លោកជំទាវ សុទ្ធ សុមាលី អនុរដ្ឋលេខាធិការ តំណាងដ៏ខ្ពង់ខ្ពស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញបិទមហោស្រពល្ខោននិយាយលើកទី២ ថ្នាក់រាជធានីភ្នំពេញ ក្រោម ប្រធានបទ «កិច្ចការពារ អភិរក្ស និងថែរក្សាសម្បត្តិបេតិកភណ្ឌវប្បធម៌ជាតិ» រៀបចំដោយមន្ទីរវប្បធម៌និងវិចិត្រសិល្បៈរាជធានីភ្នំពេញ ថ្ងៃអាទិត្យ ទី១ ខែវិច្ឆិកា ឆ្នាំ២០២៦ (ផ្លូវថ្មើរជើងចតុម្មុខ)។

លោកស្រី ណម ណារីម ប្រធានមន្ទីរវប្បធម៌ និងវិចិត្រសិល្បៈរាជធានីភ្នំពេញ បានបញ្ជាក់ថា ក្រុមសិល្បៈដែលឈានដល់វគ្គផ្តាច់ព្រ័តនេះមានចំនួន ៥ក្រុម ដែលមកពីអង្គការ និងសាលាដូចខាង ក្រោម៖ ក្រុមសិល្បៈអង្គការមូលនិធិកុមារកម្ពុជា, សាលាបញ្ញាសាស្រ្តអន្តរជាតិ សាខាទី១, សាលាប៊ែលធី អន្តរជាតិទី១៨, សាលាសុវណ្ណភូមិទី៥៣ និងសាលាបញ្ញាសាស្រ្តអន្តរជាតិវណ្ណហុង។ លទ្ធផលជ័យលាភីលេខ១ សាលានីសិនគ្រីប អាខាដេមីទទួលបានពានលេខ១ អមដោយទឹកប្រាក់, ជ័យលាភីលេខ២ សាលាប៊ែលធីអន្តរជាតិទី១៨ ទទួលបានពានរង្វាន់លេខ២ អមដោយទឹកប្រាក់ និងជ័យលាភីលេខ៣ សាលាបញ្ញាសាស្ត្រអន្តរជាតិ សាខាទី១ ទទួលបានពានរង្វាន់លេខ៣ អមដោយទឹកប្រាក់។ ចំណែកសាលារៀនសុវណ្ណភូមិទី៥៣ ទីតាំង២៧១ និងសាលាបញ្ញាសាស្រ្តអន្តរជាតិ វណ្ណហុង ទទួលបានបណ្ណសរសើរ។

ជាមួយគ្នានោះដែរ តំណាងឱ្យប្អូនៗសិស្សានុសិស្ស ក៏ដូចជាក្រុមសិល្បៈល្ខោននិយាយរបស់សាលានីសិនគ្រីប អាខាដេមី ពិតជាមានក្តីរំភើបរីករាយជាអនេក និងមានមោទនភាពយ៉ាងខ្លាំង ដែលអាចដណ្តើមបានជ័យលាភីលេខ១ នៅក្នុងមហោស្រពថ្នាក់រាជធានីភ្នំពេញលើកទី២ ឆ្នាំ២០២៦ នេះ។ ជ័យលាភីដ៏មានតម្លៃនេះ មិនមែនកើតឡើងដោយចៃដន្យនោះទេ ប៉ុន្តែវាជាលទ្ធផលនៃការខិតខំប្រឹងប្រែងហ្វឹកហាត់យ៉ាងស្វិតស្វាញ ភាពអត់ធ្មត់ និងសាមគ្គីភាពយ៉ាងស្អិតរមួតរបស់សមាជិកក្រុមទាំងអស់ ព្រមទាំងមានការគាំទ្រ និងជ្រោមជ្រែងយ៉ាងពេញទំហឹងពីសំណាក់លោកគ្រូ អ្នកគ្រូ និងថ្នាក់ដឹកនាំសាលា។

នាឱកាសនោះលោកជំទាវ សុទ្ធ សុមាលី បានសង្កត់ធ្ងន់ថា ប្អូនៗបានចូលរួមក្នុងកិច្ចការពារ អភិរក្ស និងថែរក្សាប្រកបដោយចីរភាពនូវវិស័យសិល្បៈវប្បធម៌ខ្មែរ ស្របតាមបញ្ចកោណទី៤ មុំទី២ នៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដោយមានក្រសួងវប្បធម៌ និងវិចិត្រសិល្បៈជាតួអង្គប្រតិបត្តិ លើកិច្ចការងារនេះ។ ការចូលរួមរបស់ប្អូនៗនៅថ្ងៃនេះគឺមានសារៈសំខាន់ខ្លាំងណាស់សម្រាប់វិស័យវប្បធម៌ ព្រោះវាបានបង្ហាញថាក្រសួងវប្បធម៌ តាមរយៈមន្ទីរវប្បធម៌ និងវិចិត្រសិល្បៈរាជធានីភ្នំពេញ បានធ្វើត្រូវហើយ ក្នុងការដែលធ្វើឱ្យយុវជនរបស់នាសម័យទំនើបនេះ ងាកមកចូលរួមគាំទ្រ វិស័យសិល្បៈខ្មែរយើងកាន់តែច្រើនឡើង និងដោយក្តីស្រឡាញ់ពិតប្រាកដឥតងាករេ។ ឆន្ទៈដ៏មុតមាំ របស់ប្អូនៗនាពេលនេះ គឺជាក្តីរំពឹងរបស់ថ្នាក់ដឹកនាំគ្រប់ជាន់ថ្នាក់នៃក្រសួងវប្បធម៌ និងវិចិត្រសិល្បៈ ដែលបានខិតខំប្រឹងប្រែងធ្វើនាពេលកន្លងមក ក្នុងការអូសទាញស្រទាប់យុវជនឱ្យចូលមកគាំទ្រ វិស័យសិល្បៈ រហូតបានក្លាយជាប្រធានបទសំខាន់របស់វិស័យវប្បធម៌របស់យើង នោះគឺ «យុវជន ដើម្បីវប្បធម៌ជាតិ» ៕ អត្ថបទ រដ្ឋា