កោះកុង ៖ ឯកឧត្តម ប៊ុន លើត សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាអនុប្រធានក្រុមការងារបក្សចុះមូលដ្ឋានខេត្តកោះកុង មានប្រសាសន៍ថា ក្បួនឃោសនារកសំឡេងឆ្នោតនាពេលនេះ គឺបង្ហាញឃើញពីកម្លាំងសាមគ្គី ឧត្តមភាព និងកិត្យានុភាពរបស់សមាជិក-សមាជិកា គណបក្សប្រជាជនកម្ពុជាខេត្តកោះកុង បង្ហាញទៅកាន់ប្រជាពលរដ្ឋជ្រាបពីសារគោលនយោបាយរបស់គណបក្ស។

ក្នុងពិធីយុទ្ធនាការឃោសនាបោះឆ្នោតថ្ងៃដំបូង ថ្ងៃទី២១ ខែឧសភាឆ្នាំ២០២២នេះ ឯកឧត្តម ប៊ុន លើត បានបន្ថែមទៀតថា មានតែគណបក្ស​ប្រជាជនកម្ពុជាមួយគត់ ដែលធ្វើឲ្យប្រជាជនទូទាំងប្រទេសស្គាល់នៅសុខសន្តិភាព​ សុខដុមរមនា និងមានការអភិវឌ្ឍរីកចម្រើនសង្គមជាតិគ្រប់វិស័យ។

ដោយឡែកលោកជំទាវ មិថុនា ភូថង ប្រធានគណៈកម្មាធិការគណបក្សប្រជាជនកម្ពុជាខេត្តកោះកុង ក៏អំពាវនាវដល់សមាជិក-សមាជិការបស់ខ្លួន ត្រូវគោរពតាមការណែនាំ​របស់​គណៈកម្មការជាតិ​រៀបចំ​ការបោះឆ្នោត​ និង​រក្សានូវ​ភាព​ថ្លៃថ្នូរ វិន័យ ជៀសវាង​ការ​កើតនូវអំពើ​ហិង្សា​ធ្វើឲ្យប៉ះពាល់​កិត្តិយស​ដល់​គណបក្សប្រជាជនកម្ពុជា​ ព្រមទាំង​សន្តិសុខសណ្តាប់ធ្នាប់។

លោកជំទាវ បន្ថែមទៀតថា ជនរួមជាតិបានឃើញច្បាស់ហើយរាល់សមិទ្ធផលដែល​កើតមាន​សព្វថ្ងៃនេះ​ ដោយកើតចេញពីគោលនយោបាយ​ដ៏ត្រឹមត្រូវរបស់​គណបក្សប្រជាជនកម្ពុជា សូម​អញ្ជើញទៅបោះឆ្នោត​ និងបោះឆ្នោតជូនគណបក្សប្រជាជនកម្ពុជា ​ដែល​មានរូប​ទេវតា​បាចផ្កា ជា​សញ្ញាសម្គាល់ ​ឱ្យបានគ្រប់ៗគ្នាកុំបីខាននៅតាមការិយាល័យបោះឆ្នោតឃុំ-សង្កាត់ របស់បងប្អូន ។

ខេត្តកោះកុងមានពលរដ្ឋក្នុងបញ្ជីឈ្មោះបោះឆ្នោតសរុប ៧៣.១៣៤នាក់ និង​ការិយាល័យ​បោះឆ្នោត ១៨៧ការិយាល័យ ​ដោយមានគណបក្សនយោបាយចូលរួមប្រកួតប្រជែងសរុបចំនួន៦គណបក្ស។ ទី១-គណបក្សប្រជាជនកម្ពុជា ទី២-គណបក្សភ្លើងទៀន ទី៣-គណបក្សយុវជនកម្ពុជា ទី៤-គណបក្សខ្មែរស្រឡាញ់ជាតិ ទី៥-គណបក្សខ្មែររួបរួមជាតិ និងទី៦-គណបក្សហ៊្វុនស៊ិនប៉ិច៕អត្ថបទ៖ ឈឹម មករា