វិញ្ញាសាយ៉ាងហោច ៣០ ឬស្មើនឹង ១៣០ប្រភេទទម្ងន់ ត្រូវបានកំណត់ត្រៀមដាក់ឲ្យអត្តពលិកមកពីប្រមាណ ២៥ប្រទេសចូលរួមប្រកួតប្រជែងមេដាយ ក្នុងការប្រកួតកីឡាឃីកបុកស៊ីងជ្រើសរើសជើងឯកទ្វីបអាស៊ី លើកទី២ ដែលកម្ពុជានឹងធ្វើម្ចាស់ផ្ទះ ចាប់ពីថ្ងៃទី១២ ដល់ថ្ងៃទី២១ ខែធ្នូ ឆ្នាំ២០២៦ ខាងមុខ នៅវិមានពហុកីឡដ្ឋានជាតិ(អូឡាំពិក) រាជធានីភ្នំពេញ។

នេះបើតាមប្រសាសន៍ឯកឧត្តម ហេង សុខឃន ប្រធានសហព័ន្ធកីឡាប្រដាល់ឃីកបុកស៊ីងកម្ពុជា ក្រោយពិធីជួបសំណេះសំណាលជាមួយកីឡាករ-កីឡាការិនី ត្រៀមការប្រកួតកីឡាឃីកបុកស៊ីងជើងឯកអាស៊ី នៅនាយកដ្ឋានអប់រំកាយ និងកីឡា កាលពីល្ងាចថ្ងៃទី២៦ ខែតុលា ឆ្នាំ២០២៦ ក្រោមវត្តមានឯកឧត្តម តែម ម៉ឺន អនុរដ្ឋលេខាធិការក្រសួងការពារជាតិ និងជាអគ្គលេខាធិការរងគណៈកម្មាធិការជាតិអូឡាំពិកកម្ពុជា។

ឯកឧត្តមបានផ្ដាំផ្ញើដល់កីឡាករ-កីឡាការិនីទាំងអស់ថា នេះគឺជាឱកាសសម្រាប់ការខិតខំប្រឹងប្រែង ក្នុងការប្រកួតប្រជែងមេដាយជូនជាតិ ផ្សារភ្ជាប់ការផ្សព្វផ្សាយពីប្រដាល់គុនខ្មែរ ក៏ដូចជាឃីកបុកស៊ីង ដែលមានទំនាក់ទំនងល្អនឹងគ្នា ស្របតាមចក្ខុវិស័យវែងឆ្ងាយរបស់ឯកឧត្តម តែម ម៉ឺន តាំងពីឯកឧត្តមនៅជាប្រធានសហព័ន្ធកីឡាប្រដាល់គុនខ្មែរ ហើយបានបំបែកឲ្យមានកីឡាឃីកបុកស៊ីង ដើម្បីផ្ដល់ឱកាសឲ្យកីឡាករមានសក្ដានុពលអាចប្រជែងមេដាយពីព្រឹត្តិការណ៍អន្ដរជាតិនានា។

ដោយទទួលបានគោលការណ៍អនុញ្ញាតពីពីរាជរដ្ឋាភិបាល ក្នុងការត្រៀមធ្វើម្ចាស់ផ្ទះព្រឹត្តិការណ៍ប្រចាំទ្វីបនេះ ឯកឧត្តមសង្ឃឹមយ៉ាងមុតមាំថា កីឡាករ-កីឡាការិនីទាំងអស់ នឹងខិតខំហ្វឹកហាត់ ដើម្បីអភិវឌ្ឍន៍សមត្ថភាពឆ្ពោះទៅរកការប្រកួតផ្លូវការ ដ្បិតមកទល់ពេលនេះ វិញ្ញាសាប្រកួតបានកើនដល់ ១៣០វិញ្ញាសា ខណៈកីឡាករ-កីឡាការិនីកម្ពុជាជាង ១០០នាក់ ក៏បានចុះឈ្មោះដើម្បីចូលរួមប្រកួតប្រជែងជាមួយអត្តពលិក ២៥ប្រទេសទៀត ដែលត្រៀមចូលរួមការប្រកួតនេះ ។

គួរដឹងថា រាជរដ្ឋាភិបាល បានអនុញ្ញាតឲ្យសហព័ន្ធរៀបចំការប្រកួតកីឡាប្រដាល់ឃីកបុកស៊ីងជើងឯកអាស៊ី លើកទី២ ចាប់ពីថ្ងៃទី១២ ដល់ថ្ងៃទី២១ ខែធ្នូខាងមុខ នៅរាជធានីភ្នំពេញ ។ កាលពីឆ្នាំ២០២៤ កម្ពុជា ធ្លាប់បានធ្វើម្ចាស់ផ្ទះព្រឹត្តិការណ៍នេះម្ដងរួចមកហើយ ដោយដណ្ដើមបានមេដាយសរុប ៤១គ្រឿង រួមមានមេដាយមាស ៩ ប្រាក់ ៤ និងសំរឹទ្ធ ២៨គ្រឿង។ ដើម្បីសម្រួចសមត្ថភាពអត្តពលិកកម្ពុជាត្រៀមចូលរួមការប្រកួត សហព័ន្ធ បានសហការជាមួយក្រុមហ៊ុន ជីព ម៉ុង នាំយកគ្រូបង្វឹកអន្ដរជាតិមកជួយបង្ហាញនូវបច្ចេកទេសស្ដង់ដារដល់កីឡាករ-កីឡាការិនីតាមបណ្ដាក្លិបទាំងអស់ ដើម្បីធានាឲ្យបាននូវសមត្ថភាព និងឈានទៅដណ្ដើមមេដាយឲ្យបានកាន់តែច្រើនក្នុងនាមម្ចាស់ផ្ទះ៕ អត្ថបទ លី ឈុនឡា