​បាល់ទាត់៖ ​ក្រុមបាល់ទាត់ Everton បានបញ្ចប់​ការភ័យខ្លាច​ក្នុង​រដូវ​កាល​ដ៏​អាក្រក់​របស់ខ្លួន​ ក្រោយ​វាយបក​ពីក្រោយ ២​គ្រាប់រហូត​យកឈ្នះ Crystal Palace ៣-២ វិញ​ធានាបាន​កៅអី​នៅ​ក្របខណ្ឌ​កំពូល English Premier League រដូវ​កាល​ក្រោយ​។

​​Everton ដែល​ដឹកនាំ​ដោយ Frank Lampard នឹង​បន្ត​រក្សាខ្លួន​នៅ​ក្របខណ្ឌ​កំពូល​អង់គ្លេស​ក្នុង​រដូវ​កាល​ទី៦៨ របស់ខ្លួន​ទៀត តែ​ក៏ត្រូវ​ក្រុម​ភ្ញៀវ​បំភ័យ​ដែរ​បន្ទាប់ពី Jean-Philippe Mateta និង Jordan Ayew ស៊ុត​បាន​ម្នាក់​ ១គ្រា​ប់​ឱ្យ Crystal Palace នាំមុខ​មុន ២គ្រាប់​ក្នុង​វគ្គ​ទី១​។ ​​តែ​វគ្គ​ទី២ ក្រោយ​លេង​បាន ៩នាទី​ខ្សែការពារ Michael Keane ក៏​តប​បាន​មួយ​គ្រាប់​វិញ​នៅ​នាទី​ទី៥៤ មុនពេល​ដែល Richarlison តាម​ស្មើ ២-២ នៅ​នាទី​ទី៧៥​។ ​​មិនត្រូវ​តែ​តាម​ស្មើ ខ្សែប្រយុទ្ធ​អង់គ្លេស Dominic Calvert-Lewin គឺជា​អ្នក​តែ​ត​សំរេច​គ្រាប់​បាល់​ជ័យជំនះ​ឱ្យ Everton ទទួលបាន​ ៣ពិន្ទុ​ដ៏​មាន​សារសំខាន់​លើស​អ្វីៗ​ទាំងអស់​ ក្នុងការ​រក្សាខ្លួន​នៅ​ក្របខណ្ឌ​កំពូល​រដូវ​កាល​ក្រោយ​។

​​សូម្បីតែ​អ្នកគាំទ្រ​ក៏​មិនអាច​ទប់​អារម្មណ៍​ត្រេកអរ​បាន និង​សប្បាយចិត្ត​ដូច​ឈ្នះ​ពាន ដោយ​នាំគ្នា​រត់​ចូល​ទីលាន​អបអរ​ជ័យជំនះ​ជាមួយ​កីឡាករ​។ ​ទិដ្ឋភាព​នេះ​ក៏បាន​ធ្វើឱ្យ Everton នឹកឃើញ​ពី​អតីតកាលដែល​ធ្លាប់​ប្រហោង​ពោះ​ប៊ិះ​ធ្លាក់​ទៅ​ក្របខណ្ឌ​ទី២ ពីរលើក​នៅ​ឆ្នាំ១៩៩៤ និង ១៩៩៨​។ ​​Everton ក៏​សង្ឃឹមថា​នឹងមិន​មានរឿង​នេះ​កើតឡើង​ម្តងទៀត​ដែរ បន្ទាប់ពី​ការវិនិយោគ​លើ​ការ​ទិញដូរ​កីឡាករ និង​ផ្លាស់​ទៅកាន់​កីឡដ្ឋាន​ថ្មី​នៅ​ឆ្នាំ២០២៤​។ ​​ដោយឡែក​លទ្ធផល​ផ្សេងទៀត​យប់មិញ Chelsea ១-១ Leicester City នៅ Stamford Bridge និង Burnley ស្មើ​នៅ​ទឹកដី Aston Villa មានន័យថា Leeds ធ្លាក់​ទៅ​ឈរ​តំបន់​គ្រោះថ្នាក់​រង់ចាំ​ប្រកួត​ចុងក្រោយ​ថ្ងៃអាទិត្យ​នេះ ដើម្បី​អ៊ុត​រវាង Leeds រឺ Burnley ដែល​ត្រូវ​កាត់ចោល​ទៅ​ក្របខណ្ឌ League Championship៕

​អត្ថបទ​៖​នាង សុភា​វុ​ធ