ភ្នំពេញ៖ ជាថ្មីម្តងទៀត ប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស បានក្រើនរម្លឹកពលរដ្ឋមិនចាក់វ៉ាក់សាំងដូសជំរុញទី៣ ទី៤ រួសរាន់ទៅទទួលការចាក់វ៉ាក់សាំងកូវីដ-១៩ និងក្រុមអាទិភាពជួរមុខ ត្រៀមទៅទទួលការចាក់វ៉ាក់សាំងដូសទី៥ ដែលចាប់ផ្តើមពីថ្ងៃទី៩ខែមិថុនា ខាងមុខនេះ។

មានប្រសាសន៍ប្រាប់BTVនៅថ្ងៃទី២៣ ខែឧសភានេះ លោកជំទាវវេជ្ជបណ្ឌិត ឱ វណ្ណឌីន ប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងប្រខណ្ឌទូទាំងប្រទេស បានឱ្យដឹងថា ​ទោះបីបច្ចុប្បន្នស្ថានភាពជំងឺកូវីដ-១៩ មានភាពល្អប្រសើរក្តី តែការចាក់វ៉ាក់សាំងកូវីដ-១៩ នៅតែជាឧបករណ៍ដ៏​សំខាន់បំផុត ​សម្រាប់បុគ្គលគ្រប់ៗ ការពារខ្លួនទប់ទល់​នឹងការវាយលុក​ធ្ងន់ធ្ងរ​ពីជំងឺកូវីដ-១៩​ និងកាត់បន្ថយអត្រាមរណៈភាពបានជាអតិប្បរិមា។

ក្រៅពីនេះលោកជំទាវ បានក្រើនរម្លឹកពលរដ្ឋមិនចាក់វ៉ាក់សាំងដូសជំរុញទី៣ ទី៤ សូម​រួសរាន់​ទៅ​ទទួល​ការ​ចាក់វ៉ាក់សាំង ​និងមន្រ្តីជួរមុខ ព្រមទាំង​ក្រុមអាទិភាពត្រៀម​ទៅ​ទទួលការចាក់វ៉ាក់​សាំង​ដូសទី៥ ដែលចាប់ផ្តើម​នៅខែមិថុនា ខាងមុខនេះ។ ហើយការចាក់វ៉ាក់សាំងដូសទី៥នេះ នឹង​ប្រើប្រាស់វ៉ាក់សាំងជំនួយពីប្រទេសចិន ​ប្រទេសឥណ្ឌា​ និងប្រទេសអ៊ីតាលីជាដើម។

យោងតាមសេចក្តីជូនព័ត៌មានរបស់គណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ដែល​ហៅ​កាត់គ.វ.ក.១៩ បានបង្ហាញថា ​យោងចំណារឯកភាពរបស់សម្តេចតេជោ ហ៊ុន សែន នាយក​រដ្ឋមន្រ្តី នៃព្រះរាជាណាចក្រកម្ពុជា ​ចុះថ្ងៃទី២០ខែឧសភា ឆ្នាំ២០២២ គ.វ.ក-១៩ នឹងចាប់ផ្តើម​ចាក់វ៉ាក់​សាំងទី៥ ជូនមន្រ្តីជួរមុខ ​និងក្រុមគោលដៅអាទិភាព ​ចាប់ពីថ្ងៃទី០៩ ខែមិថុនា ឆ្នាំ២០២២ តទៅ ​នៅមន្ទីរពេទ្យថ្នាក់ជាតិ និងថ្នាក់ក្រោមជាតិ ដែលការសម្របសម្រួល​ពី​អាជ្ញាធរ​មូលដ្ឋាន។

បច្ចុប្បន្នប្រទេសកម្ពុជា ​បើកដំណើរការសេដ្ឋកិច្ចធម្មតា​ ជាមួយវត្តមានជំងឺកូវីដ-១៩ ក្រោយ​ពេល​រាជរដ្ឋាភិបាលទទួលបានជោគជ័យ​លើនយោបាយចាក់វ៉ាក់សាំងកូវីដ ស្រោចលើប្រជាពលរដ្ឋចាប់​ពីដូសមូលដ្ឋាន រហូតដល់ដូសជំរុញ៕ អត្ថបទ៖ ទូច សោភ័ណ