ស៊ីហ្គេម៖ គិតត្រឹមពេលនេះនៅសល់ជាង ២ឆ្នាំទៀត ព្រឹត្តិការណ៍កីឡាដ៏ធំប្រចាំតំបន់អាស៊ីអាគ្នេយ៍ស៊ីហ្គេម ២០២៣ ដែលព្រះរាជាណាចក្រកម្ពុជាធ្វើជាម្ចាស់ផ្ទះនឹងចូលមកដល់។ កាលពីពេលថ្មីៗកន្លងទៅនេះ ឯកឧត្ដម ថោង ខុន ប្រធានគណៈកម្មាធិការជាតិអូឡាំពិកកម្ពុជា និងជាអនុប្រធានអចិន្ត្រៃយ៍គណៈកម្មាធិការជាតិ រៀបចំការប្រកួតកីឡាស៊ីហ្គេម ២០២៣ (CAMSOC) បានលើកឡើងថា ឯកឧត្ដមក៏ដូចជាកម្ពុជា នឹងក្លាយជាប្រធានក្រុមប្រឹក្សាសហព័ន្ធកីឡាអាស៊ីអាគ្នេយ៍ចាប់ពីឆ្នាំ២០២២ ដល់ឆ្នាំ២០២៣។
ឯកឧត្ដមក្នុងនាមប្រធានតំបន់ នឹងខិតខំប្រឹងប្រែងរួមជាមួយគណៈកម្មាធិការប្រតិបត្តិ នៃគណៈកម្មាធិការជាតិអូឡាំពិកកម្ពុជា ប្ដេជ្ញាយកអស់កម្លាំងកាយចិត្តដឹកនាំអង្គការកីឡាតំបន់មួយនេះ ឲ្យទទួលបាននិរន្តរភាពការងារគ្រប់គ្រងដឹកនាំកីឡា ពិសេសក្នុងបេសកកម្មជំរុញការអភិវឌ្ឍចលនាអូឡាំពិកក្នុងតំបន់ និងជួយរៀបចំការប្រកួតស៊ីហ្គេម អាស៊ានប៉ារ៉ាហ្គេម ២០២៣ ឲ្យទទួលបានជោគជ័យ។ សូមជម្រាបជូនថា ក្រុមប្រឹក្សាសហព័ន្ធកីឡាអាស៊ាន គឺជាចលនាអូឡាំពិកក្នុងតំបន់អាស៊ីអាគ្នេយ៍ ដែលបានបង្កើតឡើងនាឆ្នាំ១៩៥៩ ក្នុងនោះកម្ពុជាជាប្រទេសស្ថាបនិកមួយ ចំណោមប្រទេសស្ថាបនិកទាំង៦ រួមមានថៃ វៀតណាម ឡាវ ម៉ាឡេស៊ី មីយ៉ាន់ម៉ា និងកម្ពុជា។ ប៉ុន្តែក្នុងចំណោមប្រទេសស្ថាបនិកទាំងនោះ មានតែកម្ពុជាមួយគត់ដែលមិនធ្លាប់ធ្វើម្ចាស់ផ្ទះស៊ីហ្គេម៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
