យោងតាមសំណើរបស់សាខាកាកបាទក្រហមកម្ពុជា ខេត្តស្ទឹងត្រែង ជាក់ស្តែងថ្ងៃទី២២ ខែតុលា ឆ្នាំ២០២៦នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បាន​ចាត់​តំណាងនាំយកអំណោយមនុស្សធម៌ជាស្បៀង និងសម្ភារៈមក​ចែក​ជូន​ដល់​ប្រជាជន​ងាយ​រង​គ្រោះ និងប្រជាជនរងផលប៉ះពាល់ដោយទឹកជំនន់ចំនួន ៨៨៣គ្រួសារ ក្នុងខេត្តស្ទឹងត្រែង។

ពិធីចែកអំណោយខាងលើប្រព្រឹត្តទៅក្រោមអធិបតីភាព ឯកឧត្តម យូ ឡាណា អគ្គ​លេខា​ធិការ​រង​ទី២ តំណាងដ៏ខ្ពង់ខ្ពស់របស់សម្តេចកិត្តិព្រឹទ្ធបណ្ឌិតប្រធានកាកបាទក្រហមកម្ពុជា និង ឯកឧត្តម សរ សុពុត្រា អភិបាលនៃគណៈអភិបាលខេត្ត និងជាប្រធាន គណៈ​កម្មាធិការ​សាខា​កាក​បាទ​ក្រហម​កម្ពុជា ខេត្តស្ទឹងត្រែង រួមជាមួយវត្តមានអម​ដំណើរ​ដោយ​សមាជិក​សមាជិកា​គណៈកម្មាធិការ​សាខា អនុសាខា ក្រុមប្រតិបត្តិសាខា មន្ត្រីថ្នាក់កណ្តាល ព្រមទាំងអ្នកស្ម័គ្រចិត្ត និងយុវជនកាកបាទក្រហមកម្ពុជា ជាច្រើនរូប។

សូមបញ្ជាក់ថា កម្មវិធីចែកអំណោយនេះធ្វើឡើងនៅទីតាំងចំនួន២ រួមមានទីតាំងទី១ ៖ នៅសាលាបឋមសិក្សាឬទ្ធីសែនជ័យ ឃុំអូរស្វាយ ស្រុកបុរីអូរស្វាយសែនជ័យ សម្រាប់ប្រជាជន ៣០០គ្រួសារ (ស្រុកបុរីអូរស្វាយសែនជ័យ ចំនួន ១១៣គ្រួសារ និងស្រុកសៀមប៉ាង ចំនួន ១៨៧គ្រួសារ)។ ទីតាំងទី២៖ នៅសាលាបឋមសិក្សាស្ទឹងត្រែងក្រុង សង្កាត់ស្ទឹងត្រែង ក្រុងស្ទឹងត្រែង សម្រាប់ប្រជាជន ៥៨៣គ្រួសារ (ស្រុកថាឡាបរិវ៉ាត់ ១៥៨គ្រួសារ សេសាន ១៤០គ្រួសារ សៀមបូក ១៥៣គ្រួសារ និងក្រុងស្ទឹងត្រែង ១៣២គ្រួសារ)។

អំណោយដែលផ្តល់ជូនទាំង៨៨៣គ្រួសារ ដោយក្នុងមួយគ្រួសារទទួលបាន៖ អង្ករ ៣០ គីឡូក្រាម,មី ១ កេស, ត្រីខ ១០កំប៉ុង, ទឹកត្រី ១ យួរ និងឃីត (សារុង ក្រមា មុង ភួយ) ១ ឃីត។ ជាមួយគ្នានេះ ក៏បានផ្តល់សាលារៀន២កន្លែងដោយក្នុងមួយកន្លែងៗទទួលបាន៖ សាប៊ួលាងដៃ ២កេស, ម្សៅសាប៊ួ ២កេស។ ឆ្លៀតក្នុងឱកាសនោះដែរក្រុមការងារក៏បាននាំយកទេយ្យវត្ថុរួមទាំងបច្ច័យមួយចំនួនសម្រាប់ប្រគេនវត្ត ប្រគេនព្រះគ្រូចៅអធិការវត្ត ប្រគេនព្រះសង្ឃ និងយាយជីតាជី ចំនួន២វត្ត រួមមាន៖ វត្តរដ្ឋជ័យធម្មារាម (វត្តដួងក្រចែម) ស្ថិតនៅឃុំអូរស្វាយ និងវត្តរុក្ខាសិលារាមព្រៃចាស់ សង្កាត់សាមគ្គី ក្រុងស្ទឹងត្រែងផងដែរ៕