ភ្នំពេញ៖ លោក ហួត ហៃ អភិបាលរងរាជធានីភ្នំពេញ តំណាងអភិបាលរាជធានីភ្នំពេញ បាននាំយកគ្រឿងឧបភោគបរិភោគ អំណោយសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្តល់ជូនទៅដល់កម្មករប្រមូលសំរាមជិត២០០០នាក់ នៅក្នុងរាជធានី ដើម្បីទុកដោះស្រាយជីវភាពរស់នៅប្រចាំថ្ងៃ ។

ពិធីផ្តល់គ្រឿងឧបភោគបរិភោគនេះ ធ្វើឡើងនៅថ្ងៃទី១៩ ខែឧសភា ឆ្នាំ២០២២ តាមទីតាំងរបស់ក្រុមនីមួយៗ រួមមាន ក្រុមហ៊ុន Mizuda Group Co.,Ltd ចំនួន ៦៩១នាក់ និងក្រុមហ៊ុន Cintri (Cambodia) ចំនួន ៥២១នាក់ ដែលមានស្នាក់ការ នៅខណ្ឌដង្កោ និងក្រុមហ៊ុន 800 SUPER/GAEA ចំនួន ៦៤៤នាក់ មានស្នាក់ការនៅខណ្ឌព្រែកព្នៅ ។

លោក ហួត ហៃ បានលើកឡើងថា សកម្មភាពចុះសាកសួរសុខទុក្ខចែកអំណោយដល់កម្មករនេះ គឺធ្វើឡើងដោយមានការគិតគូរ និងជាការអនុវត្តន៍តាមអនុសាសន៍ដ៏ខ្ពង់ខ្ពស់របស់សម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត។ ដែលជាទឹកចិត្តដ៏ប្រពៃថ្លៃថ្លារបស់ថ្នាក់ដឹកនាំ ចំពោះបងប្អូនកម្មករដែលបម្រើការងារក្នុងការប្រមូលសំរាមបានទាន់ពេលវេលាក្នុងរាជធានី ដោយមានភាពល្អប្រសើរ ប្រកបដោយបរិស្ថានល្អ ។

អំណោយនេះ និងបានជួយដោះស្រាយចែករំលែកការលំបាកបានមួយគ្រាផងដែរ នៅពេលបងប្អូនកម្មករជួបការខ្វះខាតផ្នែកជីវភាពរស់នៅប្រចាំថ្ងៃ។

លោក ហួត ហៃ ក៏បានណែនាំដល់កម្មករទាំងអស់ ដែលមានឈ្មោះនៅក្នុងបញ្ជីបោះឆ្នោត ត្រូវត្រៀមអត្តសញ្ញាណប័ណ្ណខ្មែរ ឬលិខិតបញ្ជាក់មួយចំនួននៅពេលដែលទៅបោះឆ្នោត ហើយបើបាត់អត្តសញ្ញាណប័ណ្ណ ឬឯកសារបញ្ជាក់ សូមទៅសាលាឃុំ ឬសង្កាត់ ដើម្បីសុំការបញ្ជាក់ ពីអាជ្ញាធមូលដ្ឋាន ទើបអាចចូលរួមបោះឆ្នោតបាន។

សូមបញ្ជាក់ថា រដ្ឋបាលរាជធានីភ្នំពេញ បច្ចុប្បន្ននេះបានសម្រេចឱ្យក្រុមហ៊ុនចំនួន៣ ដើម្បីប្រតិបត្តិការ លើការប្រមូល និងដឹកជញ្ជូនសំរាម នៅក្នុងរាជធានីភ្នំពេញ ។ ក្រុមហ៊ុនទាំង៣នោះ រួមមានក្រុមហ៊ុន ស៊ិនទ្រី ក្រុមហ៊ុន 800 ស៊ុបពើ និងក្រុមហ៊ុន មីហ្សូដា៕