មណ្ឌលគិរី៖ កាលពីថ្ងៃទី១៩ ខែឧសភា ឆ្នាំ២០២២នេះ ឯកឧត្តម អ៊ុយ សំអាត នាយក នាយកដ្ឋានគ្រប់គ្រងគ្រោះមហន្តរាយកាកបាទក្រហមកម្ពុជា បាននាំយកអំណោយមនុស្សធម៌របស់កាកបាទក្រហមកម្ពុជា ផ្តល់ជូនដល់ចាស់ជរា ស្ត្រីមេម៉ាយកូនច្រើន កុមារកំព្រា ជនពិការ ជនទីទ័លក្រចំនួន ១៩៥គ្រួសារ មកពីឃុំចំនួន ៦នៅស្រុកកោះញែក ខេត្តមណ្ឌលគិរី។

ឯកឧត្តម អ៊ុយ សំអាត បាននាំនូវព្រះរាជបណ្តាំ​ផ្ញើសួរ​សុខទុក្ខពីសំណាក់ ហ្លួងម៉ែ នរោត្តម មុនិនាថ សីហនុ ព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ជាប្រធាន ជូន​ចំពោះ​បងប្អូនប្រជាពលរដ្ឋទាំងអស់ ​ពីក្តី​អាណិតស្រឡាញ់ ​និងនឹករលឹកជាទីបំផុត។

សម្តេចកិត្តិព្រឹទ្ធបណ្ឌិតប្រធាន ទោះជាមានការ​មមាញឹកយ៉ាង​ណា​សម្តេចនៅតែបន្តដឹកនាំ និង​ចង្អុលបង្ហាញ​ឲ្យក្រុមការងារចុះធ្វើសកម្មភាព​មនុស្សធម៌​ជាប្រចាំដោយមិនទុក​ឲ្យប្រជាពលរដ្ឋ​ណាម្នាក់ស្លាប់ដោយអត់អាហារនោះទេ។

ឯកឧត្តម ក៏បាននាំនូវសារអំពាវនាវពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូន​បងប្អូនប្រជាពលរដ្ឋទាំងអស់ សូមថែទាំសុខភាពផ្ទាល់ខ្លួនឲ្យបានល្អ ​មានអនាម័យក្នុងការរស់នៅ និងប្រុងប្រយ័ត្នចំពោះអាកាសធាតុ ដែលអាចធ្វើឲ្យប៉ះពាល់ដល់សុខភាព។

ជាមួយគ្នានេះឯកឧត្តម អ៊ុយ សំអាត នាយកនាយកដ្ឋានគ្រប់គ្រងគ្រោះមហន្តរាយកាក​បាទ​ក្រហម​កម្ពុជា បានអំពាវនាវឲ្យប្រជាពលរដ្ឋបន្តចូលរួមទប់ស្កាត់ជំងឺកូវីដ-១៩​ ចូលរួមចាក់វ៉ាក់សាំងដូសទី៣ ឬដូសទី៤ ​ឲ្យបានគ្រប់ៗគ្នា ​ព្រោះថា​ប្រសិទ្ធភាពនៃវ៉ាក់សាំង​ អាចការពារអាយុជីវិតរបស់យើងបាន ហើយ​បានធ្វើឲ្យយើងអាចទប់ស្កាត់ការរីករាលដាលជំងឺកូវីដ-១៩​ និងអាចស្តារសេដ្ឋកិច្ច​គ្រួសារ​ឡើងវិញ។

ប្រជាពលរដ្ឋដែលបានទទួលអំណោយទាំងនេះ បានសម្តែងនូវសេចក្តីសោមនស្សរីករាយបំផុត និង​ថ្លែងអំណរគុណយ៉ាងជ្រាលជ្រៅ ​ចំពោះទឹកចិត្តសង្គ្រោះនិងសប្បុរសធម៌ ​របស់សម្តេចកិត្តិព្រឹទ្ធបណ្ឌិត ​ប៊ុន រ៉ានី ហ៊ុនសែន​ ដែលតែងតែគិតគូរជានិច្ច ​ដល់ប្រជាពលរដ្ឋ ដែល​កំពុង​តែជួបការលំបាក​ក្នុងជីវភាពគ្រប់ទីកន្លែង៕អត្ថបទ៖ អ៊ិត ភីរុណ