ឧត្តរមានជ័យ៖ ឯកឧត្តម គន់ គីម សមាជិកអចិន្ត្រៃយ៍គណបក្សប្រជាជនកម្ពុជា និងជាប្រធានក្រុមការងារគណបក្ស ចុះជួយខេត្តឧត្តរមានជ័យ បានអំពាវនាវដល់ប្រជាពលរដ្ឋ បោះឆ្នោតជូនបេក្ខជនឃុំសង្កាត់ របស់គណបក្សប្រជាជនកម្ពុជា ដើម្បីបន្តទទួលបានការអភិវឌ្ឍមូលដ្ឋាន ឲ្យកាន់តែរីកចម្រើន ។

ការថ្លែងបែបនេះ ធ្វើឡើងក្នុងយុទ្ធនាការឃោសនារកសំឡេងឆ្នោត នៅថ្ងៃទី២១ ខែឧសភា ឆ្នាំ២០២២ នាស្រុកអន្លង់វែង ខេត្តឧត្តរមានជ័យ សម្រាប់ការបោះឆ្នោតជ្រើសរើសក្រុមប្រឹក្សា​ឃុំសង្កាត់ អាណត្តិទី៥ ដែលជាថ្ងៃឃោសនាដំបូង ដែលមានសមាជិក សមាជិកា របស់គណបក្សប្រជាជនកម្ពុជា ចូលរួមឃោសនាសរុបជាង ៦ពាន់នាក់។

ឯកឧត្តម គន់ គីម បានមានប្រសាសន៍ បេក្ខភាពមេឃុំ ចៅសង្កាត់ និងសមាជិកក្រុមប្រឹក្សាឃុំសង្កាត់ របស់គណបក្សប្រជាជនកម្ពុជា ត្រូវបានសម្រិតសម្រាំងយ៉ាងយកចិត្តទុកដាក់បំផុត ពោល​សុទ្ធសឹង​ជាមេឃុំ និងចៅសង្កាត់ ដែលគិតគូរសុខទុក្ខរបស់ពលរដ្ឋ និងលើកកម្ពស់ការអភិវឌ្ឍ​នៅតាម​ឃុំសង្កាត់ ដែលខ្លួនដឹកនាំ និងគ្រប់គ្រង ។

ឯកឧត្តម បានបន្តថា ជាពិសេសមេឃុំ និងចៅសង្កាត់មកពីគណបក្សប្រជាជនកម្ពុជា គឺជាមេឃុំ និងចៅសង្កាត់ ដែលបម្រើប្រជាពលរដ្ឋ យកប្រជាពលរដ្ឋជាធំ នៅរួមសុខរួមទុក្ខជាមួយប្រជាពលរដ្ឋ ។

ជាមួយគ្នានេះ ឯកឧត្តម គន់ គីម បានអំពាវនាវដល់ប្រជាពលរដ្ឋបោះឆ្នោតជូនគណបក្ស​ប្រជាជនកម្ពុជា មានរូបសញ្ញាទេវតាបាចផ្កា ដែលមានលេខរៀងកំណត់ទៅតាមបណ្តាឃុំ និងសង្កាត់នីមួយៗ ដើម្បីទទួលបានមេឃុំ និងចៅសង្កាត់ ដែលបម្រើប្រជាពលរដ្ឋ គិតគូរ​សុខទុក្ខប្រជាពលរដ្ឋ ហើយជាគណបក្សដែលធំជាងគេនៅកម្ពុជា និងមានគោលនយោបាយដឹកនាំ​ជាតិច្បាស់លាស់ ធានារក្សាបាននូវសុខសន្តិភាព និងការអភិវឌ្ឍ ៕