ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានថ្លែងថា នាពេលបច្ចុប្បន្ននេះនៅកម្ពុជា មានអ្នកជំងឺកូវីដ១៩ ដែលកំពុងសម្រាក់ព្យាបាលនៅក្នុងមន្ទីរពេទ្យ មានចំនួន៨នាក់ ហើយគ្មានអ្នកឆ្លងថ្មីចំនួន ១៥ថ្ងៃជាប់គ្នាហើយ ។

ក្នុងពិធីសំណេះសំណាល ជាមួយសហគមន៍ខ្មែរនៅទ្វីបអឺរ៉ុប ជាង ២១០០នាក់ នៅល្ងាចថ្ងៃទី២១ ខែឧសភា ឆ្នាំ២០២២ ក្នុងទីក្រុងដាវ៉ូស ប្រទេសស្វីស សម្ដេចតេជោនាយករដ្ឋមន្ត្រី បានមានប្រសាសន៍ថា សម្រាប់អ្នកជំងឺកូវីដ១៩ ទាំង៨នាក់ ដែលកំពុងសម្រាក់ព្យាបាលក្នុង​មន្ទីរ​ពេទ្យនោះ គឺមាននៅក្នុងរាជធានីភ្នំពេញ ចំនួន៤នាក់ និងនៅក្នុងខេត្តបាត់ដំបង ចំនួន៤នាក់ ហើយក្នុងចំណោមអ្នកជំងឺទាំងអស់នេះ មានម្នាក់កំពុងស្ថិតក្នុងបន្ទប់សង្គ្រោះបន្ទាន់ ។

សម្ដេចតេជោ បានបន្តថា ក្នុងរយៈពេល ១៥ថ្ងៃជាប់គ្នាហើយ ដែលកម្ពុជាពុំមានអ្នកឆ្លងថ្មី នៃ​ជំងឺកូវីដ១៩ ប៉ុន្តែក៏មិនមានការធ្វេសប្រហែសនោះដែរ ដោយបច្ចុប្បន្នកម្ពុជា កំពុង​សាងសង់​មន្ទីរពេទ្យមួយ ​ដែលអាចផ្ទុកអ្នកជំងឺបានប្រមាណ ១ម៉ឺននាក់ ។

ក្នុងឱកាសនោះ សម្ដេចតេជោ ហ៊ុន សែន នៅតែបន្តសម្ដែងការសោកស្ដាយ ចំពោះការបាត់បង់ជីវិត​របស់ប្រជាពលរដ្ឋជាង ៣០០០នាក់ ដោយសារជំងឺកូវីដ១៩ ហើយសម្ដេចក៏បានអំពាវនាវ​បន្ថែម​ទៀត ដល់ប្រជាពលរដ្ឋបន្តអនុវត្តនូវវិធានការសុខាភិបាល គឺ៣ការពារ ៣កុំ ឲ្យបានខ្ជាប់ខ្ជូន ។

គួរបញ្ជាក់ថា គិតត្រឹមថ្ងៃទី២០ ខែឧសភា ឆ្នាំ២០២២ កម្ពុជាបានរកឃើញអ្នកឆ្លងជំងឺកូវីដ១៩ ចំនួន១៣៦ ២៦២នាក់, ជាសះស្បើយចំនួន ១៣៣ ២០១នាក់ ​និងស្លាប់ចំនួន ៣ ០៥៦នាក់ ហើយអត្រាអ្នកបានចាក់វ៉ាក់សាំងកូវីដ១៩ ​បានប្រមាណ ៩០ភាគរយ ៕