ភ្នំពេញ៖ ការចូលរួមបោះឆ្នោត ជាកាតព្វកិច្ចសំខាន់សម្រាប់មនុស្សគ្រប់រូប ដែលមានអាយុចាប់ពី ១៨ឆ្នាំឡើងទៅ។នេះជាការលើកឡើងរបស់ យុវជន ខណៈពេលដែលការឃោសនាបោះឆ្នោត នឹងចាប់ផ្ដើមក្នុងរយៈពេល ១ថ្ងៃខាងមុខទៀត។

ការបោះឆ្នោតជ្រើសរើសក្រុមប្រឹក្សាឃុំ-សង្កាត់កាន់តែខិតចូលមកដល់ រីឯការឃោសនាបោះឆ្នោតក៏នឹងចាប់ផ្ដើមនៅថ្ងៃទី២១ ខែឧសភា ស្អែកនេះ។

សម្រាប់យុវជន ក៏មានការស្វែងយល់ច្បាស់ ពីសារៈសំខាន់នៃការបោះឆ្នោត និងការបំពេញកាតព្វកិច្ចរបស់ខ្លួនដែលមានអាយុគ្រប់បោះឆ្នោត។

ពាក់ព័ន្ធនឹងការចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់ ថ្ងៃទី៥ មិថុនា ខាងមុខ យុវតី ណុប ស្រីនីត និងយុវជន ឡាយ សំអាង រស់នៅក្នុងខណ្ឌដង្កោ ដែលត្រូវចូលរួមការបោះឆ្នោត​ជា​លើកទី១​របស់ខ្លួនលើកឡើងថា ​សន្លឹកឆ្នោត១សន្លឹករបស់ខ្លួន គឺមានសារៈសំខាន់ណាស់ក្នុងការ​កំណត់​ជោគវាសនា ​ការរីកចំរើន។

ភាពសំខាន់នេះ ទើបពួកគាត់បានត្រៀមខ្លួន ដោយបានពិនិត្យឈ្មោះក្នុងបញ្ជីបោះឆ្នោតរួចរាល់ និង​មានគោលដៅច្បាស់លាស់ក្នុងការជ្រើសរើសថ្នាក់ដឹកនាំ ក៏ដូចជាគណបក្សដែលមានការគិតគូរ​ពីប្រជាពលរដ្ឋគ្រប់កាលទេសៈ​ មានគោលដៅអភិវឌ្ឍន៍ និងការថែរក្សាសុខសន្តិភាព។

សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ ​គឺនឹងប្រព្រឹត្តិទៅនៅថ្ងៃទី៥ ខែមិថុនា ឆ្នាំ ២០២២ដោយចាប់ផ្ដើមនៅ ៧.00ព្រឹក រហូតដល់ម៉ោង ៣.០០ រសៀល។ ចំពោះការ​ហែក្បួន​ឃោសនា​បោះឆ្នោត គឺចាប់ផ្ដើមនៅថ្ងៃទី ២១ ខែឧសភា រហូតដល់ថ្ងៃទី ៣ខែ មិថុនា។

គណៈកម្មាធិការជាតិរៀបចំការបោះឆ្នោត បញ្ជាក់ដែរថា ការបោះឆ្នោតនាពេលខាងមុខ គឺមានសារៈសំខាន់មួយចំនួនដូចជា ជ្រើសរើសក្រុមប្រឹក្សាឃុំសង្កាត់ ដែលយើងពេញចិត្ត និងស្របតាមឆន្ទៈរបស់យើង ក្រុមប្រឹក្សាឃុំសង្កាត់ ​កើតចេញពីការគាំទ្ររបស់ប្រជាពលរដ្ឋ និងក្រុមប្រឹក្សាឃុំ ​សង្កាត់ដែលបំពេញភារកិច្ចដោយការទទួលការខុសត្រូវ និងមាន​គណនេយ្យភាព​ចំពោះប្រជាពលរដ្ឋ។ ចំពោះគោលការណ៍សំខាន់សម្រាប់ការបោះឆ្នោតនេះ គជប បញ្ជាក់ដែរថា ការបោះឆ្នោតគឺធ្វើឡើងដោយសម្ងាត់ បោះឆ្នោតតាមឆន្ទៈ និងបោះឆ្នោតដោយសេរី៕ អត្ថបទ៖ គឹមហុក