​ជប៉ុន៖ ប្រជាជន​ជប៉ុន​រាប់រយ​នាក់​បាន​ប្រមូលផ្តុំ​គ្នា​នៅ​ឧទ្យាន Shiba ក្នុង​ទីក្រុង​តូ​ក្យូកាលពី​ថ្ងៃអាទិត្យ ដើម្បីតវ៉ាប្រឆាំង​ដំណើរ​ទស្សនកិច្ច​រយៈពេល ៣​ថ្ងៃ​របស់​ប្រធានាធិបតី​សហរដ្ឋអាមេរិកលោក Joe Biden មកកាន់​ប្រទេស​ជប៉ុន ខណៈ​ភាព​តានតឹង​អន្តរជាតិ​កំពុង​កើនឡើង​ខ្លាំង​ជុំវិញ​ជម្លោះ​រុស្ស៊ី​-​អ៊ុយ​ក្រែ​ន​។​

​លោក Biden បាន​មកដល់​ប្រទេស​ជប៉ុន​កាលពី​ថ្ងៃអាទិត្យ ហើយ​មាន​ផែនការ​ចូលរួម​កិច្ចប្រជុំកំពូល​នៅ​ថ្ងៃ​អង្គារ ជា​កន្លែង​ដែល​លោក​នឹង​ជួប​ជាមួយ​នាយករដ្ឋមន្ត្រី​ជប៉ុនលោក Fumio Kishida, នាយករដ្ឋមន្ត្រី​ឥណ្ឌាលោក Narendra Modi និង​នាយករដ្ឋមន្ត្រី​អូស្ត្រាលីដើម្បី​ជំរុញ​យន្តការក្រុម​ប្រទេស "Quad" ។ Quad ជា​កិច្ចសន្ទនា​សន្តិសុខ​ប្រទេស​ចំនួន​៤ ត្រូវបាន​ផ្តួចផ្តើមឡើងដោយអតីតនាយករដ្ឋមន្ត្រី​ជប៉ុនលោក Shinzo Abe ក្នុង​ឆ្នាំ2007 គាំទ្រ​ដោយ​មេដឹកនាំ​សហរដ្ឋអាមេរិក ឥណ្ឌា និង​អូស្ត្រាលី​។​ ​លោក Kanamori ជា​អ្នក​តវ៉ា​ម្នាក់បាន​និយាយថា ខ្ញុំ​គិតថា​ យន្តការ​ក្រុមប្រទេស Quad គឺមាន​គ្រោះថ្នាក់​ខ្លាំង ហើយ​ខ្ញុំ​គិតថា ​ក្របខ័ណ្ឌ​សេដ្ឋកិច្ច​ឥណ្ឌូ​-​ប៉ាស៊ីហ្វិកក៏មាន​គ្រោះថ្នាក់​ដែរ ព្រោះ​វា​នឹងធ្វើ​ឱ្យប៉ះពាល់​ដល់​ប្រទេស​ជប៉ុន​។ ខ្ញុំ​មិន​ចង់ឱ្យ​សហរដ្ឋអាមេរិក និង​ជប៉ុនរៀបចំ​កិច្ចប្រជុំ​មេដឹកនាំ​កំពូលនោះទេ​។

ក្រុមបាតុករ​មួយចំនួនទៀតបានលើកឡើង​អំពី​វិបត្តិ​អ៊ុយ​ក្រែ​ន​ដែល​កំពុង​បន្ត ដោយបាន​លើកឡើងថា សហរដ្ឋ​អាមេរិក និង​អង្គការ ​NATO គឺជា​ដើមចម​នៃ​ជម្លោះ​។​ ​អ្នក​តវ៉ា​និយាយថា បណ្តា​ប្រទេស​នៅ​អឺរ៉ុប​ខាងលិច និង​សមាជិក​អង្គការ NATO ដែល​ដឹកនាំ​ដោយសហរដ្ឋអាមេរិក​បាន​បង្កើន​ជម្លោះ​រវាង​រុស្ស៊ី និង​អ៊ុយ​ក្រែ​នដែល​បានផ្តល់​ការផ្គត់ផ្គង់​ផ្នែក​យោធាសម្រាប់​អ៊ុយ​ក្រែ​ន ការដាក់ទណ្ឌកម្ម​លើ​ប្រទេស​រុស្ស៊ី ដែល​ទាំងអស់នេះ​នឹងមិន​បញ្ឈប់​ជម្លោះ​បាននោះទេ ប៉ុន្តែ​កាន់តែ​រីកធំឡើង និង​អូសបន្លាយ​សង្គ្រាម​ជំនួស​វិញ៕

អត្ថបទ៖ ប៊ុនថន