ស្ទឹងត្រែង៖ កាលពីថ្ងៃទី ១៨ ខែឧសភា ឆ្នាំ២០២២ ឯកឧត្តម ស៊ុយ សែម រដ្ឋមន្រ្តីក្រសួងរ៉ែនិងថាមពល បានអញ្ជើញជាអធិបតីក្នុងពិធីប្រកាសចូលកាន់មុខតំណែងប្រធានមន្ទីររ៉ែ និងថាមពលខេត្ត ស្ទឹងត្រែងថ្មី គឹលោកស្រី ញ៉ែម សុម៉ាលី ជំនួសលោក នូ សុវណ្ណតារ៉ា អតីតប្រធានមន្ទីររ៉ែ និងថាមពល ដែលបានទទួលមរណភាព។

ឯកឧត្តម ស៊ុយ សែម រដ្ឋមន្រ្តីក្រសួងរ៉ែនិងថាមពល បានមានប្រសាសន៍ថា ការ​តែតាំង​ឬចូលកាន់​មុខតំណែង​របស់ប្រធានមន្ទីររ៉ែ និងថាមពលថ្មី របស់ខេត្តស្ទឹងត្រែងនាពេលនេះ មិនមែនធ្វើឡើង​ដោយ​តាមរយៈខ្សែស្រឡាយ ឬបក្សនិយមនោះឡើយ។ការតែងតាំង​ប្រធានមន្ទីរថ្មីធ្វើឡើង​ដោយ​មានការវាយតម្លៃ​សមត្ថភាពការងារពីថ្នាក់ ​ដឹកនាំខេត្ត និងក្រសួងរ៉ែនិងថាមពលជាមុន។

ឯករដ្ឋមន្រ្តី បន្តថា តាមរយៈការតែងតាំស្ត្រីជាប្រធានមន្ទីរនេះ ​សរបញ្ជាក់ឱ្យឃើញនូវការលើក ទឹកចិត្តដល់ស្ត្រីក្នុងការចូលរួមក្នុងតួនាទីជាអ្នកដឹកនាំ និងការសម្រេចចិត្ត​ស្របតាមមុំទី៤ នៃគោល​នយោបាយយុទ្ធសាស្ត្រចតុកោណដំណាក់កាលទី៤​ របស់រាជរដ្ឋាភិបាល ស្តីពីការពង្រឹង​សមភាព​យេនឌ័រ ​និងការគាំពារសង្គម ​ជាពិសេសការពង្រឹងតួនាទីស្ត្រីក្នុងភាពជាអ្នកដឹកនាំ ​និងការ អភិវឌ្ឍ​ប្រកបដោយចីរភាព។

ឯកឧត្តមរដ្ឋមន្ត្រីក្រសួងរ៉ែនិងថាមពលសង្ឃឹមយ៉ាងមុតមាំថា ​លោកស្រីប្រធានមន្ទីររ៉ែ និង ថាមពលខេត្តស្ទឹងត្រែង ​ដែលទើបទទួលបានការតែងតាំងថ្មី នឹងខិតខំយកចិត្តទុកដាក់​បំពេញ​ការងារ​ស្របតាមតួនាទីភារកិច្ច ​របស់ខ្លួនឲ្យទទួលបានជោគជ័យ ដើម្បីចូលរួមធ្វើឲ្យសម្រេច​នូវគោល​នយោបាយយុទ្ធសាស្ត្រចតុកោណដំណាក់​ កាលទី៤ របស់រាជរដ្ឋាភិបាល​ នីតិកាលទី៦ របស់រដ្ឋសភាព្រមទាំងចក្ខុវិស័យ និងគោលដៅនៃការអភិវឌ្ឍវិស័យរ៉ែ និងថាមពលរបស់ក្រសួងរ៉ែ និងថាមពល និងគោលដៅអភិវឌ្ឍន៍ខេត្តស្ទឹងត្រែង ជាក់ជាពុំខាន។

ជាមួយគ្នានេះ ឯកឧត្តម អភិបាលខេត្តស្ទឹងត្រែង ដែលបានចូលរួមក្នុងពិធីតែងតាំងនេះ បាន​វាយតម្លៃខ្ពស់ចំពោះលោកស្រី ញ៉ែម សុម៉ាលី ដែលបានបម្រើការងារនៅក្នុងមន្ទីររ៉ែ និង ថាមពលខេត្តស្ទឹងត្រែង ​អស់ជាច្រើនឆ្នាំកន្លងមក ចាប់តាំងពីការបង្កើតមន្ទីរដំបូងដែលមាន​ចំនួន​មន្ត្រី តិចតួច និងជួបការលំបាកជាច្រើន​ ដោយលោកស្រី បានខិតខំប្រឹងប្រែងយកអស់កម្លាំង​កាយចិត្ត ប្រាជ្ញាស្មារតី និងការទទួលខុសត្រូវលើការអនុវត្តតួនាទីភារកិច្ចរបស់ខ្លួន៕ អត្ថបទ៖ មាស ផល្លា