ក្រុម អឹមអូអាយ កំពង់ដេវ៉ា បានយកឈ្នះក្រុមខ្លាំងភ្នំពេញក្រោន ដោយលទ្ធផល ១-០ ក្នុងជំនួបជើងទី១ នៃលីគកំពូលកម្ពុជា ឆ្នាំ២០២៦/២៧ នៅកីឡដ្ឋានភ្នំពេញក្រោន កាលពីល្ងាចថ្ងៃទី១ ខែវិច្ឆិកា ឆ្នាំ២០២៦។ លទ្ធផលនេះប បានជួយឲ្យក្រុម អឹមអូអាយ កំពង់ដេវ៉ា រំកិលមកឈរតំបន់ក្រុមកំពូលតារាងទាំង ៦ ឬ Top-6 ជាបណ្ដោះអាសន្ន។

នេះគឺជាជ័យជម្នះដ៏គួរឲ្យភ្ញាក់ផ្អើលមួយ ក្នុងនាមភ្នំពេញក្រោន ដែលជាគីឡូធ្ងន់ទើបបានយកឈ្នះគូប្រជែង ៣ប្រកួតជាប់គ្នាក្នុងពានរង្វាន់ក្លិបបាល់ទាត់លំដាប់ទី២ ទ្វីបអាស៊ី AFC Champions League 2026/27 ពូលH ។ អ្នកគាំទ្រយល់ថា ជ័យជម្នះរបស់ក្រុម អឹមអូអាយ កំពង់ដេវ៉ា គឺជារឿងមួយក្នុងកីឡា តែវាបានបង្ហាញពីគុណភាព និងកម្រិតប្រកួតប្រជែងរបស់ក្លិបក្នុងលីគកំពូលកម្ពុជា សុទ្ធសឹងតែអាចប្រកួតប្រជែងលើឆាកអន្ដរជាតិបាន។

ក្រឡេកទៅចាប់អារម្មណ៍ការប្រកួតរវាងក្រុមទាំងពីរវិញ គឺបានព្យាយាមវាយសម្រុកគ្នាទៅវិញទៅមក ពិសេសក្រុមម្ចាស់ផ្ទះ ដែលភ្នំពេញក្រោន មិនអាចទម្លាយរបាំងការពារ ក៏ដូចជាអ្នកចាំទីដ៏រឹងមាំរបស់ក្រុមភ្ញៀវបានឡើយ ផ្ទុយទៅវិញ នៅនាទី៥៥ កីឡាករកូរ៉េខាងត្បូង Kim Hyeonsu តែតបញ្ចប់ទីយ៉ាងល្អ ដែលជាគ្រាប់បាល់ជ័យជម្នះ ជួយឲ្យ អឹមអូអាយ កំពង់ដេវ៉ា ទទួលបាន ៣ពិន្ទុពេញតែម្ដង។

ជាមួយជ័យជម្នះនេះ បានធ្វើឲ្យក្រុម អឹមអូអាយ កំពង់ដេវ៉ា រំកិលពីលេខរៀងទី៧ ទៅឈរលេខរៀងទី៦ បណ្ដោះអាសន្ន ដោយរកបាន ៧ពិន្ទុ ស្មើនឹងក្រុម ឡាយហ្វខេត្តព្រះសីហនុ បន្ទាប់ពីឆ្លងកាត់ ៥ប្រកួតឈ្នះ ២ ស្មើ១ និងចាញ់ ២ គ្រាដែលភ្នំពេញក្រោន បានធ្លាក់មកឈរលេខរៀងទី៧ ដោយរក្សា ៦ពិន្ទុក្នុងដៃ ក្រោយរងបរាជ័យលើកដំបូង ក្នុងចំណោម ៥ប្រកួត ដែលបញ្ចប់ដោយលទ្ធផលឈ្នះ១ ស្មើ៣ និងចាញ់ ១៕ អត្ថបទ លី ឈុនឡា