បាល់ទាត់៖ ​ខ្សែប្រយុទ្ធ AC Milan, Zlatan Ibrahimovic​ ស្ទើរ​តែ​ស្រក់​ទឹកភ្នែក​ទៅ​ហើយ ​នៅ​ពេល​និយាយ​ក្នុង​សន្និសីទ​សារព័ត៌មាន នៅ​បែក​ពី​កូនប្រុស​មក​ចូលរួម​ជាមួយ​ក្រុម​ជំរើសជាតិ​ស៊ុយអែត​។​ កូន​ប្រុស​របស់​កីឡាករ​វ័យ ៣៩​ឆ្នាំ​រូប​នេះ​កំពុង​មាន​ស្មារតី​មិនល្អ​ឡើយ​នៅ​ពេល​នេះ និង​បាន​យំ​យ៉ាង​ខ្លាំង​នៅ​ពេល Ibrahimovic ​ចាក​ចេញ​មក​។

​

​ខ្សែប្រយុទ្ធ​ស៊ុត​បញ្ចូល​ទី​ច្រើន​ជាង​គេ​ឲ្យ​ស៊ុយអែត Zlatan Ibrahimovic​ ត្រូវ​បាន​កោះហៅ​ត្រលប់​ឲ្យ​មក​ជួយ​ក្រុម​ជំរើស​ជាតិ​វិញ ៥​ឆ្នាំ​បន្ទាប់ពី​ចូលនិវត្តន៍​។ បុរស​វ័យ ៣៩​ឆ្នាំ​រូប​នេះ​ធ្លាប់​ស៊ុត​បញ្ចូល​ទី​បាន ៦២​គ្រាប់​ក្នុង​ការ​បង្ហាញខ្លួន ១១២​ប្រកួត​ឲ្យ​ក្រុម​ជំរើសជាតិ​ស៊ុយអែត មុន​ពេល​ចូលនិវត្តន៍​ក្រោយ​ធ្លាក់​ត្រឹម​វគ្គ​ចែក​ពូ​ល​នៅ Euro ២០១៦​។ ការ​សំរេច​ចិត្ត​កោះហៅ Zlatan មក​វិញ​នេះ ស្រប​ពេល​ស៊ុយអែត​ត្រៀមខ្លួន​ប្រកួត​វគ្គ​ជំ​រុះ World Cup ២០២២​។

​ស៊ុយអែត​នឹង​ត្រូវ​ជួប​ជាមួយ​ហ្ស​ក​ហ្ស៊ី និង​កូ​សូ​វ៉ូ​ក្នុង​វគ្គ​ជំ​រុះ World Cup ចុងខែ​មីនា​នេះ ខណៈ​ស៊ុយ​អែត​ស្ថិត​ក្នុង​ពូ​ល E ក្នុង​ការ​ប្រកួត Euro ២០២០ ដែល​លើក​មក ២០២១ នេះ​ជាមួយ​អេ​ស្ប៉ា​ញ ប៉ូឡូញ និង​ស្លូ​វ៉ា​គី​។​ វ័យ​ចំណាស់​ពិតមែន Zlatan Ibrahimovic​ នៅតែ​បន្ត​ការ​ស៊ុត​បញ្ចូល​ទី​ឥត​ឈប់​ឈរ​ដោយ​រក​បាន ១៤​គ្រាប់​ក្នុង​ការ​បង្ហាញ​ខ្លួន ១៤លើក​ឲ្យ AC Milan ១៤​លើក​រដូវ​កាល​នេះ​៕

​អត្ថបទ​៖​នាង សុភា​វុ​ធ