ភ្នំពេញ៖ ក្រសួងសេដ្ឋកិច្ចនិងហិរញ្ញវត្ថុ និងក្រសួងការងារនិងបណ្តុះបណ្តាលវិជ្ជាជីវៈ បានសម្រេចចេញប្រកាសអន្តរក្រសួងរួមគ្នាមួយ ស្តីពីការកែសម្រួលកម្រិតអប្បបរមានិងពិដាននៃប្រាក់ឈ្នួលជាប់ភាគទានសម្រាប់ការអនុវត្តរបបសន្តិសុខសង្គម ដោយបានកំណត់ប្រាក់ឈ្នួលជាប់ភាគទានអប្បបរមាចំនួន ៦០ម៉ឺនរៀល និងប្រាក់ឈ្នួលជាប់ភាគទានពិដានចំនួន ១,៥លានរៀល។

យោងតាមប្រកាសអន្តរក្រសួង ចុះហត្ថលេខារួមគ្នាដោយ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និង លោក ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានបញ្ជាក់យ៉ាងច្បាស់ នៅក្នុងប្រការ១ ថា ប្រាក់ឈ្នួលជាប់ភាគទានសម្រាប់ការអនុវត្តរបបសន្តិសុខសង្គម ត្រូវបានកំណត់ឡើងវិញ ក្នុងនោះកម្រិតអប្បបរមា (ទាបបំផុត) គឺ ៦០០ ០០០ រៀល និងកម្រិតពិតាន(ខ្ពស់បំផុត) គឺស្មើនឹង ១ ៥០០ ០០០ រៀល។

នៅក្នុងប្រការ២ នៃប្រកាសអន្តរក្រសួងដដែល បានគូសបញ្ជាក់ពីវិសាលភាពនៃការអនុវត្តថា កម្រិតប្រាក់ឈ្នួលជាប់ភាគទានថ្មីនេះ ត្រូវអនុវត្តចំពោះបុគ្គលទាំងឡាយណាដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ ដោយរួមបញ្ចូលទាំងបុគ្គលិកធ្វើការតាមផ្លូវអាកាស នាវាសមុទ្រ ព្រមទាំងអ្នកបម្រើការងារក្នុងផ្ទះផងដែរ។

ការសម្រេចដាក់ចេញនូវការកែសម្រួលកម្រិតប្រាក់ឈ្នួលជាប់ភាគទាននាពេលនេះ ធ្វើឡើងផ្អែកលើសំណើរបស់ក្រុមប្រឹក្សាភិបាលនៃបេឡាជាតិសន្តិសុខសង្គម (ប.ស.ស.) និងស្របតាមច្បាប់ស្តីពីរបបសន្តិសុខសង្គម សំដៅធានានិរន្តរភាពនៃមូលនិធិសន្តិសុខសង្គម ក៏ដូចជាលើកកម្ពស់ការគាំពារសង្គម និងការផ្តល់តាវកាលិកផ្សេងៗជូនបងប្អូនកម្មករ និយោជិត និងសមាជិក ប.ស.ស. ឱ្យកាន់តែឆ្លើយតបទៅនឹងស្ថានភាពជាក់ស្តែងនៃការវិវត្តសេដ្ឋកិច្ច-សង្គម។

ប្រាក់ឈ្នួលជាប់ភាគទាន (ឬប្រាក់បៀវត្សជាប់ភាគទាន) សំដៅលើប្រាក់ឈ្នួលមុនកាត់ពន្ធរបស់កម្មករនិយោជិត ដែលត្រូវបានយកមកគណនាដើម្បីបង់ភាគទានចូលទៅក្នុង ប.ស.ស. (បេឡាជាតិសន្តិសុខសង្គម) តាមការកំណត់របស់ច្បាប់។

ប្រាក់ភាគទានដែលបានបង់ពីប្រាក់ឈ្នួលនេះ នឹងយកទៅប្រើប្រាស់ដើម្បីផ្តល់ជាតាវកាលិក ឬអត្ថប្រយោជន៍នានា ដូចជា សេវាព្យាបាលសុខភាព ប្រាក់បំណាច់ពេលឈឺថ្កាត់ និងប្រាក់សោធននិវត្តន៍ដល់សមាជិក ប.ស.ស។

ដោយឡែកប្រាក់ឈ្នួលជាប់ភាគទានពិតាន(ឬប្រាក់ឈ្នួលពិតាន) គឺជាកម្រិតប្រាក់ឈ្នួល​អតិបរមា (ខ្ពស់បំផុត) ដែលត្រូវបានកំណត់ដោយច្បាប់ ឬបេឡាជាតិសន្តិសុខសង្គម (ប.ស.ស.) ដើម្បីយកមកធ្វើជាមូលដ្ឋានក្នុងការគណនាទឹកប្រាក់ត្រូវបង់ភាគទាន។

មានន័យថា បើទោះបីជាកម្មករនិយោជិតមានប្រាក់ឈ្នួលជាក់ស្តែងខ្ពស់ជាង​កម្រិតពិតាន​នេះក៏ដោយ ក៏ទឹកប្រាក់ដែលត្រូវយកមកគណនាដើម្បីកាត់បង់ភាគទាន ប.ស.ស. ត្រូវ​កម្រិត​ត្រឹមចំនួនពិតានដែលកំណត់ប៉ុណ្ណោះ។ ចំណែកឯប្រាក់ឈ្នួល​ផ្នែកដែល​លើស​ពី​ពិតាន មិនត្រូវបានរាប់បញ្ចូលក្នុងការគណនាភាគទានកាតព្វកិច្ចឡើយ៕