​អ៊ុយ​ក្រែ​ន៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​ថ្លែងអំណរគុណ​ដល់​សហរ​ដ្ឋ​អាមេរិក បន្ទាប់ពី​ព្រឹទ្ធសភា​អាមេរិក​បាន​អនុម័ត​កញ្ចប់​ជំនួយ​ធំ​ចំនួន ​40​ពាន់​លាន​ដុល្លារ​ដល់​ប្រទេសអ៊ុយ​ក្រែ​ន​។ លោក Zelenskyy បាន​និយាយ​នៅ​ក្នុង​សុន្ទរកថា​របស់​លោក​ដែល​បាន​ចេញ​ផ្សាយ​ភ្លាមៗ​ បន្ទាប់​ពី​ការបោះឆ្នោត​ព្រឹទ្ធសភា​ថា​ វា​គឺជា​ការ​បង្ហាញ​ពី​ភាពជា​អ្នកដឹកនាំ​ដ៏​រឹងមាំ និង​ការរួមចំណែក​ចាំបាច់ដល់​ការការពារ​សេរីភាព​រួម​របស់​យើង​។

ព្រឹទ្ធសភា​សហរដ្ឋអាមេរិកបានអនុម័ត​យ៉ាង​លើសលប់​នូវ​ការផ្តល់​ជំនួយ​ផ្នែក​យោធា និង​សេដ្ឋកិច្ច​ចំនួន​ 40​ពាន់​លាន​ដុល្លារ​សម្រាប់អ៊ុយ​ក្រែ​ន និង​សម្ព័ន្ធមិត្ត​របស់ខ្លួន​កាលពី​ថ្ងៃ​ព្រហស្បតិ៍​។ ​បន្ថែម​លើ​ជំនួយ​នេះ សហរដ្ឋអាមេរិក​បាន​ប្រកាស​ពី​ការបញ្ជូន​ជំនួយ​យោធា​ចំនួន 100លាន​ដុល្លារទៅកាន់​ប្រទេស​អ៊ុយ​ក្រែ​ន ដាច់ដោយឡែក​ពីអ្វី​ដែល​ចេញ​មកពី​ជំនួយ​ 40​ពាន់​លាន​ដុល្លារដែល​ត្រូវបានអនុម័ត​។ អ្នកនាំពាក្យ​មន្ទីរ​បញ្ច​កោណលោក John Kirby បាន​និយាយ​ថា សម្ភារនឹង​ស្ថិតនៅក្នុង​ដៃ​របស់កងកម្លាំង​អ៊ុយ​ក្រែ​ន​ក្នុងពេល​ឆាប់ៗ​នេះ​។​ ​ជាមួយនឹង​ការដឹកជញ្ជូន​ថ្មី​នេះ សហរដ្ឋ​អាមេរិក​បាន​ផ្តល់ជំនួយ​យោធា​ជិត ​4​ពាន់​លាន​ដុល្លារ​ចាប់តាំងពី​ថ្ងៃទី24 ខែកុម្ភៈ និង ​6.6ពាន់​លាន​ដុល្លារ​ចាប់តាំងពី​ឆ្នាំ2014 នៅពេលដែល​រុស្ស៊ី​បានដណ្តើម និង​ដាក់បញ្ចូល​ជា​ឧបសម្ព័ន្ធ​ឧបទ្វីប​គ្រី​មៀ​របស់​អ៊ុយ​ក្រែ​ន​។

លោក Kirby បាន​និយាយថា សហរដ្ឋអាមេរិក​នឹង​ពិភាក្សា​ជាមួយ​អ៊ុយ​ក្រែ​ន ដូចដែល​មាន​ជា​ញឹកញាប់​ចាប់តាំងពី​ការវាយលុក អំពីអ្វីដែល​ខ្លួន​ត្រូវការ​ទាក់ទង​នឹង​ឧបករណ៍​។​ ​លោក Kirby ក៏បាន​ទទួល​សំនួរ​ដែល​ចោទសួរ​អំពី​ការព្រួយបារម្ភ​ផ្នែក​សន្តិសុខ​ ជុំវិញ​ការបើក​ស្ថានទូត​សហរដ្ឋអាមេរិក​ឡើងវិញ​នៅក្នុង​ទីក្រុង​គី​វ​។ លោក​និយាយថា យើង​រីក​រាយ​ដែល​ឃើញការចាប់ផ្តើមប្រតិបត្តិការ​ឡើងវិញ​នៅក្នុង​ទីក្រុង​គី​វ​។ យើង​យល់ស្រប​ជាមួយ​ពួកគេ​ថា នោះ​ជាការផ្លាស់ប្តូរដ៏​សំខាន់ ហើយ​ប្រសិនបើ​មាន​អ្វីមួយ​ដែល​ក្រសួងការពារជាតិ​អាមេរិក ​អាចធ្វើ​ដើម្បី​ជួយ​ពួកគេក្នុងការងារការទូត យើង​នឹងមាន​ការសន្ទនា​ជាមួយ​ពួកគេ៕

អត្ថបទ៖ ប៊ុនថន