កំពង់ស្ពឺ​ ៖​ ឯកឧត្តម លេង ផាលី អនុប្រធានទី១ក្រុមការងារថ្នាក់កណ្ដាលចុះជួយស្រុក ឱរ៉ាល់ ទទួលបន្ទុក៤ឃុំ នៅព្រឹកថ្ងៃទី២២ ខែឧសភា ឆ្នាំ២០២២នេះ បានដឹកនាំក្រុមការងារ និងសមា​ជិក សមាជិកា​គណបក្សប្រជាជនកម្ពុជា បើកយុទ្ធ​នា​​ការឃោសនាបោះឆ្នោតថ្ងៃទី២ ជ្រើសរើស​ក្រុម​ប្រឹក្សា​ឃុំ-សង្កាត់ អាណត្តិទី៥ ឆ្នាំ២០២២ ទាំង៤ឃុំ ក្នុងស្រុកឱរ៉ាល់ ខេត្តកំពង់ស្ពឺ។

​ឯកឧត្តម លេង ផាលី អនុប្រធានទី១ក្រុមការងារថ្នាក់កណ្ដាលចុះជួយស្រុក ឱរ៉ាល់ ទទួលបន្ទុក៤ឃុំ, ទី១/ឃុំ ហោងសំណំ ដឹកនាំដោយឯកឧត្តមវេជ្ជបណ្ឌិត គិន ប៊ុនលី ​ប្រធានក្រុម​ការងារ​ថ្នាក់កណ្ដាល, ទី២/ឃុំ ត្រពាំងជោ ដឹកនាំដោយឯកឧត្តម សាន វណ្ណេត ​ប្រធាន​ក្រុមការងារ​ថ្នាក់​កណ្ដាល, ទី៣/ឃុំ រស្មីសាមគ្គី ដឹកនាំដោយឯកឧត្តម ពាង ផារ័ត្នប្រធានក្រុមការងារថ្នាក់កណ្ដាល និងទី៤/ឃុំ តាសាល ដឹកនាំដោយលោក ចែម សារី ប្រធានក្រុមការងារ និងលោកវេជ្ជបណ្ឌិត សាយ ឫទ្ធី អនុប្រធានទី១ បានថ្លែងនៅក្នុងឱកាសនៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ថា៖ដោយអនុវត្តតាមច្បាប់បោះឆ្នោតជ្រើសរើសក្រុមប្រឹក្សាឃុំ សង្កាត់ និងប្រតិទិននៃការងារបោះឆ្នោតជ្រើសរើសក្រុមប្រឹក្សាឃុំ សង្កាត់ ដែលបាន​កំណត់​រយៈ​ពេល​១៤ថ្ងៃ គឺពីថ្ងៃទី២១ ខែឧសភា ដល់ថ្ងៃទី០៣ ខែមិថុនា​ឆ្នាំ២០២២ ។ ដោយឡែក​ថ្ងៃនេះ​ជាថ្ងៃ​ទី២​នៃយុទ្ធនាការឃោសនាបោះឆ្នោត ហើយគណៈកម្មាធិការគណបក្សឃុំ​/សង្កាត់យើង​បានឯក​ភាព​យក​ថ្ងៃអាទិត្យ ទី២២ ខែឧសភា ឆ្នាំ២០២២ ជាថ្ងៃហែរក្បួនឃោសនា ដើម្បីបង្ហាញកម្លាំង និងផ្សព្វ​ផ្សាយ​កម្ម​វិធីនយោបាយរបស់គណបក្សដល់មជ្ឈដ្ឋានប្រជាជន មហាជន ក្នុងភូមិចំណុះរបស់ឃុំ​/សង្កាត់​ក្នុងគោលដៅទាក់ទាញការគាំទ្រពីសំណាក់ប្រជាជន មហាជន ដើម្បីដណ្ដើមប្រៀបនយោបាយ​ជូន​គណបក្សប្រជាជនកម្ពុជាយើង ។ 

​ឯកឧត្តម លេង ផាលី បានបន្តទៀតថា ក្នុងរយៈពេល៤៣ឆ្នាំកន្លងទៅនេះ គណបក្ស​ប្រជាជ​ន​កម្ពុជា​ បានសម្រេចនូវស្នាដៃជាប្រវត្តិសាស្រ្ត គឺបានសង្គ្រោះជីវិតប្រទេសជាតិ និងប្រជាជន​កម្ពុជា​ឲ្យរស់​ឡើងវិញពីរបបប្រល័យពូជសាសន៍ និងការពារការវិលត្រឡប់នៃរបបដ៏ឃោឃៅនេះ និងបាន​ធ្វើ​ជា​ស្នូលនៃការផ្សះផ្សាជាតិ បង្រួបបង្រួមជាតិ បញ្ចប់សង្គ្រាមរ៉ាំរ៉ៃ បង្កើតបានសុខសន្តិភាពពេញលេញ ពង្រឹងពង្រីកលទ្ធិប្រជាធិបតេយ្យ សេរីពហុបក្ស ការគោរពសិទ្ធមនុស្ស និងសម្រេចនូវ​ការ​បោះឆ្នោ​ត​យ៉ាង​ទៀងទាត់ទាំងបោះឆ្នោតសភា ព្រឹទ្ធសភា បោះឆ្នោតឃុំ-សង្កាត់ បោះឆ្នោតក្រុមប្រឹក្សារាជធានី-ខេត្ត បោះឆ្នោតក្រុមប្រឹក្សាក្រុង-ស្រុក តាមការកំណត់នៃរដ្ឋធម្មនុញ្ញ ដោយទទួលបានការគាំទ្រ និងសាទរពី​សំណាក់​សមាគមជាតិ និងអន្តរជាតិ។ ​កម្ពុជាបានស្ថិតក្នុង​ចំណោម​ប្រទេសមាន​កំណើន​សេដ្ឋ​កិច្ច​ខ្ពស់​នៅលើពិភពលោក ដោយឡែកក្នុងអំឡុងពេលនៃការឆ្លងរាលដាលជំងឺកូវីដ-១៩ គណបក្សប្រជាជន​កម្ពុជា​យើងបានពុះពារគ្រប់ឧបសគ្គ ដើម្បីការពារសុខមាលភាព និងអាយុជីវីតរបស់ប្រជាជនយើង ដែលធ្វើឲ្យកម្ពុជាក្លាយជាប្រទេសលំដាប់ទី២ បន្ទាប់ពីប្រទេសអេមីរ៉ាអារ៉ាប់រួម ដែលជា​ប្រទេស​ដែល​ងើបចេញពីជំងឺកូវីដ-១៩ បានលឿនជាងគេនៅលើពិភពលោក។ ដូច្នេះសមិទ្ធផលដ៏ធំធេង និងមិនអាចកាត់ថ្លៃបានខាងលើនេះ គឺជាសមិទ្ធផលជាប្រវត្តិសាស្រ្ត​ដែលគណបក្ស​ប្រជាជន​កម្ពុជា​សម្រេច​បានជូនជាតិ និងប្រជាជនកម្ពុជា ដូចនេះការឃោសនាក្នុងអំឡុងពេលយុទ្ធនា​ការឃោស​នា​បោះឆ្នោតរយៈពេល ១៤ ថ្ងៃនេះ គឺមានគោលបំណងជាមូលដ្ឋាន ដោយរក្សា និងពង្រឹងប្រៀប​ឈ្នះ​របស់គណបក្សប្រជាជនកម្ពុជាយើង ក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី ៥ ឆ្នាំ២០២២ ដើម្បីឈានទៅសម្រេចជោគជ័យក្នុងការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣។

​ឯកឧត្តម លេង ផាលី សូមថ្លែងនូវសេចក្ដីអំណរអរគុណចំពោះមន្រ្តីក្រុមការងារ និងមន្រ្តី​គណ​បក្សគ្រប់ថ្នាក់ ដែលបានខិតខំប្រឹងប្រែងក្នុងការពង្រឹងពង្រីកកម្លាំងបក្ស និងការខិតខំប្រឹង​ប្រែង​ក្នុង​ការ​ចាត់តាំងអនុវត្តគ្រប់សកម្មភាពឆ្ពោះទៅកាន់ការបោះឆ្នោត សំដៅដណ្ដើមជោគជ័យ​ដាច់​ខាត​លើ​ការ​បោះឆ្នោត៕​អត្ថបទ​៖រដ្ឋា