កំពង់ធំ៖ ឯកឧត្តម ជា ចាន់តូ សមាជិកគណៈអចិន្ត្រៃយ៍គណកម្មាធិការកណ្តាលគណបក្សប្រជាជន និងជាប្រធានក្រុមការងារចុះមូលដ្ឋានខេត្តកំពង់ធំ បានអំពាវនាវពលរដ្ឋ ដែលមានឈ្មោះក្នុងបញ្ជីឈ្មោះបោះឆ្នោតសូមទៅបោះឆ្នោតទាំងអស់គ្នា ដើម្បីបំពេញកាតព្វកិច្ចជាពលរដ្ឋល្អ និងលើកស្ទួយលទ្ធិប្រជាធិបតេយ្យនៅកម្ពុជា ។

ក្នុងបើកយុទ្ធនាកាឃោសនាបោះឆ្នោតរកសំឡេងឆ្នោត សម្រាប់ការបោះឆ្នោតជ្រើសរើស​ក្រុម​ប្រឹក្សា​ឃុំសង្កាត់អាណត្តីទី៥ នៅថ្ងៃទី២១ ​ខែឧសភា ឆ្នាំ២០២២ ឯកឧ្តមបណ្ឌិត ជា ចាន់តូ មានប្រសាសន៍ថា ពលរដ្ឋគ្រប់រូបមានសិទ្ធិជ្រើសរើស ​គណបក្សនយោបាយ ​ដែលខ្លួនពេញចិត្ត ហើយ​ការជ្រើសរើសគណបក្សនយោបាយដែលត្រឹមត្រូវ ​មានន័យថា បានចូលយ៉ាងសំខាន់ក្នុងការ​អភិវឌ្ឍប្រទេសជាតិ ។

ឯកឧត្តម បានបន្តថា ជាក់ស្តែងគណបក្សប្រជាជន ត្រូវបានប្រជាពលរដ្ឋផ្តល់សេចក្តីជឿទុកចិត្ត និងប្រគល់សម្លេងឆ្នោតឲ្យដឹកនាំប្រទេសជាតិជាង ៣០ឆ្នាំកន្លងមក ​ដោយក្នុងរយៈពេលនេះ ប្រទេសជាតិមានសុខសន្តិភាព ស្ថិរភាពនយោបាយ និងអភិវឌ្ឍលើគ្រប់វិស័យ ទាំងហេដ្ឋារចនាសម្ព័នរូបវន្ត និងធនធានមនុស្ស ។

ឯកឧត្តម ជា ចាន់តូ បានបន្ថែមថា ដើម្បីឲ្យមានការអភិវឌ្ឍបន្តទៀត ប្រជាពលរដ្ឋទាំងអស់ត្រូវទៅ​បោះឆ្នោត និងជ្រើសរើយកគណបក្សដែលមានគោលនយោបាយ ស្របជាមួយឆន្ទៈប្រជាពលរដ្ឋ កាលៈទេសៈសង្គម ​ដើម្បីប្រជាជន​ រស់នៅប្រកប​ដោយ​សេចក្តីសុខ​ក្សេមក្សាន្ត​ជារៀងរហូត ។

ឯកឧត្តម ប្រធានក្រុមការងារចុះមូលដ្ឋានខេត្តកំពង់ធំ បានបញ្ជាក់ថា បេក្ខភាពមេឃុំ ចៅសង្កាត់ របស់​គណបក្សប្រជាជនកម្ពុជា ​ត្រូវបានជ្រើសរើស ​យ៉ាងយកចិត្តទុកដាក់បំផុត ពោល​សុទ្ធសឹង​ជាមេឃុំ និងចៅសង្កាត់ ​ដែល​គិតគូរ​សុខទុក្ខរបស់ពលរដ្ឋ​ និង​លើកកម្ពស់ការអភិវឌ្ឍ នៅតាម​មូលដ្ឋានដែលខ្លួនដឹកនាំ ​ដូចនេះពលរដ្ឋទាំងអស់ ​សូមបន្តបោះឆ្នោតជូនគណបក្សប្រជាជកម្ពុជា ដើម្បីបន្តអភិវឌ្ឍន៍​ប្រទេសជាតិ ឲ្យកាន់តែមានភាពរី​កចម្រើន ៕