ប្រតិភូ កីឡាករ កីឡាការិនី ហែលទឹកពាក់ជើងទាកម្ពុជាបានធ្វើដំណើរមកដល់មាតុប្រទេសវិញ កាលពីយប់ថ្ងៃទី០១ ខែវិច្ឆិកា ឆ្នាំ២០២៦ នៅអាកាសយានដ្ឋានអន្តរជាតិតេជោ បន្ទាប់ពីដណ្តើមបានមេដាយសរុប ៤៦គ្រឿង (មាស១១ ប្រាក់១៦ និងសំរឹទ្ធិ ១៩ ប្រកបដោយមោទកភាពជាតិ នៅក្នុងការប្រកួតកីឡាហែលទឹកពាក់ជើងទាជើងឯកអាស៊ាន លើកទី៣ និងការប្រកួតកីឡាហែលទឹកពាក់ជើងទាកម្រិតអាយុជើងឯកអាស៊ាន លើកទី១ នៅប្រទេសម៉ាឡេស៊ី។

ក្នុងដំណើរនិវត្តន៍របស់ប្រតិភូកីឡាហែលទឹកពាក់ជើងទាទទួលបានការទទួលស្វាគមន៍យ៉ាងកក់ក្តៅ និងស្នាមញញឹមពីឯកឧត្តម កែ ប៊ុនខៀង រដ្ឋលេខាធិការក្រសួងអប់រំ យុវជន និងកីឡា ឯកឧត្តម ប៉ុន សុខ អគ្គនាយកនៃអគ្គនាយកដ្ឋានកីឡា និងឯកឧត្តម ហឿន សំនៀង អនុប្រធានសហព័ន្ធកីឡាក្នុងទឹកកម្ពុជា។

លោក ហែម គីរី អគ្គលេខាធិការសហព័ន្ធកីឡាក្នុងទឹកកម្ពុជា បានលើកឡើងថា ក្នុងដំណើរនិវត្តន៍នេះពិតជាទទួលបានកិត្តិយសធំធេងណាស់ ដែលថ្នាក់ដឹកនាំក្រសួងអប់រំ យុវជន និងកីឡា និងថ្នាក់ដឹកនាំសហព័ន្ធកីឡាក្នុងទឹកកម្ពុជាបានអញ្ជើញមកទទួលស្វាគមន៍ដំណើរមកដល់ នៅអាកាសយានដ្ឋានដោយផ្ទាល់។ ការដណ្តើមបានលទ្ធផលជាមេដាយដ៏ច្រើននេះ ជាពិសេសមេដាយមាស ១១គ្រឿង គឺដណ្តើមបានច្រើនជាការប្រកួតលើកទី២ ដែលបានធ្វើឡើងនៅប្រទេសឥណ្ឌូណេស៊ី ដែលកម្ពុជាដណ្តើមបានមេដាយមាស១គ្រឿងប៉ុណ្ណោះ។ លទ្ធផលនេះបានបញ្ជាក់ពីការខិតខំប្រឹងប្រែងរបស់សហព័ន្ធកីឡាក្នុងទឹកកម្ពុជាសម្រាប់អាណត្តិថ្មី ហើយក៏ជាកាដូមួយសម្រាប់ថ្នាក់ដឹកនាំ ដោយសមិទ្ធផលនេះលើសពីការរំពឹងទុក។

ជាមួយនេះដែរ ឯកឧត្តម ហឿន សំនៀង បានគូសបញ្ជាក់ថា នៅក្នុងការប្រកួតនេះ ប្រភេទកីឡាហែលទឹកពាក់ជើងទាកម្ពុជាទទួលបានលទ្ធផលយ៉ាងល្អប្រសើរគួរជាទីគាប់ចិត្តប្រកបដោយមោទនភាពក្រៃលែង។ នៅក្នុងការប្រកួតជើងឯកអាស៊ាននេះ គឺអត្តពលិកកម្ពុជាមានតែ១៧នាក់ និងគ្រូបង្វឹក៣នាក់ ឈ្នះមេដាយរហូតដល់ ៤៦គ្រឿង ដែលជាលទ្ធផលដ៏គាប់ប្រសើរមិនធ្លាប់មានរបស់សហព័ន្ធកីឡាក្នុងទឹកកម្ពុជាក្រោមការដឹកនាំរបស់ឯកឧត្តមប្រធានសហព័ន្ធ ស៊ុន ចាន់ថុល។

សូមបញ្ជាក់ថា សហព័ន្ធកីឡាក្នុងទឹកកម្ពុជា បានបញ្ជូន ប្រធានប្រតិភូ និងកីឡាករ-កីឡាការិនីជម្រើសជាតិហែលទឹកពាក់ជើងទាកម្ពុជាចំនួន ២០រូប ទៅចូលរួម ការប្រកួត Southeast Asia Finswimming Championship 2026 និង Southeast Asia Age Group Finswimming Championship 2026 ដែលនឹងប្រព្រឹត្តទៅចាប់ពីថ្ងៃទី២៧ ដល់ថ្ងៃទី៣១ ខែតុលា ឆ្នាំ២០២៦ នៅទីក្រុង Johor ប្រទេសម៉ាឡេស៊ី។ជាលិទ្ធផលកម្ពុជាដណ្តើមបានមេដាយចំនួន ៤៦ គ្រឿងក្នុងនោះ មាស១១ ប្រាក់១៦ និងសំរឹទ្ធ ចំនួន១៩គ្រឿង៕