បាត់ដំបង៖ សម្ដេចក្រឡាហោម ស ខេង នាយករដ្ឋមន្រ្តីស្ដីទីនៃរាជរដ្ឋាភិបាលកម្ពុជា បានមានប្រសាសន៍ថា បើប្រទេសគ្មានសុខសន្តិភាព មិនអាចកសាងលទ្ធិប្រជាធិបតេយ្យបាននោះទេ ព្រោះលទ្ធិប្រជាធិបតេយ្យរស់រានមានជីវិតទៅបានអាស្រ័យលើកត្តាសុខសន្តិភាព។

ក្នុងពិធីសម្ពោធអគារសិក្សា១ខ្នង កម្ពស់២ជាន់ ស្មើ១០បន្ទប់ ក្នុងបរិវេណអនុវិទ្យាល័យខ្នាចរមាស ស្ថិតក្នុងស្រុកបវេល ខេត្តបាត់ដំបង នៅថ្ងៃទី២៣ ខែឧសភា ឆ្នាំ២០២២ សម្ដេចក្រឡាហោម ស ខេង មានប្រសាសន៍ថា សុខសន្តិភាពជាកត្តាគន្លឹះនាំឱ្យមានលទ្ធិប្រជាធិបតេយ្យ ហើយធ្វើឱ្យសេដ្ឋកិច្ច និងជីវភាពរស់នៅរបស់ប្រជាពលរដ្ឋត្រូវបានលើកកម្ពស់ជាបន្តបន្ទាប់។

បន្ថែមពីនេះ សម្ដេច ស ខេង បានអំពាវនាវដល់បងប្អូនប្រជាពលរដ្ឋទាំងអស់ ដែលមាន​ឈ្មោះក្នុង​បញ្ជីបោះឆ្នោត ទៅបោះឆ្នោតឱ្យបានគ្រប់ៗគ្នានៅថ្ងៃអាទិត្យទី៥ ខែមិថុនា ឆ្នាំ២០២២ ដើម្បី​ជ្រើសរើស​ថ្នាក់ដឹកនាំឃុំ-សង្កាត់សំដៅអភិវឌ្ឍន៍មូលដ្ឋានរបស់ខ្លួនជាបន្តទៅទៀត។

សម្ដេច ក៏បានប្រាប់ដល់ប្រជាពលរដ្ឋ កុំឱ្យជឿលើការញុះញង់ណាមួយដែលផ្ទុយ​នឹងច្បាប់ និង​មាន​និន្នាការ​បន្ទុចបង្អាក់​ដល់ដំណើរការបោះឆ្នោត ព្រមទាំងការ​ឃោសនា​ទាំង​ឡាយណាក្នុង​ន័យ​អវិជ្ជមាន ភូតកុហក ឬបំភ្លៃការពិត ដែលជាទង្វើអសីលធម៌ធ្វើឱ្យ​ប៉ះពាល់​ដល់ការរីកចម្រើន​របស់​សង្គមជាតិព្រោះការបោះឆ្នោតពិតជាមានសារៈសំខាន់ខ្លាំងណាស់។

សម្ដេចក្រឡាហោម ​បានណែនាំដល់អាជ្ញាធរភូមិ ​ឃុំ ត្រូវផ្ដល់កិច្ចសហការឱ្យបានជិតស្និទ និង​ល្អប្រសើរជាមួយ​គណៈកម្មការឃុំ-សង្កាត់រៀបចំការបោះឆ្នោតនៅគ្រប់ដំណាក់កាល​នៃ​ដំណើរការ​បោះឆ្នោត ជាពិសេសបង្កលក្ខណៈងាយស្រួលដល់គ្រប់គណបក្ស​នយោបាយ​ដែល​បាន​ចុះឈ្មោះ​ចូលរួមប្រកួតប្រជែងការ​បោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ​ឱ្យធ្វើសកម្មភាព​ដោយសេរី​ និងស្មើភាពក្នុងរយៈពេលយុទ្ធនាការឃោសនាបោះឆ្នោតស្របតាមច្បាប់​ បទបញ្ជា នីតិវិធី​នៃការបោះឆ្នោតដើម្បីធានាឱ្យការបោះឆ្នោតប្រព្រឹត្តទៅដោយសេរី​ ត្រឹមត្រូវ យុត្តិធម៌ និងគ្មានអំពើហិង្សា៕អត្ថបទ៖ សុភ័ក្រ្ត