ក្នុងរយៈពេល២៧ថ្ងៃ នៃដំណើរការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០២៦ បានប្រ​​​ព្រឹ​​​ត្តិទៅដោយរលូនល្អ។ នេះបើតាមប្រសាសន៍របស់ឯកឧត្តម ហេង ស៊ីឡេង សមាជិក​គណៈកម្មាធិការ​ជាតិ​រៀ​​បចំការបោះឆ្នោត (គ.ជ.ប)។

គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី០៣ ខែវិច្ឆិកា ឆ្នាំ២០២៦នេះ បាន​រៀ​​​​​បចំកិច្ចប្រជុំជាមួយភាគីពាក់ព័ន្ធ ស្តីពីសភាពការណ៍ទូទៅជុំវិញដំណើរការ នៃ​ការ​ពិនិត្យ​បញ្ជី​ឈ្មោះ ​និងការចុះឈ្មោះបោះឆ្នោត ឆ្នាំ២០២៦ តាមឃុំ សង្កាត់ លទ្ធផលបណ្តោះអាសន្ន នៃ​ការ​ពិនិត្យ​បញ្ជី​ឈ្មោះ និងការចុះឈ្មោះបោះឆ្នោត និងបញ្ហាប្រឈម​ក្នុង​ដំណើរ​ការ​ចុះ​ឈ្មោះបោះ​ឆ្នោត​។ កិច្ចប្រជុំនេះ ប្រព្រឹត្តិទៅក្រោមអធិបតីភាព ឯកឧត្តម ហេង ស៊ីឡេង សមាជិក គ.ជ.ប ដោយ​មានការចូលរួមពីភាគីពាក់ព័ន្ធនានាស្ថិតនៅទីស្ដីការ គ.ជ.ប រាជធានីភ្នំពេញ។

នៅ​ក្នុង​កិច្ចប្រជុំ ឯកឧត្តម ហេង ស៊ីឡេង សមាជិក គ.ជ.ប បានថ្លែងថា ក្នុងរយៈពេល២៧ថ្ងៃ នៃកា​​​​រពិនិត្យបញ្ជីឈ្មោះ និងការចុះឈ្មោះបោះឆ្នោតតាមឃុំ សង្កាត់ កន្លងមកនេះ គ.ជ.ប បានកត់សម្គាល់ឃើ​​ញថា៖ មន្ត្រី គ.ជ.ប គ្រប់លំដាប់ថ្នាក់ ជាពិសេសក្រុមចុះឈ្មោះបោះឆ្នោត បានអនុវត្តយ៉ាងត្រឹមត្រូវតា​​មច្បា​​ប់ បទបញ្ជា និងនីតិវិធី ព្រមទាំងលិខិតបទដ្ឋានគតិយុត្តផ្សេងទៀត ដែលធ្វើឱ្យដំណើរការ នៃការពិនិត្យ​​បញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦នេះ ប្រព្រឹត្តទៅរលូនល្អ។

រីឯគណៈបញ្ជាការសន្តិសុខអចិន្រ្តៃយ៍សម្រាប់ការបោះឆ្នោតថ្នាក់ជាតិ និងថ្នាក់ក្រោមជាតិ និងគណៈ​​បញ្ជាការឯកភាពរដ្ឋបាលរាជធានី ខេត្ត បានរៀបចំកម្លាំងការពារគោលដៅសំខាន់ៗ ជាពិសេសតាមការិ​​យាល័យចុះឈ្មោះបោះឆ្នោត នៅតាមសាលាឃុំ សង្កាត់ និងនៅតាមភូមិមួយចំនួន ដោយប្រើកម្លាំងនគរបាលការពារចំនួន ២នាក់ ក្នុងមួយការិយាល័យ។ ជារួមគិតត្រឹមថ្ងៃទី៣ ខែវិច្ឆិកានេះ ដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោតនៅទូទាំងប្រទេស បានប្រព្រឹត្តទៅក្នុងសភាពការណ៍សន្តិសុ​​ខ ​​សុវត្ថិភាព សណ្តាប់ធ្នាប់សាធារណៈ និងបរិយាកាសល្អប្រសើរ គ្មានអំពើហិង្សា គ្មានការបំភិតបំភ័យ គ្មានការគំរាមកំហែងផ្សេងៗ ហើយគ្រប់ភាគីពាក់ព័ន្ធបានចូលរួមអនុវត្តតាមភារកិច្ចរៀងៗខ្លួន។

គួរបញ្ជាក់ដែរថា ការពិនិត្យបញ្ជីឈ្មោះ និងការចុះឈ្មោះបោះឆ្នោត នៅតាមឃុំ/សង្កាត់ ទូទាំងប្រ​​ទេ​​ស​​​​​​កម្ពុជា មានរយៈពេល៥៥ថ្ងៃ ដោយចាប់ផ្តើមពីថ្ងៃទី០៧ ខែតុលា រហូតដល់ថ្ងៃទី៣០ខែវិច្ឆិកា ឆ្នាំ២​​០​​​២​​៦​​​​​។​​

បើតាមលទ្ធផលបណ្តោះអាសន្ន នៃការពិនិត្យបញ្ជីឈ្មោះ និងការចុះឈ្មោះបោះឆ្នោត ចាប់ពីថ្ងៃទី០​​​​​​​​៧​​ខែតុលា រហូតដល់ថ្ងៃទី០២ខែវិច្ឆិកាម្សិលមិញ មានដូចជា៖ ប្រជាពលរដ្ឋចុះឈ្មោះបោះឆ្នោតថ្មីមានចំ​​នួន​​ជាង៣សែននាក់, អ្នកដែលបានផ្ទេរចូលការិយាល័យបោះឆ្នោតក្នុងឃុំ សង្កាត់ថ្មី មានចំនួនជាង១២ម៉ឺ​​​ន​នាក់, អ្នកដែលបានស្នើសុំកែតម្រូវទិន្នន័យជីវប្រវត្តិមានចំនួនជិត១លាននាក់, អ្នកដែលបានមកធ្វើប​​​ច្ចុប្បន្ន​ភាពទិន្នន័យជីវមាត្រមានចំនួនជិត១លាននាក់ និងអ្នកដែលនឹងត្រូវលុបឈ្មោះចេញពីបញ្ជីបោះឆ្នោត មា​​​​នចំនួនជាង២០ម៉ឺននាក់៕ អត្ថបទ៖ទូច សោភ័ណ