ក្លឹបបាល់ទាត់ព្រះខ័នរាជស្វាយរៀង និងវិសាខា នៅតែមិនទាន់ចាញ់រៀងខ្លួន បន្ទាប់ពីក្រុមទាំងពីរបានត្រឹមស្មើគ្នា ២ទល់នឹង២ ការប្រកួតសប្ដាហ៍ទី៥ លីគកំពូលកម្ពុជា កាលពីចុងសប្ដាហ៍កន្លងទៅនេះ។

ពីមុខអ្នកគាំទ្រជិត៨០០០នាក់ ជំនួបនេះលេងបានត្រឹមតែ១៩នាទី ម្ចាស់ផ្ទះព្រះខ័នរាជស្វាយរៀងផ្ដើមនាំមុខមុនដោយគ្រាប់បាល់របស់កីឡាករ Rui Miguel Pires។ ៥នាទីបន្ទាប់ ភ្ញៀវវិសាខា វាយបកតាមស្មើវិញដោយការតែតបញ្ចូលទីរបស់កីឡាករ Tancler Ambiel Lucas។

ចូលវគ្គទី២ នៅនាទីទី៦៤ វិសាខា នាំមុខព្រះខ័នរាជស្វាយរៀងវិញ ដោយការតែតបញ្ចូលទីរបស់កីឡាករ Ewolo Ulrich Donovan។ តែយ៉ាងណាក៏ដោយ នាទីទី៧២ កីឡាករ Peprah Kwame ទាត់បញ្ចូលទីឱ្យព្រះខ័នរាជស្វាយរៀងតាមស្មើ។ នាទីនៅសេសសល់ទោះបីម្ចាស់ផ្ទះដាក់សម្ពាធបន្ថែម នៅតែមិនមានគ្រាប់បាល់កើតឡើងទៀតនោះទេ។ ចប់ការប្រកួត ព្រះខ័នរាជស្មើវិសាខា ២ទល់នឹង២។

បន្ទាប់ពីការប្រកួតនេះ ថ្ងៃទី២៧ ខែតុលា ព្រះខ័នរាជស្វាយរៀង នឹងធ្វើដំណើរទៅកាន់ប្រទេសិង្ហបុរី ជួប Tapines Rovers ក្នុងការប្រកួតទី៣នៃជើងឯកក្លឹបលំដាប់ទី២ទ្វីបអាស៊ី AFC Champion League Two ដែលត្រូវលេងនៅថ្ងៃទី២៩ ខែតុលានេះ។

នៅស្ដាតចាស់ ក្លឹបបាល់ទាត់ភ្នំពេញក្រោន ដណ្ដើមបានជ័យជំនះលើកដំបងក្នុងការប្រកួតលីគកំពូលកម្ពុជា ក្រោយឈ្នះកងយោធពលខេមរភូមិន្ទ ២ទល់នឹង១ មុនទទួលក្លឹបចិនហុងកុង Kitchee SC ថ្ងៃព្រះហស្បត្តិ៍សប្ដាហ៍នេះនៅពហុកីឡដ្ឋានជាតិមរតកតេជោ។

ក្រោយស្មើគ្នា ០ទល់នឹង០ ក្នុងវគ្គទី១ លេខវគ្គទី២ មិនដល់៣នាទីស្រួលបួលផង ភ្នំពេញក្រោននាំមុខមុនដោយគ្រាប់បាល់របស់កីឡាករ Daniel Bares។ តែនៅនាទីទី៧៦ ម្ចាស់ផ្ទះកងយោធពលខេមរភូមិន្ទ វាយបកតាមស្មើដោយកីឡាករ Moussa Paul Bakayoko។ ភ្នំពេញក្រោនប៊ិះតែនឹងស្មើមួយប្រកួតទៀតទៅហើយ ប៉ុន្ដែនៅនាទីទី៨៩កីឡាករ Mijland Renewick ទាត់បញ្ចូលទីគ្រាប់ជ័យជំនះឱ្យក្រុម។

នៅខេត្តតាកែវ ភ្ញៀវឡាយហ្វខេត្តព្រះសីហនុ បានវាយបកយកឈ្នះ ម្ចាស់ផ្ទះ គិរីវង់សុខសែនជ័យ ២ទល់នឹង១ នៅថ្ងៃទីអាទិត្យ ទី២៥ ខែតុលា ឆ្នាំ២០២៦។

លេងបានត្រឹមតែ៧នាទីប៉ុណ្ណោះ គិរីវង់សុខសែនជ័យផ្ដើមនាំមុខមុនដោយគ្រាប់បាល់របស់កីឡាករ ទូច ម៉ាណុច ។ តែចូលដល់វគ្គទីពីរ កីឡាករ Ernandes Da Silva Lemos Bruno រកបានគ្រាប់បាល់តាមស្មើ និងជ័យជំនះឱ្យក្រុម។

នៅពហុកីឡដ្ឋានជាតិ(អូឡាំពិក) ក្លឹបបាល់ទាត់បឹងកេត ចាញ់ក្លឹបបាល់ទាត់ណាហ្កាវើលដ៍ ០ទល់នឹង២។ Bពីរគ្រាប់របស់ណាហ្កាវើលដ៍នេះធ្វើបានសម្រេចដោយកីឡាករ Dinir Da Costa Bernardo Augusto នាទីទី៣៧ និងកីឡាករ Pessanha Agostinho Jefferson នៅនាទីទី៨៦។

ថ្ងៃជាមួយគ្នានេះដែរ មួយគ្រាប់របស់កីឡាករ Aguek Manyluak នៅនាទីទី៥០ ជួយឱ្យ អង្គរថាយហ្គឺរ ឈ្នះម្ចាស់ផ្ទះអាយអេសអាយ ដង្កោសែនជ័យ ១ទល់នឹង០។

ក្រោយលេងបាន៥ប្រកួតម្នាក់ វិសាខា និងណាហ្កាវើលដ៍ ឈរនៅចំណាត់ថ្នាក់លេខ១ និងលេខ២រៀងគ្នាមាន១៣ពិន្ទុដូចគ្នា ក្រោយ៥ប្រកួត ឈ្នះ៤ និងស្មើ១ ចំណែកព្រះខ័នរាជស្វាយរៀង ៥ប្រកួតឈរនៅលេខ៣មាន១១ពិន្ទុ ក្រោយឈ្នះ៣ និងស្មើ២ប្រកួត។ ឯអង្គរថាយហ្គឺរ ឈរនៅលេខ៤ ភ្នំពេញក្រោនលេខ៥ និងអាយអេសអាយ លេខ៦។ ដោយ៥ក្រុមក្រោមគេរួមមានអឹម អូ អាយកំពង់ដេវ៉ា ឡាយហ្វខេត្តព្រះសីហុន គិរីវង់សុខសែនជ័យ បឹងកេត និងកងយោធពលខេមរភូមិន្ទ៕