លោក Mikel Arteta អ្នកចាត់ការទូទៅក្រុម Arsenal ចង់ពង្រឹងតំបន់ប្រយុទ្ធរបស់ក្រុមនៅទីផ្សារដោះដូរកីឡាករខែមករាខាងមុខ ដើម្បីបន្តការប្រកួតប្រជែងដណ្តើមពានរង្វាន់ទាំងក្នុងស្រុក និងនៅអឺរ៉ុប។

គ្រូបង្វឹកក្រុមកាំភ្លើងធំរូបនេះ បានកំណត់ការនាំចូលខ្សែប្រយុទ្ធដែលមានគុណភាពខ្ពស់ជាអាទិភាពចម្បង ដើម្បីពង្រឹងក្រុមក្នុងគោលបំណងការពារតំណែងជើងឯក Premier League និងប្រជែងដណ្តើមពានរង្វាន់ UEFA Champions League។

កីឡាករ Junior Kroupi របស់ក្រុម Bournemouth គឺជាគោលដៅមួយដែល Arsenal កំពុងចាប់អារម្មណ៍ ប៉ុន្តែក្រុម Bournemouth មិនមានបំណងលក់ខ្សែប្រយុទ្ធរូបនេះនៅខែមករាឡើយ។ លើសពីនេះ Arsenal ក៏អាចប្រឈមនឹងការប្រកួតប្រជែងពីក្លិប Paris Saint-Germain និង Bayern Munich ផងដែរ។

ទន្ទឹមនឹងនេះ Arsenal នៅតែចាប់អារម្មណ៍លើខ្សែបម្រើប្រយុទ្ធស្លាប Kenan Yildiz របស់ក្លិប Juventus។ មានការយល់ឃើញថា លោក Arteta ចាត់ទុកការពង្រឹងតំបន់ប្រយុទ្ធនៅខែមករា ជាកត្តាចាំបាច់ ប្រសិនបើក្រុមចង់បន្តប្រកួតប្រជែងលើពីរសមរភូមិផ្សេងគ្នា។

កាលពីទីផ្សារដោះដូរកីឡាកររដូវក្តៅកន្លងទៅ Arsenal បានព្យាយាមនាំយក Morgan Rogers និងបន្ទាប់មក Vinicius Junior ប៉ុន្តែចុងក្រោយមិនអាចសម្រេចកិច្ចព្រមព្រៀងជាមួយកីឡាករទាំងពីរបានឡើយ។

តាមគម្រោង Arsenal ចង់ពង្រឹងតំបន់ប្រយុទ្ធស្លាបឆ្វេងជាចម្បង ប៉ុន្តែក៏កំពុងស្វែងរកខ្សែប្រយុទ្ធដែលអាចលេងបានច្រើនតំណែងផងដែរ ដើម្បីផ្តល់ជម្រើសកាន់តែច្រើនដល់លោក Arteta។

Arsenal បានចាប់ផ្តើមការពារតំណែងជើងឯក Premier League យ៉ាងល្អ ដោយបច្ចុប្បន្នកំពុងឈរនៅកំពូលតារាង និងមានគម្លាត ៣ ពិន្ទុពីក្រុមតាមពីក្រោយ។ ពួកគេក៏នឹងបន្តការប្រកួតប្រជែងនៅអឺរ៉ុប ដោយត្រូវធ្វើដំណើរទៅជួប Slavia Prague ក្នុងពានរង្វាន់ Champions League នៅយប់ថ្ងៃពុធ។

Arsenal ត្រូវបានគេរំពឹងថានឹងធ្វើការផ្លាស់ប្តូរកីឡាករមួយចំនួនពីជម្រើសដែលបានយកឈ្នះ Liverpool មុនការប្រកួត Champions League នៅថ្ងៃពុធ ខណៈពួកគេនឹងត្រូវជួប Hull City នៅថ្ងៃសៅរ៍៕ អត្ថបទ៖នាង សុភាវុធ