​អឺរ៉ុប៖ អាជ្ញាធរ​សុខាភិបាល​កំពុង​ប្រុងប្រយ័ត្ន​ចំពោះ​ការ​រាលដាល​ជំងឺ​អុត​ស្វា ជា​ជំងឺ​កម្រ​ដែល​ត្រូវ​បាន​រាយ​ការណ៍​ដំបូង​នៅ​ក្នុង​សាធារណរដ្ឋ​ប្រជាធិបតេយ្យ​កុង​ហ្គោ​ក្នុង​ទសវត្សរ៍​ឆ្នាំ​1970 បន្ទាប់ពី​ករណី​ថ្មី​បាន​លេចឡើង​នៅ​អឺរ៉ុប ហើយ​សហរដ្ឋអាមេរិក​បាន​បញ្ជាក់​ពី​ការ​ឆ្លង​ដំបូង​របស់​ខ្លួន​។

​

​ប្រទេស​ព័រ​ទុយ​ហ្គា​ល់​បាន​និយាយ​ថា ​ប្រទេស​នេះ​បាន​រក​ឃើញ​ករណី​ជំងឺ​អុត​ស្វា​ចំនួន 5ករណី, ប្រទេស​អេ​ស្ប៉ា​ញ​បាន​និយាយ​ថា ​ខ្លួន​កំពុង​ធ្វើតេស្ត​ករណី​ចំនួន 23​ករណី ហើយ​រដ្ឋ Massachusetts របស់​សហរដ្ឋអាមេរិក​បាន​ប្រកាស​ថា ​ខ្លួន​បាន​រក​ឃើញ​ 1​ករណី​នៅ​លើ​បុរស​ម្នាក់​ដែល​ថ្មីៗ​នេះ​បានធ្វើ​ដំណើរ​ទៅកាន់​ប្រទេស​កាណាដា​។​ ចក្រភព​អង់គ្លេស​ជា​ប្រទេស​ដំបូង​គេ​ ដែល​បញ្ជាក់​ពី​ករណី​កើត​ជំងឺ​អុត​ស្វា​កាលពី​ដើមខែ​នេះ​។ បច្ចុប្បន្ន​ប្រទេស​នេះ​បាន​រក​ឃើញ​ករណី​ជំងឺ​អុត​ស្វា​ចំនួន ​7​ករណី ហើយ​កំពុង​ធ្វើ​ការ​ជាមួយ​អង្គការ​សុខភាព​ពិភពលោក ​(WHO) ដើម្បី​ស៊ើបអង្កេត​ការ​រាល​ដាល​វីរុស ​បន្ទាប់ពី​មិន​អាច​មាន​ទំនាក់ទំនង​រវាង​ករណី​ដំបូង​ នៅ​លើ​បុរស​ម្នាក់​ដែល​បាន​ធ្វើ​ដំណើរ​មកពី​ប្រទេស​នី​ហ្សេ​រី​យ៉ា​។

​អាជ្ញាធរ​សុខាភិបាល​សង្ស័យ​ថា ​ករ​ណី​ឆ្លង​មួយ​ចំនួន​អាច​កើតឡើង​តាមរយៈ​ទំនាក់ទំនង​ផ្លូវ​ភេទ ក្នុង​ករណី​នេះ​គឺ​ស្ថិត​ក្នុង​ចំណោម​បុរស​ស្រឡាញ់​ភេទ​ដូចគ្នា ឬ​មនុស្ស​ភេទ​ទី​3 ដោយ​ករណី​ចំនួន​ 4 ​នៅ​ចក្រភព​អង់គ្លេស​ត្រូវ​បាន​កំណត់ ​ក្នុងចំណោម​មនុស្ស​ដែល​ទៅ​ពិនិត្យ​នៅ​គ្លីនិក​សុខភាព​ផ្លូវ​ភេទ បន្ទាប់​ពី​កើត​កន្ទួល​រលាក​ទាក់ទង​នឹង​ជំងឺ​អុត​ស្វា​។ ​អង្គការ​សុខភាព​ពិភពលោក (WHO) បាន​និយាយ​នៅក្នុង​សេចក្តីថ្លែងការណ៍​កាលពី​ថ្ងៃ​ពុធ​ថា នៅ​មិនទាន់មាន​ប្រភព​នៃ​ករណី​ឆ្លង​មេរោគ​ណាមួយ​ត្រូវបាន​បញ្ជាក់​ សម្រាប់​ទាំង​ក្រុមគ្រួសារ ឬ​ក្រុមបុរស​ស្រឡាញ់​ភេទ​ដូចគ្នា​នៅឡើយ​ទេ​។ វិសាលភាព​នៃ​ករណី​ឆ្លង​ក្នុង​តំបន់គឺ​មិន​ច្បាស់លាស់​នៅដំណាក់កាល​នេះ ហើយនឹង​មានលទ្ធភាព​នៃ​ការកំណត់​អត្តសញ្ញាណ​ករណី​ឆ្លង​នេះ​បន្ថែមទៀត​៕​

អត្ថបទ៖ ប៊ុនថន