​​អ៊ុយ​ក្រែ​ន៖ ក្បួន​រថយន្តក្រុង​ដឹក​អ្នក​ប្រយុទ្ធ​អ៊ុយ​ក្រែ​ន​បាន​ចាក​ចេញពី​រោងចក្រ​ដែកថែប Azovstal កាលពី​ថ្ងៃ​សុក្រ ខណៈរុស្ស៊ី​បាន​អះ​អាង​ថា​បាន​គ្រប់គ្រង​ទាំងស្រុង​ទីក្រុង Mariupol។

​

​អ្នកនាំពាក្យ​លោក Igor Konashenkov បាន​និយាយថា រដ្ឋមន្ត្រី​ក្រសួងការពារជាតិ​រុស្ស៊ីលោក Sergei Shoigu បាន​រាយការណ៍​ទៅ​លោក​ប្រធានាធិបតី Vladimir Putin អំពី​ការរំដោះ​បាន​ទាំងស្រុង​រោងចក្រ​ដែកថែប Azovstal នៅ​ទីក្រុង Mariupol ដែលជា​បន្ទាយចុងក្រោយ​នៃ​ការតស៊ូរបស់​អ៊ុយ​ក្រែ​ន និង​ទីក្រុង​ទាំងមូល។ គ្មាន​ការបញ្ជាក់​ភ្លាមៗ​ពី​ភាគី​ខាង​អ៊ុយ​ក្រែ​ន​នោះទេ​។​ ​លោក Konashenkov បាន​និយាយថា អ្នក​ប្រយុទ្ធ​អ៊ុយ​ក្រែ​ន​សរុប​ចំនួន 2,439​នាក់​ដែល បាន​ជាប់នៅ​រោងចក្រ​ដែកថែប​បាន​ចុះចាញ់​ចាប់តាំងពី​ថ្ងៃ​ចន្ទ រួមទាំង​ជាង ​500​នាក់កាលពី​ថ្ងៃ​សុក្រ​។ ខណៈ​ពួកគេបាន​ចុះចាញ់ កងទ័ព​ត្រូវបាន​ចាប់​ជា​ឈ្លើយ​សឹកដោយ​រុស្ស៊ី​ ដែល​មួយចំនួន​ត្រូវបានបញ្ជូនទៅ​មន្ទីរពេទ្យ​។​

​រោងចក្រ​ដែកថែប Azovstal បាន​ក្លាយជា​កន្លែង​នៃ​ការប្រយុទ្ធ​គ្នា​ខ្លាំង​អស់​ជាច្រើន​សប្តាហ៍មកហើយ​។ ក្រុម​អ្នក​ប្រយុទ្ធ​បានជា​ប់​នៅក្នុង​រោងចក្រ ​ដោយ​រង​ការវាយប្រហារ​តាម​អាកាស​របស់​រុស្ស៊ីកាំភ្លើង​ធំ និង​ការបាញ់​ដោយ​រថក្រោះ មុនពេល​រដ្ឋាភិបាលរ​បស់​ពួកគេ​បាន​បញ្ជា​ឱ្យ​ពួកគេ​បោះបង់​ការការពា​រ​ខ្លួន និង​ដើម្បី​សង្គ្រោះ​ជីវិត៕

អត្ថបទ៖ ប៊ុនថន