បន្ទាយមានជ័យ៖ ឯកឧត្តម បោន ប៊ិន អនុប្រធានក្រុមការងារគណបក្សប្រជាជនកម្ពុជា (CPP) ចុះមូលដា្ឋនស្រុកមង្គលបូរី និងជាប្រធានក្រុមការងារបក្សចុះមូលដា្ឋនឃុំចំណោម បានលើកឡើងថា គណបក្សប្រជាជនកម្ពុជា ធ្វើដំណើរឆ្ពោះទៅមុខឥតងាករេ បន្តបង្កើន និងពង្រីកនូវសមិទ្ធផលគ្រប់ទីកន្លែង ដើម្បីបម្រើផលប្រយោជន៍របស់ប្រជាពលរដ្ឋ ។

ក្នុងពិធីបើកកយុទ្ធនាការឃោសនា បោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ នៅថ្ងៃទី២១ ខែឧសភា ឆ្នាំ២០២២ ឯកឧត្តម បោន ប៊ិន មានប្រសាសន៍ថា សន្តិភាព ស្ថិរភាព និងរាល់សមិទ្ធផល ដែលសម្រេចបាន នាពេលបច្ចុប្បន្ន គឺបានមកពីការយកអាយុជីវិតធ្វើ​ជា​ដើម​ទុន​របស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ព្រមទាំងបានធ្វើ​ពលីកម្មដ៏​ធំធេង និងមានការចូលរួមមិនអាចកាត់ថ្លៃបាន​ របស់បងប្អូនយុទ្ធជន យុទ្ធនារី ជនរួមជាតិយើងរាប់លាននាក់ដើម្បីជាតិមាតុភូមិ ។

ឯកឧត្តម បានអំពាវនាវដល់ពលរដ្ឋទាំងអស់ បន្តខិតខំការពារថែរក្សាសន្តិភាព និង​សមិទ្ធផល​ដ៏ថ្លៃថ្លា ដែលបានមកដោយលំបាកក្រោមការដឹកនាំរបស់គណបក្សប្រជាជនកម្ពុជា ឱ្យបាន​គង់វង្សជារៀងរហូត ​ដោយមិន​អនុញ្ញាតឱ្យមជ្ឈដ្ឋានណាមួយមកបំផ្លាញទៅវិញបានឡើយ ។

ជាមួយនេះ ឯកឧត្តម បោន ប៊ិន បានជំរុញដល់ប្រជាពលរដ្ឋ ដែលមានឈ្មោះក្នុងបញ្ជីបោះឆ្នោត សូមទៅចូលរួមបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២​ ឱ្យបានគ្រប់ៗគ្នា ពិសេសបន្តឆ្ពោះទៅចូលរួមបោះឆ្នោតជ្រើសរើសតំណាងរាស្រ្ត នៅឆ្នាំ២០២៣ នាពេលខាង​មុខផងដែរ ។

ជាមួយគ្នានេះ ឯកឧត្តម បានអំពាវនាវដល់ពលរដ្ឋ បន្តបោះឆ្នោតគាំទ្របេក្ខជនមេឃុំ ​និងចៅសង្កាត់ របស់គណបក្សប្រជាជនកម្ពុជា ​ដើម្បីមានឱកាសអភិវឌ្ឍន៍​មូលដ្ឋានឲ្យកាន់តែមានភាពរីកចម្រើន ៕