នាថ្ងៃទី៣០ ខែតុលា ឆ្នាំ២០២៦នេះ​ ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុក​រដ្ឋ​លេខា​ធិការដ្ឋាន​អាកាសចរណ៍ស៊ីវិល និងលោកឧកញ៉ា ឆារស៍ វ៉ាន់ នាយកគ្រប់គ្រងក្រុមហ៊ុន ខេម​បូឌា អ៊ែរផត អិនវេសមិន ឯ.ក រួមនឹងមន្ត្រីជំនាញពាក់ព័ន្ធបានចុះពិនិត្យវឌ្ឍនភាព ការសាង​សង់​អគារ​ស្ថានីយអ្នកដំណើរពិសេស VIP នៅអាកាសយានដ្ឋានអន្តរជាតិតេជោ ដោយ​បាន​សម្រេច ៩៨% ដោយគ្រោងនឹងរួចរាល់មុនកម្ពុជាធ្វើម្ចាស់កិច្ចប្រជុំកំពូងហ្វ្រង់កូហ្វូនីលើកទី២០ ។

បញ្ជាក់ប្រាប់ BTV ឯកឧត្តម សារិន គុណ្ណករ អគ្គនាយក នៃអគ្គនាយក​ដ្ឋាន​បច្ចេក​ទេស​របស់​រដ្ឋ​លេខាធិកា​រដ្ឋាន​អាកាសចរណ៍ស៊ីវិល បានប្រាប់ថា នៅពេលនេះអគារស្ថានីយអ្នកដំណើរពិសេស VIP ​នៅអាកាសយានដ្ឋានអន្តរជាតិតេជោ បានសាងសង់ស្ទើររួចរាល់១០០% ដោយ​នៅ​ប៉ុន្មាន​ថ្ងៃ​ទៀត​ នឹងដាក់ដំណើរការសាកល្បង ដើម្បីត្រៀមទទួលគណៈប្រតិភូជាន់ខ្ពស់ជុំវិញពិភពលោក ដែល​នឹង​មកកម្ពុជា ចូលរួមកិច្ចប្រជុំកំពូលលើកទី២០ ហ្រ្វង់កូហ្វូនី ដែល​កម្ពុ​ជា​ធ្វើ​ម្ចាស់​ផ្ទះ។

ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បាន​ណែនាំ​ឱ្យក្រុមការងារ ត្រូវរៀបចំឱ្យកាន់តែស្អាតថែមទៀត ទោះមកដល់​ពេល​នេះ​សម្រេច​បាន​៩៨%​ហើយក៏ដោយ កុំឱ្យមានចំណុចខ្វះខាតតិចតួចក្លាយជាបញ្ហាធំឱ្យសោះ ត្រូវ​ធានា​ថា​គ្រប់​ទី​កន្លែង បានរួចរាល់ និងពុំបានបន្សល់ចំណុចខ្វះខាត ឬភ្លេចមុខ ភ្លេចក្រោយឱ្យសោះ ពិសេស​នៅ​សល់ជាង ១០ថ្ងៃប៉ុណ្ណោះ អគារអ្នកដំណើរពិសេស VIP មួយនេះ នឹង​ទទួល​គណៈ​ប្រតិភូ​ជាន់​ខ្ពស់ដែលនឹងមកចូលរួមកិច្ចប្រជុំហ្វ្រង់កូហ្វូនៅលើកទី២០នៅកម្ពុជាហើយ ត្រូវ​រួម​គ្នា​ពិនិត្យ​ និងកែសម្រួលឱ្យបានរួចរាល់១០០%។

សូមបញ្ជាក់ថា អគារស្ថានីយអ្នកដំណើរពិសេស VIP ជាស្ថានីយ​អ្នក​ដំណើរ​ពិសេស​សម្រាប់​ថ្នាក់​ដឹក​នាំ​ប្រទេស ហើយបានកសាងលើផ្ទៃដីជិត៧ហិកតា និងមានបន្ទប់ពិសេស VIP ចំនួន១៧ ក្នុង​នោះ​មាន​បន្ទប់សម្រាប់ព្រះមហាក្សត្រ បន្ទប់សម្រាប់ថ្នាក់ដឹកនាំប្រធានព្រឹទ្ធសភា បន្ទប់​សម្រាប់​ថ្នាក់​ដឹក​នាំ​ប្រធានរដ្ឋសភា បន្ទប់សម្រាប់ថ្នាក់ដឹកនាំរាជរដ្ឋាភិបាល និងបន្ទប់​ពិសេស​ជា​ច្រើន​ទៀត​សម្រាប់​ថ្នាក់​ដឹកនាំប្រទេសធ្វើដំណើរផ្លូវរដ្ឋតំណាងប្រទេសជាដើម៕ អត្ថបទ៖ គង់ រ៉េន