តាកែវ៖ ឯកឧត្តមបណ្ឌិត ពេជ សោភ័ន សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាសហប្រធានក្រុមការងារគណបក្សចុះមូលដ្ឋានស្រុកព្រៃកប្បាស ខេត្តតាកែវ នៅថ្ងៃទី២៣ ខែឧសភា ឆ្នាំ២០២២ នេះ បានដឹកនាំក្រុមការងារ និងសមាជិកគណបក្សប្រជាជនកម្ពុជា​ចុះបើកយុទ្ធនាការឃោសនាបោះឆ្នោតនៅក្នុងឃុំពោរំចាក ស្រុកព្រៃកប្បាស ខេត្តតាកែវ។

នាឱកាសនោះឯកឧត្តមបណ្ឌិត ពេជ សោភ័ន បានមានប្រសាសន៍ថា គណបក្សប្រជាជនកម្ពុជា គឺជាគណបក្សមួយដែលបានរំដោះប្រទេសជាតិជាតិ និងបងប្អូនប្រជាពលរដ្ឋពីរបបកាប់សម្លាប់​ខ្មែរក្រហម ហើយបានរួមសុខរួមទុក្ខជាមួយនឹងបងប្អូន​ប្រជាពលរដ្ឋអស់រយៈពេល​ជាង ៤០ឆ្នាំ​មកហើយ ហើយមិនដែលរត់ចោលបងប្អូនប្រជាពលរដ្ឋម្ដងណានោះទេ។ នៅពេល​បងប្អូន​ប្រជាពលរដ្ឋជួបទុក្ខលំបាកតែងតែលេចមុខមន្រ្តីគណបក្សប្រជាជនកម្ពុជាចុះជួយបងប្អូនជានិច្ច។

ឯកឧត្តមបណ្ឌិត ពេជ សោភ័ន បានថ្លែងបន្តថា គណបក្សប្រជាជនកម្ពុជាបានលះបង់​និង​ប្រឹងប្រែង​គ្រប់បែបយ៉ាងដើម្បីប្រជាពលរដ្ឋកម្ពុជា និងបានកសាងអភិវឌ្ឍន៍ប្រទេសជាតិ​អោយកាន់តែរីក​ចម្រើន​​ទ្វេឡើង ​ពោលយើងបានប្លាស់ប្ដូរពីប្រទេសដែលក្រីក្រ មកជាប្រទេសដែលមានការអភិវឌ្ឍន៍​រីកចម្រើន ​និងប្រកាន់យករបបប្រជាធិបតេយ្យ ប្រទេសជាតិមានសុខសន្តិភាព។

ឯកឧត្តមបណ្ឌិត ពេជ សោភ័ន បានថ្លែងបន្តថា ប្រទេសកម្ពុជាបច្ចុប្បន្ន ដែលដឹកនាំដោយរាជ​រដ្ឋាភិបាល​គណបក្សប្រជាជនកម្ពុជា ​ដែលមានសម្ដេចតេជោ ​ហ៊ុន សែន ជាប្រមុខ កំពុងតែ​មាន​មុខមាត់​នៅលើឆាកអន្តរជាតិខណៈដែលបច្ចុប្បន្នកម្ពុជាគឺជាប្រធានអាស៊ាន ជាពិសេសនៅក្នុង​ការធ្វើ​សង្រ្គាមជាមួយជំងឺកូវីដ១៩​ ប្រទេសកម្ពុជា​យើងបានប្រយុទ្ធបានជោគជ័យ ដោយជាប់​ចំណាត់ថ្នាក់​លេខ ២ក្នុងចំណោមប្រទេសជាង២០០។

ភាពជោគជ័យនេះគឺមិនមែនកើតមានឡើងដោយចៃដន្យនោះទេ វាកើតឡើងដោយសារតែ​រាជ​រដ្ឋាភិបាល​របស់គណបក្សប្រជាជនកម្ពុជា​មានមេដឹកនាំឈ្លាសវៃ​ដោយបាន​ដាក់ចេញនូវ​យុទ្ធសាស្រ្ត​ច្បាស់លាស់ និងត្រឹមត្រូវ៕អត្ថបទ៖ គុជ វិភាគ