ភ្នំពេញ៖ លោក ឃ្លាំង ហួត ប្រធានគណៈកម្មាធិការគណបក្សប្រជាជនកម្ពុជា ខណ្ឌជ្រោយចង្វារ នាព្រឹកថ្ងៃទី១៩ ឧសភា ឆ្នាំ២០២២នេះ បានជួបសំណេះសំណាលជាមួយកម្មករនិយោជិតសរុបប្រមាណ ១ ៤០០នាក់ នៅក្នុងគម្រោងអ័រគីដេ ដឺប៊ូតានិច ស៊ីធី ខណ្ឌជ្រោយចង្វារ រាជធានីភ្នំពេញ។

នៅក្នុងពិធីនេះ លោក ឃ្លាំង ហួត បានពាំនាំនូវប្រសាសន៍សាកសួរសុខទុក្ខពីសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្រោមការដឹកនាំរបស់សម្ដេច ប្រទេសជាតិមាន​សុខសន្តិភាពពេញលេញដូចសព្វថ្ងៃ ​សម្តេច​បានលះបង់ដោយយកអាយុជីវិតជាដើមទុន ដើម្បី​ឯកភាពប្រទេសជាតិមានសុខសន្តិភាពពេញលេញ ​ដោយសារ​នយោបាយឈ្នះៗរបស់សម្តេច។

លោក បានបញ្ជាក់ទៀតថា នៅកម្ពុជាមានសុខសន្តិភាព ហើយឈានទៅរកការបោះឆ្នោត ឃុំ សង្កាត់ ​នាថ្ងៃទី៥ ខែមិថុនាខាងមុខ​ ដោយមានគណបក្សចំនួន១៦ ​ចុះបញ្ជីប្រកួតប្រជែង។

លោក សង្ឃឹមថា កម្មករនិយោជិត ដែលកំពុងមានវត្តមានក្នុងពេលនេះ​ នឹង​គៀងគរ​បងប្អូនកូនក្មួយ និង​គ្រួសារក្នុងភូមិ ក្នុងមូលដ្ឋាន ​ធ្វើការបោះឆ្នោតជូនគណបក្សប្រជាជនកម្ពុជា ដើម្បីរក្សាបាន​នូវសុខសន្តិភាព ​និង​សូមគាំទ្រ​សម្តេចតេជោ ហ៊ុន សែន ​ជា​បេក្ខភាព​នាយករដ្ឋមន្ត្រីជារៀងរហូត ព្រោះ​មាន​សន្តិភាព ទើបយើងមានអ្វីៗគ្រប់យ៉ាងដូចសព្វថ្ងៃនេះ៕ អត្ថបទ៖ ឈិត បូរ៉ាវី