បាល់ទាត់៖ ខ្សែប្រយុទ្ធរបស់ក្លិបបាល់ទាត់ FC Barcelona, Pierre-Emerick Aubameyang បានសំរេចចិត្តចូលនិវត្តន៍ពីក្រុមជំរើសជាតិហា្កបុងហើយ។ កីឡាករវ័យ ៣២ឆ្នាំរូបនេះបានបង្ហាញខ្លួនសរុបឱ្យក្រុមជំរើសជាតិហា្កបុងចំនួន ៦៨លើកស៊ុតបញ្ចូលទីបាន ២៩គ្រាប់ ជាកីឡាករដែលស៊ុតបញ្ចូលទីច្រើនជាងគេផងដែរឱ្យក្រុមជំរើសជាតិហ្កាបុង។
Aubameyang មានដើមកំណើតនៅទឹកដីបារាំង និងធ្លាប់បង្ហាញខ្លួនឱ្យក្រុមយុវជនអាយុក្រោម ២១ឆ្នាំបារាំងផងដែរ មុនពេលសំរេចចិត្តផ្លាស់ទៅប្រកួតតំណាងឱ្យក្រុមជំរើសជាតិហា្កបុង ដើរតាមលំនាំឪពុករបស់ខ្លួនដែលជាអតីតប្រធានក្រុមហ្កាបុង ដែលបង្ហាញខ្លួននៅព្រឹត្តិការណ៍បាល់ទាត់ជើងឯកទ្វីបអាហ្វ្រិក លើកដំបូងនៅឆ្នាំ១៩៩៦។ អតីតខ្សែប្រយូទ្ធ Dortmund និង Arsenal រូបនេះមិនសូវមានទំនាក់ទំនងល្អឡើយជាមួយសហព័ន្ធបាល់ទាត់ហ្កាបុង បន្ទាប់ពីសហព័ន្ធបានប្រកាសថា ឪពុករបស់ខ្លួននឹងដឹកនាំក្រុមជំរើសជាតិកាលពីឆ្នាំ២០១៨ ទាំងឪពុករបស់ខ្លួនមិនទាន់យល់ព្រមផង។
Aubameyang បានបង្ហាញខ្លួនដំបូងឱ្យហ្កាបុងនៅឆ្នាំ២០០៩ ស៊ុតបញ្ចូលទីពេលយកឈ្នះម៉ារ៉ុក ២-១ និងបង្ហាញខ្លួននៅព្រឹត្តិការណ៍បាល់ទាត់អាហ្វ្រិកសរុប ៤លើក។ ហ្កាបុងនឹងចាប់ផ្តើមប្រកួតជំរុះជើងឯកទ្វីបអាហ្វ្រិកឆ្នាំ២០២៣ នៅថ្ងៃទី៤ ខែមិថុនាខាងមុខនេះដោយនឹងត្រូវជួបជាមួយម្ចាស់ផ្ទះកូឌីវ័រ៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
