​បាល់ទាត់៖ ​ខ្សែប្រយុទ្ធ​បារាំង Kylian Mbappe បានសម្រេច​ចិត្ត​នៅ​ជាមួយ Paris Saint Germain ច្រានចោល​ការផ្លាស់​ទៅកាន់ Real Madrid​។ ​កីឡាករ​វ័យ ២៣ឆ្នាំ​រូបនេះ​បាន​ចុះហត្ថលេខា​បន្ត​កិច្ចសន្យា​ជាមួយ​ក្លិប​ជើងឯក​បារាំង​មួយ​នេះ​រហូតដល់​ឆ្នាំ២០២៥ ជាមួយ​ទំហំ​ទឹកប្រាក់​កប់​ពពក​។

​​បើតាម​អ្នកជំនាញ​សារព័ត៌មាន​បាល់ទាត់​លោក Guillem Balague ឱ្យដឹងថា PSG បានរៀបចំ​សំណើ​ទៅកាន់ Mbappe សំរាប់​កិច្ចសន្យា​ថ្មី​នេះ​ដែលមាន​ទំហំ​ទឹកប្រាក់ ១៥០លាន​អឺរ៉ូ​ត្រឹម​រក្សា Mbappe ពីរ​រដូវ​កាល​ប៉ុណ្ណោះ​។ ​​ក្នុង​មួយ​សប្តាហ៍​កន្លងទៅ ម្ចាស់​ជ័យលាភី World Cup 2018 ជាមួយ​ក្រុម​ជំរើសជាតិ​បារាំង​រូបនេះមានការ​ស្ទាក់ស្ទើ​ពី​អនាគត​របស់ខ្លួនថា ​តើ​ត្រូវ​ទៅ Real Madrid រឺ PSG បន្ទាប់ពី​មាន​សារព័ត៌មាន​អេ​ស្ប៉ា​ញ​មួយ​ក៏បាន​ចុះផ្សាយ​ថា Mbappe បាន់​យល់ព្រម​ប្រាក់​ឈ្នួល​នៅ Real Madrid ទៅហើយ​។

​​យ៉ាងណាក្តី Kylian Mbappe បានសម្រេច​ចិត្ត​ចុងក្រោយ​នៅ​ថ្ងៃ​សៅរ៍​ចុង​សប្តាហ៍​កន្លងទៅ ជាមួយនឹង​ការប្តេជ្ញាចិត្តនៅ​ជាមួយ PSG បន្តទៀត​ក្នុងការ​ប្រកាស​កិច្ចសន្យា​ថ្មី​មួយ មុន​ការប្រកួត​បិទ​រដូវ​កាលដែល PSG យកឈ្នះ Metz ៥-០​។ ​​Mbappe រកបាន​បី​គ្រាប់​ម្នាក់ឯង​ក្នុងការ​ប្រកួត​នោះ ក្លាយជា​កីឡាករ​ស៊ុត​បញ្ចូល​ទី​ច្រើនជាងគេ​ក្នុង​រដូវ​កាល​សរុប ២៨គ្រាប់​ពីលើ​ខ្សែប្រយុទ្ធ Monaco, Wissam ben Yedder ៣គ្រាប់​៕

​អត្ថបទ​៖​នាង សុភា​វុ​ធ