​ភ្នំពេញ៖ ប្រជាពលរដ្ឋក្រីក្រជួបការលំបាក អត់ស្បៀងអាហារហូបចុក អាចទៅទាក់ទងនៅទីស្នាក់ការសង្កាត់ ខណ្ឌ របស់កាកបាទក្រហម ឬគណបក្សប្រជាជនកម្ពុជា គឺមិនទុកឱ្យពលរដ្ឋណាម្នាក់ស្លាប់ដោយការអត់បាយនោះទេ។

 ប្រធានគណៈកម្មាធិការសាខាកាកបាទក្រហមកម្ពុជារាជធានីភ្នំពេញ ឯកឧត្ដម ឃួង ស្រេង បានណែនាំឱ្យប្រជាពលរដ្ឋក្រីក្រ ជួបការលំបាក អត់ស្បៀងអាហារហូបចុក អាចទៅទាក់ទងនៅទីស្នាក់ការសាខាកាកបាទក្រហម ឬទីស្នាក់ការគណបក្សប្រជាជនកម្ពុជា សង្កាត់ ខណ្ឌ នោះខាងសង្កាត់ ឬខណ្ឌនឹងផ្តល់ជូនប្រជាពលរដ្ឋ ពោល គឺមិនទុកឱ្យប្រជាពលរដ្ឋណាម្នាក់ស្លាប់ដោយការអត់បាយនោះទេ។

ការណែនាំរបស់ឯកឧត្ដម ឃួង ស្រេង បានធ្វើឡើង នារសៀលថ្ងៃទី២០ ខែឧសភា ឆ្នាំ២០២២ ខណៈដែលឯកឧត្ដម និងលោកជំទាវ ជួបសំណេះសំណាល និងចែកអំណោយជូនប្រជាពលរដ្ឋក្រីក្រ ចាស់ជរា អ្នកផ្ទុកមេរោគអេដស៍ និងអ្នករើសអេតចាយសរុបចំនួន៥៦២នាក់ នៅក្នុងវត្តនាគវ័ន្ត ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។

ឯកឧត្តម ឃួង ស្រេង បានមានប្រសាសន៍ថា សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងសម្ដេចតេជោ ហ៊ុន សែន សម្ដេចទាំងទ្វេ តែងបានយកចិត្តទុកដាក់ខ្លាំងណាស់ចំពោះជីវភាពប្រជាពលរដ្ឋក្រីក្រនៅក្នុងព្រះរាជាណាចក្រកម្ពុជា ពោល គឺនៅពេលដែលសម្ដេចតេជោ នៅតែដឹកនាំប្រទេសកម្ពុជា សម្ដេចមិនទុកឱ្យប្រជាពលរដ្ឋណាម្នាក់ស្លាប់ដោយការអត់បាយនោះទេ។

ដូច្នេះប្រជាពលរដ្ឋទាំងអស់ ដែលជួបបញ្ហាខ្វះខាតនៅក្នុងជីវភាពគ្រួសារខ្លាំង សូមទំនាក់ទំនងទៅអនុសាខាកាកបាតក្រហម សង្កាត់ ខណ្ឌ ឬនៅតាមសាលាសង្កាត់ សាលាខណ្ឌក៏ដូចជានៅតាមទីស្នាក់ការគណបក្សសង្កាត់ គណបក្សខណ្ឌដែលនៅជិតប្រជាពលរដ្ឋ នោះនឹងទទួលបានស្បៀងអាហារជាក់ជាមិនខាន ។

ឯកឧត្តម ឃួង ស្រេង ក៏បានមានប្រសាសន៍បញ្ជាក់ផងដែរថា អំណោយដែលត្រូវចែកជូនប្រជាពលរដ្ឋទាំង ៥៦២នាក់នេះ គឺជាអំណោយរបស់សម្ដេចតេជោហ៊ុនសែន និងសម្ដេចកិត្តិព្រឹទ្ធបណ្ឌិតប៊ុនរ៉ានីហ៊ុនសែន ដោយក្នុងម្នាក់ៗ ទទួលបានអង្ករ គ្រឿងឧបភោគបរិភោគ និងថវិកាមួយចំនួនផងដែរ៕ អត្ថបទ​៖ ប្រាក់ វ៉ាន់ដា