ភ្នំពេញ៖ នៅថ្ងៃអាទិត្យ ទី១ ខែវិច្ឆិកា ឆ្នាំ២០២៦ មានប្រជាពលរដ្ឋជាច្រើន បានទៅទទួលសេវាអត្តសញ្ញាណបណ្ណសញ្ជាតិខ្មែរ នៅអ៊ីអនម៉លសែនសុខ និងអ៊ីអនម៉លមានជ័យនាថ្ងៃចុងសប្ដាហ៍។ នេះបើតាម អគ្គនាយកដ្ឋានអត្តសញ្ញាណកម្ម។

អគ្គនាយកដ្ឋានអត្តសញ្ញាណកម្ម បានឱ្យដឹងថា ទីស្នាក់ការផ្តល់សេវាអត្តសញ្ញាណបណ្ណសញ្ជាតិខ្មែរ អ៊ីអនម៉លសែនសុខ (អ៊ីអន២) និងទីស្នាក់ការផ្តល់សេវាអត្តសញ្ញាណបណ្ណសញ្ជាតិខ្មែរ អ៊ីអនម៉លមានជ័យ (អ៊ីអន៣) បានបំពេញបែបបទផ្តល់ និងបន្តសុពលភាពអត្តសញ្ញាណបណ្ណសញ្ជាតិខ្មែរ ព្រមទាំងប្រគល់អត្តសញ្ញាណបណ្ណសញ្ជាតិខ្មែរ ជូនប្រជាពលរដ្ឋ ដើម្បីប្រើប្រាស់តាមតម្រូវការចាំបាច់ក្នុងជីវភាពប្រចាំថ្ងៃ។

ទីស្នាក់ការផ្តល់សេវាអត្តសញ្ញាណបណ្ណសញ្ជាតិខ្មែរ អ៊ីអនម៉លសែនសុខ និងអ៊ីអនម៉លមានជ័យ បំពេញការងារពីថ្ងៃពុធ ដល់ថ្ងៃអាទិត្យ ចាប់ពីម៉ោង ៩:០០ ព្រឹក ដល់ម៉ោង ៤:០០ ល្ងាច ដើម្បីសម្រួលដល់ប្រជាពលរដ្ឋឱ្យអាចមកទទួលសេវាបានកាន់តែងាយស្រួល និងទាន់ពេលវេលា។

អត្តសញ្ញាណបណ្ណសញ្ជាតិខ្មែរ គឺជាឯកសារផ្លូវការមួយ ដែលបញ្ជាក់អំពីអត្តសញ្ញាណ និងសញ្ជាតិខ្មែរ របស់ប្រជាពលរដ្ឋម្នាក់ៗ ស្របតាមច្បាប់ជាធរមាន។ ឯកសារនេះមានសារសំខាន់ណាស់ក្នុងជីវភាពរស់នៅប្រចាំថ្ងៃ ព្រោះជាមូលដ្ឋានសម្រាប់បញ្ជាក់អត្តសញ្ញាណ នៅពេលទាក់ទងសេវាសាធារណៈ និងឯកជនផ្សេងៗ។

ប្រសិនបើបងប្អូនប្រជាពលរដ្ឋដែលមានសំណួរ បញ្ហាប្រឈម សំណូមពរ ឬមតិយោបល់ ពាក់ព័ន្ធការងារអត្តសញ្ញាណកម្ម សូមទំនាក់ទំនងមកកាន់លេខខាងក្រោម ដោយឥតគិតថ្លៃ រៀងរាល់ម៉ោងធ្វើការ ពីថ្ងៃចន្ទ ដល់ថ្ងៃសុក្រ ៖

-ប្រព័ន្ធផ្សេងៗ៖ 1271

-ប្រព័ន្ធសែលកាត (Cellcard)៖ 017 898 915

-ប្រជាពលរដ្ឋក៏អាចទាញយកកម្មវិធី GDI eServices ដើម្បីតាមដានអំពី អត្តសញ្ញាណបណ្ណសញ្ជាតិខ្មែរ និងសាកសួរព័ត៌មានផ្សេងៗ បានយ៉ាងងាយស្រួល៕