្ពុជា ក្នុងបរិបទភូមិសាស្ត្រនយោបាយនាពេលបច្ចុប្បន្ននេះ ដែលកំពុងតែមានការប្រែប្រួល។ ហើយដំណើរទស្សនកិច្ចនេះ នឹងទទួលបានអត្ថប្រយោជន៍ជាច្រើន ដូចជាការធ្វើពិពិធកម្មសេដ្ឋកិច្ច អាចកាត់បន្ថយតម្លៃប្រេងឥន្ធនៈថាមពល ជំរុញការផ្សារភ្ជាប់ទំនាក់ទំនងប្រជាជន កំណើនទេសចរណ៍ និងជាពិសេសវិស័យការពារជាតិ។
លោក ហេង ម៉េងលី បានបញ្ជាក់ថា សារៈសំខាន់ដែលសម្តេចធិបតី ហ៊ុន ម៉ាណែត អញ្ជើញទៅតំបន់អឺរ៉ុបខាងកើត គឺមិនត្រឹមតែជាទំនាក់ទំនងទ្វេភាគីរវាងកម្ពុជា អាស៊ែបៃហ្សង់ តួគីយ៉េ និងកាហ្សាក់ស្ថាន ជារួមនឹងមានទំនាក់ទំនងល្អប្រសើរថែមទៀតទៅលើវិស័យការពារជាតិក្នុងឋានៈជារដ្ឋមានអធិបតេយ្យភាពមានបូរណភាពទឹកដីដែលមានការកំណត់ដោយច្បាប់អន្តរជាតិ ទទួលស្គាល់ដោយអន្តរជាតិ។ ក្នុងបរិការនេះទៀតសោត កម្ពុជាក៏ភ្ជាប់បញ្ហាព្រំដែនដែលត្រូវបានឈ្លានពានដោយប្រទេសថៃ ក្នុងការលើកឡើងក្នុងអង្គប្រជុំសន្និសីទដើម្បីធានាការពារសន្តិសុខប្រទេសជាតិរបស់រដ្ឋនីមួយៗនៅក្នុងតំបន់ ក៏ដូចជាការប៉ះទង្គិចនៅក្នុងតំបន់មិនថានៅអាស៊ីអាគ្នេយ៍ ឬក៏អាស៊ីកណ្តាល និងអឺរ៉ុបខាងកើតទេ៕ អត្ថបទ៖ វង្ស សុភាព
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
