ភ្នំពេញ៖ អតីតអ្នកគាំទ្រគណបក្សផ្សេងៗជិត២០០នាក់រស់នៅខណ្ឌដង្កោ បានសម្រេចចិត្តចូលរួមជាសមាជិកគណបក្សប្រជាជនកម្ពុជា។

ការសម្រេចចិត្តចាកចេញពីគណបក្សចាស់ មកជាសមាជិកគណបក្សប្រជាជនកម្ពុជានេះ ដោយសារកន្លងមកពួកគេមើលឃើញថា គណបក្សចាស់ដែលខ្លួនធ្លាប់គាំទ្រគឺមានតែការភូតកុហក ជម្លោះផ្ទៃក្នុង ផ្ទុយស្រឡះ ពីការដឹកនាំរបស់ប្រជាជនកម្ពុជា។ នេះជាការលើកឡើងក្នុងឱកាស ប្រកាសទទួលសមាជិកថ្មី របស់គណបក្សប្រជាជនកម្ពុជាក្នុងខណ្ឌដង្កោ។

ប្រជាពលរដ្ឋដែលជាអតីតអ្នកគាំទ្រគណបក្សដទៃចំនួន ១៨៨នាក់ រស់នៅក្នុងខណ្ឌដង្កោ បានស្ម័គ្រចិត្ត ស្នើសុំមកចូលរួមជាសមាជិកនៃគណបក្សប្រជាជនកម្ពុជាវិញ ស្របពេលដែល ការបោះឆ្នោតជ្រើសរើសក្រុមប្រឹក្សាឃុំ-សង្កាត់ខិតចូលមកដល់។

ការចូលរួមជាសមាជិកគណបក្សប្រជាជនកម្ពុជានេះ ​ពួកគាត់លើកឡើងថា គឺដោយសារការដឹកនាំ​របស់​គណបក្សប្រជាជនកម្ពុជា ផ្ទុយស្រឡះពីការដឹកនាំរបស់គណបក្សដែលពួកគាត់ធ្លាប់គាំទ្រ។ គណបក្សចាស់ដែលពួកគាត់គាំទ្រ ​គឺបានតែសន្យា ​ពុំមានសកម្មភាពជាក់ស្ដែងជម្លោះផ្ទៃក្នុង គិតតែ​ពី​ផលប្រយោជន៍ ​ពុំបានធ្វើអ្វីមួយដើម្បីប្រជាជននោះទេ។

ការផ្លាស់ចូលមកជាសមាជិកគណបក្សប្រជាជនកម្ពុជានេះ ​ក៏ដោយសារតែពួកគាត់មើលឃើញថា មានតែគណបក្សប្រជាជនកម្ពុជា​តែមួយប៉ុណ្ណោះ ​ដែលអាចផ្ញើវាសនា មានការគិតគូពីប្រជាពលរដ្ឋ​គ្រប់រូប គ្រប់កាលទេសៈ។

ចំពោះការទទួលសមាជិកគណបក្សថ្មីនេះ លោក ម៉ៃ ម៉ត់ ជាប្រធានគណបក្សប្រជាជនកម្ពុជា​ខណ្ឌដង្កោ ​និងលោក ជ គឹមស៊ ជាអនុប្រធានប្រចាំការ ​ក៏បានថ្លែងអំណរគុណនិងស្វាគមន៍វត្តមាន​របស់​ប្រជាពលរដ្ឋដែលស្ម័គ្រចិត្តចូលរួមជាមួយគណប្រជាជនកម្ពុជា។

លោក ម៉ៃ ម៉ុន លើកឡើងថា គណបក្សប្រជាជនកម្ពុជា ជាអ្នកជួយរំដោះប្រជាពលរដ្ឋពីការកាប់​សម្លាប់​ពី​របបប្រល័យពូជសាសន៍ប៉ុលពត ​បង្កើតសន្តិភាព ​ថែរក្សាសន្តិភាព និង​ នាំមកនូវ​ការអភិវឌ្ឍ​ជូនជាតិ​ដល់​សព្វថ្ងៃ។

លើសពីនេះ ​គឺការទប់ស្កាត់ការរីករាលដាលជំងឺកូវីដ-១៩ រាជរដ្ឋាភិបាលក្រោមការដឹកនាំរបស់​គណបក្ស​ប្រជាជនកម្ពុជា ​បានចាក់វ៉ាក់សាំងជូន​ប្រជាពលរដ្ឋគ្រប់រូប និងផ្ដល់ការព្យាបាល​ដោយ​មិន​គិតថវិកា​ផងដែរ។​ បច្ចុប្បន្នជំងឺរាតត្បាត​ ក៏អាចគ្រប់គ្រងបាន ​ជាពិសេសគឺពុំមានករណីឆ្លង និង​ពុំមានករណីស្លាប់​បាត់បង់​ជីវិត ​ក្នុងរយៈពេលប្រមាណ ​២សប្ដាហ៍មកនេះ។

ផ្អែកលើមាត្រា៣ នៃលក្ខន្តិកៈ បទបញ្ជាផ្ទៃក្នុងនៃគណបក្សប្រជាជនកម្ពុជាបញ្ជាក់ថា គោលបំណង​របស់​គណបក្សគឺប្រមូលកម្លាំងគ្រប់ជនជាតិកម្ពុជា ​ដែល​មាន​ឧត្តមគតិស្នេហាជាតិ ​មាតុភូមិ ស្រឡាញ់​លទ្ធិប្រជាធិបតេយ្យ ​និងសន្តិភាព​ ដោយមិនប្រកាន់ឋានៈ ជីវភាព ​ជនជាតិ ​ជំនឿសាសនា អតីតកាល​ ដើម្បីរួមកម្លាំងគ្នាការពារ​សមិទ្ធផល​សង្គមជាតិ និង​កសាងប្រទេសកម្ពុជាមួយ ឯករាជ្យ​សន្តិភាព សេរីភាព ប្រជាធិបតេយ្យ អព្យាក្រឹត និងវឌ្ឍនភាពសង្គម ៕អត្ថបទ៖ គឹមហុក