​អ៊ុយ​ក្រែ​ន​៖ ប្រទេស​អ៊ុយ​ក្រែ​ន​បាន​ទាត់ចោល​បទ​ឈប់​បាញ់ ឬ​សម្បទាន​ណាមួយ​ចំពោះ​ក្រុង Moscow ខណៈ​ប្រទេស​រុស្ស៊ី​បង្កើន​ការវាយលុក​យ៉ាង​សន្ធាប់​នៅក្នុង​តំបន់ Donbas ភាគ​ខាងកើត និង​បាន​បញ្ឈប់​ការ​បញ្ជូន​ឧស្ម័ន​ដល់​ប្រទេស​ហ្វាំ​ង​ឡង់ក្នុង​ចំណាត់​ការ​ចុងក្រោយ​បំផុត​ ឆ្លើយតប​ចំពោះ​ការ​ដាក់​ទណ្ឌកម្ម​ពី​លោក​ខាង​លិច និង​មូលហេតុ​ធ្វើ​ឲ្យ​ខ្លួន​ឯកា​ពី​ពិភពលោក​កាន់​តែ​ខ្លាំង​។

​លោក​ប្រធានាធិបតី​ប៉ូឡូញ Andrzej Duda ដែល​បាន​ជួប​លោក​ប្រធានាធិបតី Volodymyr Zelenskiy នៅ​ក្នុង​ទីក្រុង Kyiv កាលពី​ខែ​មុន បាន​ថ្លែង​សុន្ទរកថា​ដោយ​ផ្ទាល់​ទៅកាន់​សភា​អ៊ុយ​ក្រែ​ន​កាលពី​ថ្ងៃអាទិត្យ ជា​មេដឹកនាំ​បរទេស​ដំបូង​ដែល​បាន​ថ្លែង​ទៅកាន់​សភា​នេះ​ដោយ​ផ្ទាល់។ ​បន្ទាប់ពី​ការ​បញ្ចប់​ការ​តស៊ូ​ជាច្រើន​សប្ដាហ៍​របស់​ក្រុម​អ្នក​ប្រយុទ្ធ​អ៊ុយ​ក្រែ​ន ក្នុង​ទីក្រុង​កំពង់ផែ​យុទ្ធសាស្ត្រ​ភាគ​ខាង​ត្បូង Mariupol រុស្ស៊ី​កំពុង​បង្កើន​ការ​វាយ​លុក​យ៉ាង​ខ្លាំង​នៅក្នុង​តំបន់ Luhansk ជា​ខេត្ត​មួយ​ក្នុងចំណោម​ខេត្ត​២ ​ក្នុង​តំបន់ Donbas​។​

​អគ្គសេនាធិការ​អ៊ុយ​ក្រែ​ន​បាន​និយាយ​នៅ​ក្នុង​របាយការណ៍​ តាមដាន​ស្ថានភាព​ប្រចាំថ្ងៃ​កាលពី​ថ្ងៃអាទិត្យ​ថា ​នៅ​ខ្សែត្រៀម​ជួរមុខ​តំបន់ Donetsk កងកម្លាំង​រុស្ស៊ី​បាន​កំពុង​ព្យាយាម​វាយ​បំបែក​កម្លាំង​ការពារ​របស់​អ៊ុយ​ក្រែ​ន ដើម្បី​ចូល​ទៅ​ដល់​ព្រំដែន​រដ្ឋបាល​តំបន់ Luhansk ខណៈ​ដែល​តំបន់​ភាគ​ខាង​ជើង​គឺ​ទីក្រុង Sievierodonetsk ទីក្រុង Lysychansk នៅតែ​រង​ការ​បាញ់​ផ្លោង​ដោយ​គ្រាប់កាំភ្លើង​ធំ​៕

អត្ថបទ៖ សុខមាន