ពិភពលោក៖ រដ្ឋមន្ត្រីការបរទេសសហរដ្ឋអាមេរិកលោក Antony Blinken និយាយថា សង្គ្រាមនៅអ៊ុយក្រែនកំពុងបង្កើតវិបត្តិសន្តិសុខស្បៀងអាហារពិភពលោកធំបំផុតនៅពេលនេះ។ រុស្ស៊ី និងអ៊ុយក្រែនផលិតបានមួយភាគបីនៃការផ្គត់ផ្គង់ស្រូវសាលីរបស់ពិភពលោក ហើយការបាត់បង់ទំនិញប្រើប្រាស់ដោយសារសង្គ្រាមបានបណ្តាលឱ្យតម្លៃស្បៀងអាហារកើនឡើង និងភាពមិនច្បាស់លាស់អំពីសន្តិសុខស្បៀង នៅពេលខាងមុខនៅទូទាំងពិភពលោក ជាពិសេសនៅក្នុងប្រទេសក្រីក្រ។
ជាផ្នែកមួយនៃកិច្ចខិតខំប្រឹងប្រែងដើម្បីដោះស្រាយវិបត្តិ លោក Blinken បានជួបប្រជុំនៅទីក្រុងញូវយ៉កនៅក្រៅកិច្ចប្រជុំអង្គការសហប្រជាជាតិ ដែលផ្តោតលើអសន្តិសុខស្បៀង។ ក្រសួងការបរទេសបាននិយាយថា នៅឆ្នាំ2021 មនុស្សជាង 193លាននាក់នៅទូទាំងពិភពលោកបានជួបប្រទះអសន្តិសុខស្បៀង ដែលកើនឡើងចំនួន 40លាននាក់ពីឆ្នាំមុននោះ។ មនុស្សរហូតដល់ 40លាននាក់ត្រូវបានគេព្យាករណ៍ថានឹងត្រូវធ្លាក់ក្នុងភាពក្រីក្រ និងអសន្តិសុខស្បៀងនៅដំណាច់ឆ្នាំនេះ។ កង្វះប្រេងឥន្ធនៈ និងជីនៅក្នុងប្រទេសជាច្រើន និងការកើនឡើងតម្លៃអាហារបានគំរាមកំហែងដល់អស្ថិរភាពសង្គមដែលផុយស្រួយ បង្កើនភាពអត់ឃ្លាន និងកង្វះអាហារូបត្ថម្ភ ជំរុញឲ្យមានការធ្វើអន្តោប្រវេសន៍ និងវិបត្តិសេដ្ឋកិច្ចធ្ងន់ធ្ងរ។ ជម្លោះបានធ្វើឱ្យបញ្ហាសន្តិសុខស្បៀងកាន់តែធ្ងន់ធ្ងរនៅទូទាំងពិភពលោក។
លោក Antonio Guterres ប្រមុខអង្គការសហប្រជាជាតិបានថ្លែងថា សូមបញ្ជាក់ឱ្យច្បាស់ថា គ្មានដំណោះស្រាយមានប្រសិទ្ធភាពចំពោះវិបត្តិស្បៀងអាហារ ដោយគ្មានការធ្វើសមាហរណកម្មឡើងវិញចំពោះផលិតកម្មស្បៀងរបស់អ៊ុយក្រែន ព្រមទាំងផលិតផលអាហារ និងជីដែលផលិតដោយរុស្ស៊ី និងបេឡារុសទៅលើទីផ្សារពិភពលោកនោះទេ ទោះបីជាមានសង្គ្រាមក៏ដោយ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
