ប្រធានសមាគមសហគ្រិនវីម៉ូកម្ពុជា ចាត់ទុកកិច្ចប្រជុំកំពូលហ្វ្រង់កូហ្វូនី ជាការ​បង្ហាញ​អំពី​អរិយធម៌ វប្បធម៌ដូរផូរផង់របស់កម្ពុជា និងការនាំយកនូវផលិតផល និងសក្តានុពល​ដ៏​សម្បូរ​បែប​របស់​ប្រទេស សំដៅលើកកម្ពស់មុខមាត់ កិត្តិយស និងកិត្យានុភាពជាតិនៅ លើឆាកអន្តរជាតិ។

បណ្ឌិត សួន ម៉ិ ប្រធានសមាគមសហគ្រិនវីម៉ូកម្ពុជា លើកឡើងក្នុងកិច្ចសម្ភាសន៍ជាមួយ BTV ស្តីពី​កិច្ចដំណើរការនៅក្នុងខ្សែ ច្រវាក់ផលិតកម្ម និងការចូលតាំងបង្ហាញផលិតផល នៅក្នុងកិច្ច​ប្រជុំ​កំពូល​ហ្វ្រង់កូហ្វូនីលើកទី២០ នេះថា កិច្ចប្រជុំកំពូលហ្វ្រង់កូហ្វូនី លើកទី២០ គឺជាឱកាស​កម្រ​លើក​ទី១ នៅក្នុងប្រវត្តិសាស្រ្តរបស់ប្រទេសកម្ពុជា ដែលតាមរយៈ​នេះ​យើង​ត្រូវ​រួម​គ្នា​លើក​កម្ពស់​មុខ​មាត់របស់ប្រទេសជាតិ តាមរយៈការនាំយកនូវវប្បធម៌ ផលិតផល និង​សក្តា​នុពល​ដ៏​សម្បូរ​បែប​ពីប្រទេសរបស់ខ្លួន មកដាក់តាំងបង្ហាញនៅ ក្នុងភូមិហ្វ្រង់កូហ្វូនី ដែលបាន​និង​កំពុង​រៀបចំឱ្យបានច្រើនកុះករ ដែលនេះគឺជាឱកាសដ៏កម្រ និងជាប្រវត្តិសាស្រ្តរបស់កម្ពុជា។

លោកបណ្ឌិត បន្តថា ដើម្បីជំរុញឱ្យផលិតផល ក៏ដូចជាកសិផលរបស់កម្ពុជាឱ្យពិភពលោកបានស្គាល់ និងបានភ្លក្សរស់ជាតិ ផលិតផលខ្មែរ, ម្ចាស់ក្រុមហ៊ុន រោងចក្រ សហគ្រាសទាំអស់ គួរចូលរួមតាំងពិព័រណ៍ផលិតផលរបស់ខ្លួនឱ្យបានច្រើនកុះករ នៅក្នុង ភូមិវប្បធម៌ហ្វ្រង់កូហ្វូនី ដែលជាឱកាសដ៏កម្រ និងជាប្រវត្តិសាស្រ្តរបស់កម្ពុជាដែលមិនធ្លាប់មានពីមុន ដើម្បីផ្សព្វផ្សាយផលិតផលរបស់ ខ្លួនទៅកាន់អន្តរជាតិបន្ថែម ព្រោះព្រឹត្តិការណ៍នេះនឹងក្លាយជាកាលានុវត្តភាព នៃយុទ្ធសាស្ត្រក្នុងការពង្រីកភាពទាក់ទាញ់ទៅដល់ ភ្ញៀវទេសចរអន្តរជាតិ និងវិនិយោគអន្តរជាតិ ជាពិសេសពីបណ្តាប្រទេសហ្រ្វង់កូហ្វូនីឱ្យមកទស្សនា ការចាប់ដៃគូពាណិជ្ជកម្ម និងការ វិនិយោគនៅកម្ពុជាបន្ថែម ដោយព្រឹត្តិការណ៍នេះនឹងក្លាយជាច្រកផ្លូវសេដ្ឋកិច្ចដ៏សំខាន់ សម្រាប់បណ្តាប្រទេសហ្វ្រង់កូហ្វូនី ក្នុងការ ឈានជើងចូលមកទីផ្សារតំបន់អាស៊ី-ប៉ាស៊ីហ្វិក។

សូមបញ្ជាក់ថា កិច្ចប្រជុំកំពូលហ្វ្រង់កូហ្វូនីលើកទី២០ ដែលកម្ពុជាធ្វើជាម្ចាស់ផ្ទះ នឹងប្រព្រឹត្តទៅចាប់ពីថ្ងៃទី១៣ ដល់ថ្ងៃទី១៧ ខែវិច្ឆិកា ឆ្នាំ២០២៦ នៅសួនច្បារមុខវត្តបទុមវតី្ត ក្នុងនោះការរៀបចំព្រឹត្តិការណ៍អម មានមុខងារសំខាន់ៗជាច្រើនដូចជា៖ ទី១- កន្លែងដែល ត្រូវរៀបចំពន្លាជាតិ និងអង្គការ OIF ដែលជាពន្លារបស់ប្រទេសជាសមាជិកទាំងអស់។ ទី២- ភូមិហ្វ្រង់កូហ្វូនីគឺជាកន្លែង ដែលអនុញ្ញតិ ឱ្យប្រទេសជាម្ចាស់ផ្ទះ ប្រទេសសមាជិក និងដៃគូទាំងអស់ អាចប្រើប្រាស់ទីតាំងភូមិហ្វ្រង់កូហ្វូនីជាកន្លែងសិក្ខាសាលា សន្និសីទសារ- ព័ត៌មាន ឬជាកន្លែងពិភាក្សាជាដើម។ ទី៣- ភូមិហ្វ្រង់កូហ្វូនី ក៏ជាកន្លែងឱ្យបណ្តាសហគ្រាសឯកជន និងសហគ្រាសរដ្ឋ របស់កម្ពុជា អាចដាក់តាំងបង្ហាញនូវផលិតផលសំខាន់ៗរបស់ជាតិ ទៅកាន់អន្តរជាតិផងដែរ។ ទី៤- ការរៀបចំសម្តែងសិល្បៈប្រចាំថ្ងៃ របស់ប្រទេស ជាម្ចាស់ផ្ទះ និងក៏ឱ្យអនុញ្ញាតិឱ្យប្រទេសជាសមាជិក នាំយកនូវសិល្បៈសំខាន់ៗឱ្យចូលរួមផងដែរ និងទី៥- ភូមិហ្វ្រង់កូហ្វូនី ក៏ជាកន្លែង បង្ហាញនូវវិស័យម្ហូបអាហាររបស់កម្ពុជា និងប្រទេសជាមិត្តក្នុងក្របខណ្ឌរបស់អង្គការអន្តរជាតិហ្វ្រង់កូហ្វូនី (OIF)៕ អត្ថបទ៖ សុន រ៉ាឌី