ភ្នំពេញ៖ នៅក្នុងអំឡុងពេលនេះ បណ្តាអាជ្ញាធរមូលដ្ឋាននៅតាមឃុំសង្កាត់ បាននឹងកំពុងពន្លឿន​និង​ចុះផ្សព្វផ្សាយនៅតាមខ្នងផ្ទះ ជាពិសេសគឺកំពុងចុះជម្រាបពលរដ្ឋដែលបានខូច ឬគ្មាន ឬបាត់​អត្តសញ្ញាណប័ណ្ណ​សញ្ជាតិខ្មែរប្រភេទថ្មីនៅតាមខ្នងផ្ទះ ត្រូវទៅធ្វើឯកសារបញ្ជាក់​អត្តសញ្ញាណប័ណ្ណ​បម្រើឲ្យការបោះឆ្នោត ឬហៅថា ប័ណ្ណ ឯ.អ ដើម្បីយកទៅប្រើប្រាស់​ទទួលបានសិទ្ធបោះឆ្នោត ​ជ្រើសរើសក្រុមប្រឹក្សាឃុំសង្កាត់អណត្តិទី៥ ​នៅថ្ងៃទី៥ ខែមិថុនានេះ។

បើតាមចៅសង្កាត់ព្រែកកំពឹសនៅរាជធានីភ្នំពេញ និងមេភូមិនានា នៅនៅក្រុងតាខ្មៅ ​ខេត្តកណ្តាល បានថ្លែងប្រាប់BTV នៅថ្ងៃទី២០​ ខែឧសភានេះថា នៅក្នុងអំឡុងពេល គណៈកម្មាធិការជាតិរៀប​ចំការ​បោះឆ្នោត (គ.ជ.ប) បាន​បិទផ្សាយ​បញ្ជីឈ្មោះបោះឆ្នោតជ្រើសរើស​ក្រុមប្រឹក្សាឃុំសង្កាត់​អាណត្តិទី៥ ​នៅតាមឃុំសង្កាត់​ បានរកឃើញថា មានពលរដ្ឋមួយចំនួនតូចមានឈ្មោះបោះឆ្នោត​ខណៈពួកគេកំពុងគ្មាន ​ឬបាត់អត្តសញ្ញាណប័ណ្ណសញ្ជាតិខ្មែរប្រភេទថ្មី ​មិនអាចចូលរួមបោះឆ្នោត ហើយពលរដ្ឋនោះត្រូវតម្រូវអោយធ្វើឯកសារបញ្ជាក់អត្តសញ្ញាណប័ណ្ណបម្រើឲ្យការបោះឆ្នោត ឬហៅថា ប័ណ្ណ ឯ.អ មួយផ្សេង ដើម្បីទទួលបានសិទ្ធបោះឆ្នោត ដូចអ្នកមានអត្តសញ្ញាណប័ណ្ណ។

សម្រាប់បញ្ហានេះ បើតាមការអះអាងពីចៅសង្កាត់ព្រែកកំពឹសនៅរាជធានីភ្នំពេញ និងមន្ត្រី​ភូមិឃុំ​នានា​នៅខេត្តកណ្តាល គឺបាន​នឹងកំពុងសម្រួលធ្វើឯកសារបញ្ជាក់អត្តសញ្ញាណប័ណ្ណ​បម្រើ​ឲ្យការបោះឆ្នោត (ឯ.អ) ហើយនិងបន្តចុះតាមខ្នងផ្ទះណែនាំអោយពលរដ្ឋទៅ​ធ្វើឯកសារសំខាន់នេះ ខណៈការផុតកំណត់ឈប់ធ្វើនៅថ្ងៃទី៣ ខែមិថុនាខាងមុខនេះ។

បើតាម លោក លឹម សារិន ប្រធានការិយាល័យបោះឆ្នោតសង្កាត់ព្រែកកំពឹស រាជធានីភ្នំពេញ ថ្លែងថា ជាទូទៅគ្រប់ពលរដ្ឋដែលមានឈ្មោះ នៅក្នុងបញ្ជីឈ្មោះបោះឆ្នោត គឺអាចចូលរួមបោះឆ្នោត​បានលុះត្រាពលរដ្ឋនោះ ត្រូវមានអត្តសញ្ញាណប័ណ្ណសញ្ជាតិខ្មែរ មិនហួសសុពលភាពការប្រើប្រាស់ ប៉ុន្តែបើពលរដ្ឋគ្មានអត្តសញ្ញាប័ណ្ណនេះ គឺត្រូវទៅធ្វើឯកសារប័ណ្ណ ឯ.អ ហើយ ប័ណ្ណ ឯ.អដែលអាច​ប្រើប្រាស់​បោះឆ្នោតបាន ​លុះត្រាប័ណ្ណនោះមានការបោះត្រាពីមេឃុំសង្កាត់​ និងបោះត្រាពីគ.ជ.ប។

សូមបញ្ជាក់ថា ​ការធ្វើឯកសារបញ្ជាក់អត្តសញ្ញាណប័ណ្ណបម្រើឲ្យការបោះឆ្នោត ឬហៅថា ប័ណ្ណ ឯ.អ ដើម្បីយកទៅប្រើប្រាស់ទទួលបានសិទ្ធបោះឆ្នោតជ្រើសរើសក្រុមប្រឹក្សាឃុំសង្កាត់អណត្តិទី៥នេះ គឺបន្តធ្វើជូនពលរដ្ឋរហូតដល់ថ្ងៃទី៣ ខែមិថុនា ឆ្នាំ២០២២៕ អត្ថបទ ស៊ុម សុខជា