សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពាវនាវយ៉ាងទទូចដល់ប្រជាពលរដ្ឋដែលខ្វះខាត និងគ្មានដីធ្លីរស់នៅ ឬបង្កបង្កើនផលពិតប្រាកដ ឱ្យទៅចុះឈ្មោះ និងដាក់ពាក្យស្នើសុំដីធ្លីស្របច្បាប់ពីថ្នាក់ដឹកនាំតាមរយៈអាជ្ញាធរមូលដ្ឋាន។ ជាមួយគ្នានេះ សម្តេចបានបញ្ជាក់យ៉ាងដាច់អហង្ការថា សូមកុំឱ្យមានការទៅកាប់ឆ្ការ ឬទន្ទ្រានកាន់កាប់ដីព្រៃរបស់រដ្ឋដោយខុសច្បាប់ឡើយ។

អនុសាសន៍ និងការណែនាំដ៏ខ្ពង់ខ្ពស់របស់សម្ដេចធិបតីនេះ ត្រូវបានថ្លែងឡើងក្នុងឱកាសដែលសម្តេចធិបតី អញ្ជើញចុះជួបសំណេះសំណាល និងចែកពូជស្រូវជូនដល់ប្រជាពលរដ្ឋដែលរងគ្រោះដោយទឹកជំនន់ នៅក្នុងខេត្តបាត់ដំបង នាថ្ងៃទី៣០ ខែតុលា ឆ្នាំ២០២៦នេះ។

សម្តេចធិបតីបានលើកឡើង រាជរដ្ឋាភិបាលមានគម្រោងច្បាស់លាស់ ដូចជាគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច (LASED) និងគម្រោងផ្ដល់ដីការពារព្រៃ ដើម្បីជួយសម្រួលដល់ពលរដ្ឋក្រីក្រដែលគ្មានដីធ្លីកម្មសិទ្ធិពិតប្រាកដ។ សម្ដេចធិបតីបានបញ្ជាក់ដែរថា រដ្ឋាភិបាលនឹងមិនព្រងើយកន្តើយចំពោះការលំបាករបស់ពលរដ្ឋនោះទេ ប៉ុន្តែរាល់ការចូលទៅទន្ទ្រានដីរដ្ឋខុសច្បាប់ នឹងត្រូវប្រឈមមុខចំពោះមុខច្បាប់ជាធរមាន។

សម្ដេចធិបតីបានណែនាំដល់បងប្អូនប្រជាពលរដ្ឋឱ្យជៀសវាងការជឿតាមការញុះញង់ ឬការល្បួងលួងលោមពីសំណាក់មេខ្យល់ខិលខូច ចូលទៅទន្រ្ទានដីរដ្ឋដោយខុសច្បាប់ ដែលនាំឱ្យខាតបង់ថវិកា និងប្រឈមនឹងទោសទណ្ឌដោយខុសច្បាប់។

ក្នុងឱកាសនោះសម្ដេចធិបតី ក៏ប្រសាសន៍សង្កត់ធ្ងន់ថា វិធីសាស្ត្រដែលល្អបំផុតសម្រាប់បងប្អូនប្រជាពលរដ្ឋដែលខ្វះខាតដីធ្លីពិតប្រាកដ គឺត្រូវធ្វើការទំនាក់ទំនងដោយផ្ទាល់ជាមួយអាជ្ញាធរភូមិ ឃុំ/សង្កាត់ ឬស្រុក/ខណ្ឌ ដែលខ្លួនកំពុងរស់នៅ ដើម្បីចុះឈ្មោះសុំការអន្តរាគមន៍ស្របតាមនីតិវិធីច្បាប់៕