កណ្ដាល ៖ ឯកឧត្ដម សាន វណ្ណេត អនុប្រធានក្រុមការងារថ្នាក់កណ្តាលចុះជួយស្រុកឱរ៉ាល់ និងជាប្រធានក្រុមការងារថ្នាក់កណ្តាលចុះជួយឃុំត្រពាំងជោ តំណាងឯកឧត្តម លេង ផាលី រដ្ឋលេខាធិការក្រសួងផែនការ និងជាអនុប្រធានទី១ ក្រុមការងារថ្នាក់កណ្តាលចុះជួយស្រុកឱរ៉ាល់ ទទួលបន្ទុក៤ឃុំ គឺឃុំតាសាល ឃុំហោងសំណំ ឃុំត្រពាំងជោ និងឃុំរស្មីសាមគ្គី បានអញ្ជើញជាអធិបតីក្នុងពិធីប្រកាសបញ្ចូលសមាជិក សមាជិកាថ្មី គណបក្សប្រជាជនកម្ពុជា ចំនួន ១០១៨នាក់ មកពី២៣ភូមិ ក្នុងឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ នាព្រឹកថ្ងៃទី១៩ ខែឧសភា ឆ្នាំ២០២២នេះ នៅទីស្នាក់ការកណ្តាលគណបក្សឃុំ។

ក្នុងពិធីប្រកាសបញ្ចូលសមាជិកបក្សថ្មី មានការអញ្ជើញចូលរួមពីលោក ងួន វាសនា អនុប្រធានគណៈកម្មាធិការគណបក្សស្រុក និងជាអនុប្រធានក្រុមការងារចុះជួយឃុំត្រពាំងជោ, ឯកឧត្តម បណ្ឌិត សោ សុន្ធរ៍ធារី អនុប្រធានក្រុមការងារថ្នាក់កណ្តាលចុះជួយស្រុកឱរ៉ាល់, លោកស្រី វេជ្ជបណ្ឌិត មួង សុជាតិ អនុប្រធានក្រុមការងារថ្នាក់កណ្តាលចុះជួយឃុំត្រពាំងជោ, លោក ប៊ុត ប៊ុនធឿន សមាជិកគណៈកម្មាធិការគណបក្សស្រុក និងជាអនុប្រធានក្រុមការងារចុះជួយឃុំ និងលោក ទេព ណែម ប្រធានគណៈកម្មាធិការគណបក្សឃុំត្រពាំងជោ រួមនិងសមាជិក។

តំណាងសមាជិក ដែលទើបប្រកាសបញ្ចូលថ្មី បានឡើងធ្វើការប្តេជ្ញាចិត្តចូលរួមជីវភាពនយោបាយជាមួយគណបក្សប្រជាជនកម្ពុជា និងអនុវត្តតាមគោលនយោបាយ លក្ខន្តិកៈ និងបទបញ្ជាផ្ទៃក្នុងរបស់គណបក្ស, ប្ដេជ្ញាបន្តស្មារតីសាមគ្គីភាព និងឯកភាពផ្ទៃក្នុង ដែលជាចំណុចស្នូលនៃភាពខ្លាំង និងជោគជ័យរបស់បក្ស, ប្ដេជ្ញាចូលរួមរាល់សកម្មភាពរបស់បក្ស ការពារសមិទ្ធិផល និងការពារ សន្តិភាព! ប្ដេជ្ញាគាំទ្រសម្តេចអគ្គមហាសេនាបតីតេជោ ហ៊ុន សែន ជាបេក្ខភាពនាយករដ្ឋមន្ត្រី និងគាំទ្រឯកឧត្តម បណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្តី នាពេលអនាគត។

លោក ងួន វាសនា បានលើកឡើងថា ថ្ងៃនេះយើងបានជួបជុំគ្នា និងឃើញទាំងអស់គ្នានូវពាក្យសុំចូលជាសមាជិកគណបក្សប្រជាជនកម្ពុជា និងបានឃើញនូវសេចកី្តសម្រេចរបស់គណៈកម្មាធិការគណបក្សឃុំ ដើម្បីទទួលស្គាល់ជាសមាជិក សមាជិកាថ្មី និងបានស្តាប់នូវការប្តេជ្ញាចិត្តរបស់តំណាងបានសំដែងនូវការស្វាគមន៍យ៉ាងកក់ក្តៅ និងផ្តាំផ្ញើជូនដល់សមាជិកគណបក្សប្រជាជនកម្ពុជា ទាំង១០១៨នាក់ ទើបបញ្ចូលថ្មី ដែលបានសម្រេចចិត្តដ៏ត្រឹមត្រូវក្នុងការចូលរួមជីវភាពនយោបាយជាមួយគណបក្សប្រជាជនកម្ពុជា និងជំរុញឱ្យសមាជិក សមាជិកាទាំងអស់ ត្រូវខិតខំប្រឹងប្រែងបម្រើគណបក្សឱ្យអស់ពីកម្លាំងកាយចិត្ត ដើម្បីចូលរួមកសាងប្រទេសជាតិយើងឱ្យកាន់តែរីកចម្រើនតទៅមុខថែមទៀត។

 ទន្ទឹមគ្នានោះដែរឯកឧត្តម សាន វណ្ណេត បានលើកឡើងពីការឆ្លងកាត់ការលំបាកនានារបស់ថ្នាក់ដឹកនាំគណបក្សប្រជាជនកម្ពុជា ចាប់តាំងពីការបង្កើតបានរណសិរ្សសង្រ្គោះជាតិកម្ពុជា រំដោះជាតិ រំដោះប្រជាជន ពីរបបប្រល័យពូជសាសន៍ ខ្មែរក្រហម នៅថ្ងៃទី៧ ខែមករា ឆ្នាំ១៩៧៩ ជួយស្តារ និងកសាងប្រទេសជាតិ រហូតបានបញ្ចប់សង្រ្គាម បង្រួបបង្រួមជាតិខ្មែរជាថ្មី នាំយកសន្តិភាពពេញលេញជូនជាតិមាតុភូមិ។ ឯកឧត្តម ក៏បានជំរុញឱ្យសមាជិក ដែលបានបញ្ចូលថ្មីនេះ គោរព និងអនុវត្តតាមគោលនយោបាយ លក្ខន្តិកៈ និងបទបញ្ជាផ្ទៃក្នុងរបស់គណបក្ស ព្រោះថាយើងជាសមាជិកបក្ស គឺត្រូវស្មោះត្រង់ជាមួយបក្ស មិនមែនថាយើងចូលជាសមាជិកបក្សប្រជាជនកម្ពុជាហើយ យើងទៅចូលជាសមាជិកបក្សផ្សេងនោះទេ, ជាសមាជិកបក្ស ក៏ត្រូវមានអត្តចរិតល្អផងដែរ។ អ្វីដែលពិសេសទៅទៀតនោះ គឺត្រូវមានសាមគ្គីភាពផ្ទៃក្នុង ដែលការសាមគ្គីភាពផ្ទៃក្នុងល្អនេះហើយ គឺជាចំណុចខ្លាំងរបស់គណបក្សប្រជាជនកម្ពុជា។

ជាចុងក្រោយឯកឧត្តម សាន វណ្ណេត បានបញ្ជាក់ជូនជាថ្មី ដល់សមាជិក សមាជិកាថ្មី អំពីសមិទ្ធផលដែលគណបក្សប្រជាជនកម្ពុជា បានធ្វើ និងកំពុងបន្តធ្វើ ក្នុងរយៈពេលជិត ៤ទសវត្សរ៍កន្លងមកនេះ កម្ពុជា សម្រេចបាននូវសុខសន្តិភាពពេញលេញបរិបូរណ៍ ពង្រឹងបានធ្លុងសាមគ្គីភាពជាតិ រក្សាបានស្ថិរភាពនយោបាយ ដែលជាសមិទ្ធផលដ៏ធំធេង សម្រាប់ប្រជាជាតិកម្ពុជាទាំងមូល និងជាមូលដ្ឋានមិនអាចខ្វះបាន ក្នុងការពន្លឿនការអភិវឌ្ឍប្រទេសជាតិ ប្រកបដោយនិរន្តភាព មិនថាស្ថិតក្នុងកាលៈទេសៈ និងស្ថានភាពបែបណាទេ គណបក្សប្រជាជនកម្ពុជា តែងតែប្តេជ្ញាថែរក្សាឱ្យខាងតែបាន នូវសុខសន្តិភាពជូនប្រជាពលរដ្ឋកម្ពុជា ជាពិសេស ក្នុងកិច្ចខិតខំប្រឹងប្រែងទប់ស្កាត់ និងដោះស្រាយនូវរាល់បញ្ហាប្រឈមនានា ដែលបង្កឡើងដោយជំងឺកូវីដ-១៩។ ឯកឧត្តម បានណែនាំជាថ្មីទៀតដល់សមាជិក សមាជិកាទាំងអស់ ដែលមានឈ្មោះក្នុងបញ្ជីឈ្មោះបោះឆ្នោត សូមត្រៀមឯកសារអត្តសញ្ញាណបណ្ណឱ្យបានគ្រប់ៗគ្នា ហើយបើមិនមានឯកសារនេះទេ អាចស្នើសុំឯកសារបញ្ជាក់អត្តសញ្ញាណ ដើម្បីបំរើឱ្យការបោះឆ្នោតឃុំ-សង្កាត់ និងអញ្ជើញទៅបោះឆ្នោតឱ្យបានគ្រប់ៗគ្នា នាថ្ងៃទី៥ ខែមិថុនា ឆ្នាំ២០២២ ៕​ អត្ថបទ ៖ រដ្ឋា