​​ស្នូកឃ័រ​៖ ជើងឯក​ស្នូកឃ័រ​ពិភពលោក ៦​សម័យ Ronnie O'Sullivan បាន​យកឈ្នះ​កីឡាករ​ស្កុ​ត​ឡេ​ន John Higgins ដើម្បី​កក់​កៅអី​នៅ​វគ្គ​ពាក់កណ្តាល​ផ្តាច់ព្រ័ត្រ​មុនគេ​ នៃ​ព្រឹត្តិការណ៍ Tour Championship​។ ​ការប្រកួត​នៅ Celtic Manor Resort ប្រទេស​វែ​ល O'Sullivan ដែល​ចាញ់ Higgins នៅ Players Championship កាលពី​ខែ​មុន​នោះ ក៏​សងសឹក​បានសំរេច​វិញ​ក្នុង​លទ្ធផល ១០-៨ហ្វ្រេ​ម​ម​។​

O'Sullivan ចាប់ផ្តើម​ដោយ​នាំមុខ​ក្នុងដំណាក់កាល​ដំបូង ៥-៣ហ្វ្រេ​ម មុនពេល​ដែល​ឈា​ន​ដល់​ដំណាក់កាល​ទី២ ក្រោយ​សម្រាក Higgins នៅតែ​បន្ត​ដេញ​ពីក្រោយ ២ហ្វ្រេ​ម​ដដែល​ក្នុង​លទ្ធផល ៧-៥ហ្វ្រេ​ម​។​ ​ក្រោយមក Higgins ក៏បាន​យកឈ្នះ​បាន​ ១ហ្វ្រេ​ម មុនពេល​ដែល O'Sullivan ធ្វើបាន Century Break លើក​ទី ១១០០ ក្នុង​អាជីព និង​បន្ត​យកឈ្នះ​ហ្វ្រេ​ម​បន្តបន្ទាប់​ក្នុង​លទ្ធផល​ចុងក្រោយ ១០-៨ហ្វ្រេ​ម​។​

​ការប្រកួត Tour Championship នឹង​បន្ត​នៅ​ថ្ងៃ​អង្គារ​នេះ​ដោយ​រួមមាន Neil Robertson ជួប Jack Lisowski, Mark Selby ជួប Kyron Wilson និង Judd Trump ជួប Barry Hawkins​។​ សូម​បញ្ជាក់ថា ការប្រកួត​ស្នូកឃ័រ Tour Championship ជាការ​ប្រកួត​ដែលមាន​កីឡាករ​ចូលរួម​តែ ៨នាក់​ប៉ុណ្ណោះ ដែលមាន​ចំណាត់ថ្នាក់​ពិភពលោក​កំពូល​ទាំង ៨នាក់​៕

​អត្ថបទ​៖​នាង សុភា​វុ​ធ