ឧត្តមនាវីឯក ទៀ សុខា មេបញ្ជាការកងទ័ពជើងទឹក អនុប្រធានប្រចាំការ និង​ជា​អគ្គ​លេខា​ធិការ​នៃ​គណៈកម្មាធិការជាតិសន្តិសុខលម្ហសមុទ្របានឲ្យដឹងថា កងទ័ពជើងទឹក​ជ្រើស​រើស​ពលនាវិក​ថ្មី​ចំនួន​៥០០​នាក់ ឲ្យបំពេញក្របខណ្ឌឲ្យកងទ័ពជើងទឹក ស្របទៅតា​ម​ផែន​ការ​របស់​រាជ​រដ្ឋាភិបាល ​ក្រសួងការពារជាតិ និងអគ្គ បញ្ជាការ ហើយខណៈ​ការ​ជ្រើសរើស​នេះ​ក៏​ដើម្បី​បង្កើន​សមត្ថភាព​បន្ថែ​មទៀតសម្រាប់កងទ័ពជើងទឹកផងដែរ។

ថ្លែងនៅក្នុងឱកាសអញ្ជើញបើកវគ្គហ្វឹកហ្វឺន បណ្តុះបណ្តាលពលនាវិកថ្មី កងទ័ព​ជើង​ទឹ​ក​ឆ្នាំ​២០២៦ សម្ពោធដាក់ឲ្យប្រើប្រាស់ អគារស្នាក់នៅសម្រាប់សិក្ខាកាមមួយខ្នង និង​បញ្ចុះ​បឋម​សិលា អគារស្នាក់នៅសិក្ខាកាមមួយខ្នង នាថ្ងៃទី៣ ខែវិច្ឆិកា ឆ្នាំ២០២៦ នៅបញ្ជាការ​ដ្ឋាន​ការ​ពារ​កោះឆ្នេរ​នោះ ​ឧត្តមនាវីឯក ទៀ សុខា បានបញ្ជាក់ថា ដើម្បីពង្រឹងសមត្ថភាពកងទ័ពជើងទឹក និង​អនុវត្តឲ្យកាន់តែមានប្រសិទ្ធភាពទៅតាមផែនការរបស់ប្រមុខ រាជរដ្ឋាភិបាល ក្រសួងការពារជាតិ និង​អគ្គ​បញ្ជាការ​នោះ​ហើយ​បន្ទាប់​ពី​ជ្រើស​រើសនាវិកថ្មីទាំង​នេះ​ក៏​បាន​ធ្វើ​ការ​បណ្តុះ​បណ្តាល​ឲ្យមា​ន​សមត្ថភាព មានលក្ខណៈសម្បត្តិគ្រប់គ្រាន់មានជំនាញច្បាស់លាស់ និងយល់ដឹង​នូវ​ជំនាញ​មូល​ដ្ឋាន​យោធា ដើម្បីក្លាយខ្លួនជាយោធិនអាជីព នៃកងយោធពលខេមរភូមិន្ទ ជាពិសេសនាវិកភាព ដែល​មានសមត្ថភាពពេញលេញរបស់កងទ័ពជើងទឹក។

ក្នុងឱកាសបើកវគ្គហ្វឹកហ្វឺននោះដែរ ឧត្តមនាវីឯក ទៀ សុខា ក៏បានក្រើន​រំលឹក​ទៅ​នាវិកថ្មី​ទាំង​នោះ​ផង​ដែរថា ត្រូវចេះស្រលាញ់រាប់អានគ្នា ចេះជួយមិត្តរួមជំនាន់ ត្រូវតស៊ូអំណត់​គ្រប់​កាលៈទេសៈពេលកំពុង ហ្វឹកហ្វឺន ត្រូវមានសាមគ្គីភាពល្អ និងត្រូវ​គោរព​យ៉ាង​ម៉ឺង​ម៉ាត់​នូវ​ច្បាប់​លក្ខន្តិកៈ បទវិន័យទូទៅ និងសណ្តាប់ធ្នាប់របស់កងយោធពលខេមភូមិន្ទ ដោយ​ខិតខំ​យក​ចិត្ត​ទុក​ដាក់​រៀន​សូត្រ ហ្វឹកហ្វឺនទាំងនៅក្នុងថ្នាក់ និងនៅទីលាន ដើម្បីលត់ដំខ្លួនឲ្យក្លាយជាយោធិនឆ្នើម និង​ជា​អ្នក​បន្តវេន ជាពិសេសបំផុតនោះគឺ ត្រូវមានឆន្ទៈស្មោះត្រង់ចំពោះជាតិមាតុភូមិ លើក​កម្ពស់​មន​សិការ​ស្នេហាជាតិ ដោយតម្កល់ផលប្រយោជន៍ជាតិជាធំ ដោយត្រូវការ​ពាររាជ​រដ្ឋាភិបាល​ស្រប​ច្បាប់ ​ការពារបូរណភាពទឹកដី និងសន្តិភាពឲ្យខាងតែបាន ទោះក្នុងតម្លៃណាក៏ដោយ។

ជាមួយ​គ្នា​នោះដែរ ឧត្តមនាវីឯក ទៀ សុខា ក៏បានលើកឡើងផងដែរថា កងទ័ពជើង​ទឹក​ក៏​បាន​ប្តេជ្ញា​ចិត្ត​ អនុវត្តយ៉ាងម៉ឺងម៉ាត់ ទៅតាមបទបញ្ជារបស់ប្រមុខរាជរដ្ឋាភិបាល ក្រសួងការពារជាតិ និង​អគ្គបញ្ជា ការក្នុងការបំពេញតួនាទី ភារកិច្ចរបស់ខ្លួនយ៉ាងអង់អាចក្លាហាន និងហ៊ាន​ពលីកម្ម​គ្រប់​បែប​យ៉ាង ក្នុងការ ការពារអធិបតេយ្យភាព ឯករាជ្យ និងបូរណភាពទឹកដី​នៃ​ព្រះរាជាណា​ចក្រ​កម្ពុជា ​ការពារឲ្យបានរឹងមាំ នូវ ដែនទឹក កោះ ឆ្នេរ និងរាល់បណ្តាភូមិសាស្រ្តពាក់ព័ន្ធដទៃទៀត ដែល​ថ្នាក់​លើបានកំណត់ ក្នុងស្មារតីទទួល សុខស្រូវខ្ពស់បំផុតផងដែរ៕ អត្ថបទ បាន ចក់