​បាល់ទាត់៖ ​ក្រុមបាល់ទាត់​វៀតណាម និង​ថៃ​សុទ្ធតែ​បាន​យកឈ្នះ​គូប្រកួត​នៅ​វគ្គ​ពាក់កណ្តាល​ផ្តាច់ព្រ័ត្រ ​នៅ​ម៉ោង​បន្ថែម​កាត់សេចក្តី ១៥​នាទី​ពីរដង​ដូចគ្នា ដែល​មានន័យថា​ក្រុម​ទាំងពីរ​នឹង​ជួបគ្នា​ដណ្តើម​មេដាយមាស​ជា​លើក​ទី៦ ក្នុង​ប្រវត្តិសាស្ត្រ​ស៊ី​ហ្គេម​។

​​វៀតណាម និង​ម៉ាឡេស៊ី​សុទ្ធតែ​ចង់ឱ្យ​ការប្រកួត​បញ្ចប់​ត្រឹម ៩០​នាទី​តែ​មិនដូច​បំណង​ទេ បើទោះជា​ម្ចាស់ផ្ទះ​វៀត​ណាម​មានឱកាស​ជាច្រើន​លើ​ម៉ាឡេស៊ី​ក៏ដោយ ស្របពេល​ម៉ាឡេស៊ី​ក៏​ពិបាក​នៅ​ចំពោះ​មុខ​ខ្សែការពារ​វៀតណាម​ដែរ​។ ​អ្វី​ត្រូវ​សំរេច​ត្រឹម​ម៉ោង​បន្ថែម ១៥​នាទី​លើក​ទី​២ ពោលគឺ​នាទី​ទី១១១ ​គ្រាប់​បាល់​តែ​ត​បញ្ចូល​ទី​របស់​ខ្សែប្រយុទ្ធ Becamex Binh Doung, Nguyen Tien Linh បានធ្វើឱ្យ​វៀតណាម​យកឈ្នះ​ម៉ាឡេស៊ី​យ៉ាង​តានតឹង ១-០ ដើម្បី​ឡើង​វគ្គ​ផ្តាច់ព្រ័ត្រ​ស៊ី​ហ្គេម​លើក​ទី៨​។ ​​ចំណែក​ថៃ​ម្សិលមិញ​នេះដែរ​បាន​យកឈ្នះ​ឥណ្ឌូនេស៊ី​យ៉ាង​តានតឹង​ផងដែរ ១-០ នៅ​ម៉ោង​បន្ថែម ១៥នាទី​ពីរដង​។ ​​ខ្សែបម្រើ​របស់​ក្លិប​ Muanthong United, Weerathep Pomphan គឺជា​អ្នក​រកបាន​គ្រាប់​ជ័យជំនះ​នៅ​នាទី​ទី៩៥ នៃ​ម៉ោង​បន្ថែម ១៥នាទី ទី១​។

​​ជ័យជំនះ​នេះ​ធ្វើឱ្យ​ថៃ​ឡើង​វគ្គ​ផ្តាច់ព្រ័ត្រ​កីឡា​ក្នុង​តំបន់​នេះ​ជា​លើក​ទី២១ ក្នុង​ប្រវត្តិសាស្ត្រ​។ ​​ថៃ និង​វៀតណាម​​នឹង​ជួបគ្នា​នៅ​វគ្គ​ផ្តាច់ព្រ័ត្រ​ដណ្តើម​មេដាយមាស​ជា​លើក​ទី៦​។​ ​​ស៊ី​ហ្គេម​ដំបូង​នៅ​ឆ្នាំ១៩៥៩ ដោយ​នៅពេលនោះ​ហៅថា Southeast Asian Peninsular Games វៀតណាម​ខាងត្បូង​យកឈ្នះ​ថៃ​នៅ​វគ្គ​ផ្តាច់ព្រ័ត្រ​ដណ្តើម​មេដាយមាស ក្រោយមក​ចាប់ពី​ឆ្នាំ១៩៧៧ ហៅថា Southeast Asian Games រឺ​ស៊ី​ហ្គេម​ថៃ​ជួប​វៀតណាម​ពីរលើក​នៅ​ឆ្នាំ១៩៩៥ និង ១៩៩៩ ថៃ​យកឈ្នះ​ទាំង​ពីរលើក​។​ ​​ចាប់ពី​ឆ្នាំ២០០១ មក​ស៊ី​ហ្គេម​វិញ្ញាសា​បាល់ទាត់​ត្រូវ​កំណត់​ក្រុម​អាយុ​ក្រោម ២៣ឆ្នាំ​ដោយ​ថៃ​បន្ត​យកឈ្នះ​វៀតណាម​នៅ​វគ្គ​ផ្តាច់ព្រ័ត្រ​ទាំងពីរ​លើក​ទៀត​៕

​អត្ថបទ​៖​នាង សុភា​វុ​ធ